Зялёная зона

Зялёная зона — тэрыторыя за межамі гарадской лініі, занятая лясамі, лесапаркамі і інш. зялёнымі насаджэннямі. Выконвае ахоўныя і санітарна-гігіенічныя функцыі і з'яўляецца месцам адпачынку насельніцтва. Лясы зялёнай зоны належаць да лясоў І групы; у іх вылучаюць лесапаркавую частку, дзе дазваляюцца санітарныя і высечкі догляду, і лесагаспадарчую, дзе дазволены лесааднаўленчыя высечкі.

На Беларусі зялёныя вылучаюцца паводле пастаноў урада рэспублікі. Першыя створаны ў 1945 годзе вакол гарадоў Асіповічы, Бабруйск, Баранавічы, Барысаў, Брэст, Вілейка, Віцебск, Гомель, Гродна, Ліда, Мазыр, Маладзечна і Мінск. Агульная плошча зялёных зон склала 1,246 млн га (1994). Самая вялякія вакол Мінска, яе радыус складае да 80 км. Каля абласных цэнтраў зялёныя зоны радыусам да 30 км, раённых — 10 км. Праекты зялёных зон распрацоўваюцца БелНДІ праблем горадабудаўніцтва.

• Беларуская энцыклапедыя: У 18 т. Т. 7: Застаўка — Кантата / Рэдкал.: Г. П. Пашкоў і інш. — Мн. : БелЭн, 1998. — Т. 7. — 604 с. — 10 000 экз. — ISBN 985-11-0035-8. — ISBN 985-11-0130-3 (т. 7).