Давыд-Гарадоцкія баі

Давыд-Гарадоцкія баі
Асноўны канфлікт: Вялікая Айчынная вайна
Давыд-Гарадоцкія баі
Дата	ліпень, кастрычнік, лістапад 1943
Месца	Давыд-Гарадок
Вынік	знішчэнне нямецкага гарнізона ў горадзе
Праціўнікі
Партызанская брыгада «Савецкая Беларусь» Партызанскае злучэнне А. М. Сабурава Нямецкія акупацыйныя войскі і іх саюзнікаў

Давыд-Гарадоцкія баі паміж савецкімі партызанскімі атрадамі «Савецкая Беларусь» (пазней брыгада «Савецкая Беларусь») Пінскай вобласці, злучэннем А. М. Сабурава Жытомірскай вобласці і нямецкім гарнізонам (каля 200—300 чал.)^[1] у Давыд-Гарадку Столінскага раёна ў ліпені, кастрычніку і лістападзе 1943 года.

Разгрому буйнога гарнізона праціўніка ў Давыд-Гарадку (каля 300 чал.) папярэднічала партызанская разведка. Звесткі пра размяшчэнне гарнізона, сістэму абароны партызанам перадалі падпольшчыкі. У аперацыі ўдзельнічалі 5 партызанскіх баявых груп (400 чал.). Адна група, каб адцягнуць увагу ворага, наступала па дарозе в. Альшаны—Тураў, другая перакрыла дарогу ў в. Харомск, перашкаджаючы падыходу падмацаванняў праціўніка з Століна. Тры групы партызанаў у ноч на 25 ліпеня з розных бакоў уварваліся ў Давыд-Гарадок і да гадзіны ночы поўнасцю авалодалі горадам.

У выніку бою жандармерыя і паліцыя ў горадзе былі ў асноўным ліквідаваны (знішчана каля 20 чал., а астатнія ў паніцы разбегліся), знішчаны ўсе будынкі, у якіх знаходзіліся ўстановы і прадпрыемствы акупантаў, спалены мост цераз р. Гарынь, склады і ўмацаванні, 3 аўтамашыны, 4 матацыклы, захоплена зброя. Спалены нямецкі маёнтак «Высокае» каля Давыд-Гарадка, захоплена 20 коней, 120 галоў буйной рагатай жывёлы, больш за 200 авечак. Вайсковая часць праціўніка, што знаходзілася за 1 км ад Давыд-Гарадка за р. Гарынь, якая шырока разлілася, была паралізавана агнём партызанскай артылерыі. Партызаны без страт пакінулі Давыд-Гарадок.

У ноч на 14 кастрычніка 1943 года савецкія партызаны зрабілі другі налёт на гарнізон у Давыд-Гарадку. Праціўнік не прыняў бою і пакінуў умацаваныя пазіцыі. Партызаны знішчылі ўсе будынкі і прадпрыемствы акупантаў, узарвалі масты цераз р. Гарынь, катэр, захапілі склады з харчаваннем і амуніцыяй і без страт адышлі.

7 лістапада 1943 года партызаны зноў атакавалі гарнізон у Давыд-Гарадку і знішчылі склады.

• Давыд-Гарадоцкія баі 1943 // Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — С. 568. — 10 000 экз. — ISBN 985-11-0035-8. — ISBN 985-11-0090-0 (т. 5).
• Пасэ, У. Давыд-Гарадоцкія баі 1943 // Энцыклапедыя гісторыі Беларусі. У 6 т. Т. 3: Гімназіі — Кадэнцыя / Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн. : БелЭн, 1996. — С. 191. — 10 000 экз. — ISBN 985-11-0041-2.
• Капранава, Н. У. Давыд-Гарадоцкія баі 1943 // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 184. — 680 с. — 20 000 экз. — ISBN 5-85700-012-2.