Вадзім Элдаравіч Зіманскі

Вадзім Элдаравіч Зіманскі (нар. 12 лістапада 1968, Віцебск) — беларускі мовазнавец. Кандыдат філалагічных навук, дацэнт^[1].

Нарадзіўся 12 лістапада 1968 года ў Віцебску. У 1992 годзе скончыў Віцебскі дзяржаўны педагагічны інстытут імя С. М. Кірава па спецыяльнасці «Педагогіка і методыка пачатковага навучання». У 1997 годзе атрымаў адукацыю па спецыяльнасці «Беларуская мова і літаратура» ў ВДУ імя П. М. Машэрава^[1].

У 2001 годзе скончыў аспірантуру ВДУ па спецыяльнасці «Мовазнаўства». У тым жа годзе абараніў кандыдацкую дысертацыю, у 2002 годзе атрымаў ступень кандыдата філалагічных навук, а ў 2004 годзе яму было прысвоена вучонае званне дацэнта^[1].

У 2001—2003 гадах працаваў на кафедры беларускай мовы ВДУ, затым у 2003—2015 гадах — дацэнтам кафедры беларускага мовазнаўства. У 2011 годзе скончыў Рэспубліканскі інстытут вышэйшай школы па спецыяльнасці «Педагагічныя вымярэнні». У 2015—2022 гадах — дацэнт кафедры беларускага мовазнаўства філалагічнага факультэта ВДУ. З 2022 года працуе дацэнтам кафедры беларускай і рускай філалогіі факультэта гуманітарных ведаў і камунікацый таго ж універсітэта^[1].

Займаецца даследаваннем гістарычнай граматыкі беларускай мовы, гісторыі беларускай літаратурнай мовы, царкоўнаславянскай мовы, беларускай палеаграфіі і сучаснай беларускай арфаграфіі^[1].