Зялёная сетка

Таварыства «Зялёная сетка»
Таварыства «Зялёная сетка»
Місія	Экалагічны рух для прыроды, чалавека і ўстойлівага развіцця Беларусі
Сфера дзейнасці	Прыродаахоўная дзейнасць, экалагічная асвета
Дата заснавання	6 лістапада 2007 года
Тып	Таварыства
Колькасць удзельнікаў	60 (19 экалагічных арганізацый і 41 індывідуальны ўдзельнік) (2018)
Сайт	greenbelarus.info

Таварыства «Зялёная сетка» — аб’яднанне грамадскіх экалагічных арганізацый, экспертаў і актывістаў Беларусі.

Рэалізуе сваю місію праз партнёрства грамадскіх аб’яднанняў і ініцыятыў, асветніцкую дзейнасць, узаемадзеянне з дзяржаўнымі, камерцыйнымі, навукова-даследчымі, рэлігійнымі і грамадскімі арганізацыямі, правядзенне грамадскіх кампаній, удзел у міжнародных прыродаахоўных працэсах і мерапрыемствах.

Заснаванне і мэты таварыства

Таварыства «Зялёная сетка» было заснавана 6 лістапада 2007 года і аб’яднала буйныя беларускія грамадскія экаарганізацыі і ініцыятывы, экспертаў і актывістаў^[2].

Стратэгічныя кірункі працы таварыства:

Абарона прыроды і садзейнічанне яе ўзнаўленню.
Прасоўванне ўдзелу грамадскасці ў прыняцці экалагічна істотных рашэнняў.
Развіццё грамадскага зялёнага руху ў Беларусі і рэгіёне УЕКЦА (Усходняй Еўропы, Каўказа і Цэнтральнай Азіі).

Дзейнасць «Зялёнай сеткі» абапіраецца на Хартыю Зямлі, прынцыпы устойлівага развіцця, справядлівасці, празрыстасці, дэмакратычнага ўдзелу, павагі да правоў чалавека і гендэрнай роўнасці. Арганізацыя супрацоўнічае з органамі грамадскага кіравання, акадэмічнай супольнасцю, грамадзянскай супольнасцю і бізнэсам.

Мэтай таварыства з’яўляецца вырашэнне канкрэтных экалагічных праблем Беларусі і паляпшэнне стану навакольнага асяроддзя ў цэлым.

На пачатак 2015 года ў «Зялёную сетку» ўваходзілі 44 члены: 12 экалагічных арганізацый і 32 індывідуальных ўдзельнікі^[1]. Арганізацыі і актывісты таварыства працуюць у Мінску, Гродне, Гомелі, Баранавічах, Брэсце і іншых гарадах Беларусі. У 2018 годзе таварыства налічвала 19 арганізацый і 41 індывідуальных удзельнікаў^[2].

Дзейнасць таварыства

Інфармацыйная пляцоўка (сайт) «Беларускі Зялёны Партал»;
Экалагічныя акцыі: «Гадзіна Зямлі», «Зробім!» Архівавана 13 лютага 2015., «Дзень без аўтамабіля», «Тыдзень мабільнасці», «Клімат, застанься!», «Дзень без пакупак» і інш.
Школа экалагічнага актывіста Архівавана 18 лістапада 2014.;
Грамадская экалагічная інспекцыя «Зялёны дазор»;
Кампанія ў абарону беларускіх балот;
Кампанія па захаванні клімату;
Кампанія па абароне гарадскіх насаджэнняў «Гарадскі ляснічы» Архівавана 13 лютага 2015.;
Кампанiя «Выратуем прыпяцкія дубровы!»;
Кампанія супраць сезонных выпальванняў травы;
Прававая экалагічная служба;
Школа экаюрыста Архівавана 18 лістапада 2014..

Міжнароднае супрацоўніцтва

«Зялёная сетка» з’яўляецца ўдзельнікам Форума грамадзянскай супольнасці (англ.) (бел. Усходняга партнёрства (ФГС УП) і Беларускай нацыянальнай платформы ФГС УП, а таксама шэрагу міжнародных экалагічных сетак: Climate Action Network, Global Action Plan і іншых.

Інфармацыйны партал

З 2007 года інфармацыйным інтэрнэт-рэсурсам таварыства з’яўляецца сайт «Беларускі Зялёны Партал», дзе акамулююцца актуальныя экалагічныя навіны Беларусі і ўсяго свету. Сайт з’яўляецца таксама пляцоўкай для камунікацыі — абмену інфармацыі, ідэй і экспертных меркаванняў. Таварыства «Зялёная сетка» працуе над стварэннем некамерцыйных экалагічных пляцовак у розных рэгіёнах Беларусі. Так, у лістападзе 2014 года запрацаваў «Зялёны партал Гродзенскай вобласці». Таксама свае рэдакцыі партала ёсць ў Бярэсці, Віцебску і Гомелі.

У цяперашні час доступ да рэсурсу «Беларускі Зялёны Партал» у Рэспубліцы Беларусь абмежаваны на падставе пункта 11 Палажэння аб парадку абмежавання доступу да інфармацыйных рэсурсаў (іх састаўных частак), размешчаных у глабальнай камп’ютарнай сетцы Інтэрнэт.