Андрэй Валянцінавіч Кузьмін

Андрэй Валянцінавіч Кузьмін (руск.: Андрей Валентинович Кузьмин; нар. 1973) — расійскі гісторык, кандыдат гістарычных навук (2013).

Скончыў гісторыка-філалагічны факультэт Расійскага дзяржаўнага гуманітарнага ўніверсітэта. У 1999 годзе абараніў выпускную кваліфікацыйную працу на тэму «Генеалогія княжацкіх і баярскіх родаў Паўночна-Усходняй Русі ў XIII — пачатку XV ст.» (кафедра «Крыніцазнаўства і дапаможныя гістарычныя дысцыпліны» гісторыка-архіўнага інстытута РДГУ; навуковы кіраўнік — дацэнт, кандыдат гістарычных навук Ігар Мікалаевіч Данілеўскі). У 2002 годзе скончыў вочную аспірантуру Інстытута расійскай гісторыі Расійскай акадэміі навук.^[1]

У кастрычніку 2002—2007 годзе — навуковы супрацоўнік навукова-даследчага аддзела рукапісаў Расійскай дзяржаўнай бібліятэкі. З чэрвеня 2007 — старшы, са снежня 2008 — вядучы навуковы супрацоўнік НДА кніг і чытання РДБ. Таксама, у 2003—2008 гадах — старшы навуковы рэдактар «Рускай рэдакцыі» царкоўна-навуковага цэнтра «Праваслаўная энцыклапедыя».^[1] Аўтар многіх артыкулаў Праваслаўнай энцыклапедыі.

У 2013 годзе ў ІРГ РАН абараніў кандыдацкую дысертацыю па тэме «Тытулаваная і нетытулаваная знаць Паўночна-Усходняй Русі XIII — першай чвэрці XV ст.: (гісторыка-генеалагічнае даследаванне)» (навуковы кіраўнік доктар гістарычных навук Надзея Аляксандраўна Собалева).^[1]

Абшар навуковай дзейнасці — гісторыя, крыніцазнаўства, генеалогія і археалогія Расіі і краін Цэнтральнай і Усходняй Еўропы. Спецыяліст па генеалогіі ваенна-служылай знаці Усходняй Еўропы і генеалогіі святых падзвіжнікаў XIII—XV стагоддзяў.^[1]