Вячэрніца рыжая

	Вячэрніца рыжая
Навуковая класіфікацыя
Дамен:	Эўкарыёты
Царства:	Жывёлы
Падцарства:	Эўметазоі
Без рангу:	Двухбакова-сіметрычныя
Без рангу:	Другаснаротыя
Тып:	Хордавыя
Падтып:	Пазваночныя
Інфратып:	Сківічнаротыя
Надклас:	Чацвераногія
Клас:	Млекакормячыя
Падклас:	Звяры
Інфраклас:	Плацэнтарныя
Надатрад:	Laurasiatheria
Атрад:	Рукакрылыя
Падатрад:	Кажаны
Надсямейства:	Vespertilionoidea
Сямейства:	Гладканосыя лятучыя мышы
Падсямейства:	Vespertilioninae
Трыба:	Pipistrellini
Род:	Вячэрніцы
Від:	Вячэрніца рыжая
Міжнародная навуковая назва
	Nyctalus noctula Schreber, 1774
ITIS	632069
NCBI	51300
EOL	1038529

Вячэрніца рыжая (Nyctalus noctula) — млекакормячая жывёла сямейства гладканосых (звычайных) лятучых мышэй (Vespertilionidae).

Апісанне

Даўжыня цела 64—81, перадплечча 51—57 мм. Галава параўнальна вялікая з шырокай мордай. Вушы цёмна-бурыя, акруглыя, кароткія, тоўстыя. Крылы вузнія і доўгія. Поўсць кароткая, мяккая, зверху палева-рыжая, знізу крыху святлейшая.

Пашырэнне

Пашырана ў Еўропе, Азіі да Алтая і ў Паўднёва-Заходнім Кітаі. Паўночная мяжа арэала праходзіць праз Шатландыю, Швецыю, Паўднёвую Фінляндыю і Сярэдні Урал; паўднёвая — праз Іран і Гімалаі. Трапляецца ў мяшавых і шыракалістых лясах Еўрапейскай часткі Расіі, у лясах Сярэдняй Азіі і Закаўказзя. На Беларусі найбольш пашыраная і шматлікая з вячэрніц. Пералётная.

Асаблівасці біялогіі

Селіцца ў старых высакастволых лясах, парках, гаях, старых садах. На Беларусі ў летніх сховішчах (дуплы дубоў, ліп, клёнаў, таполяў, радзей хвояў) трапляецца з сярэдзіны мая.

Корміцца па змярканні і на досвітку хрушчамі, соўкамі, ліставёрткамі, ваўнянкамі, пядзенікамі і іншымі насякомымі.

Самкі жывуць калоніямі па 20—90 асобін, самцы па адным (з 2-й паловы ліпеня калоніямі па 3—10 асобін). Дзіцянят (2, радзей 1) нараджае ў канцы мая — 1-й пал. чэрвеня. З Беларусі адлятае на зімоўку ў канцы жніўня ў краіны Заходняй Еўропы.