Кавалентная сувязь

Кавале́нтная су́вязь — тып хімічнай сувязі, якая ажыццяўляецца парай электронаў, агульных для двух атамаў. Абумоўлена наяўнасцю на валентных арбіталях атамаў (групы атамаў) няспараных электронаў.

У залежнасці ад колькасці агульных электронных пар паміж атамамі адрозніваюць простую кавалентную сувязь (адна электронная пара) і кратную сувязь.

Кавалентная сувязь паміж аднолькавымі атамамі (напрыклад, у малекуле вадароду Н₂, кіслароду О₂) з'яўляецца непалярнай, паміж рознымі (напрыклад, у малекуле вады Н₂О, аміяку NH₃) — палярнай. У выпадку непалярнай кавалентнай сувязі электронная шчыльнасць агульнай пары электронаў сіметрычна размеркавана адносна ядраў абодвух атамаў, а ў выпадку палярнай кавалентнай сувязі — зрушана да больш электраадмоўнага атама.

Асноўныя ўласцівасці кавалентнай сувязі:

• насычанасць (існаванне некаторай гранічнай колькасці двухцэнтравых двухэлектронных сувязей, якія ўтварае атам)
• накіраванасць у прасторы (вызначае прасторавую будову малекул, іонаў, радыкалаў).

• Беларуская энцыклапедыя: У 18 т. Т. 7: Застаўка — Кантата / Рэдкал.: Г. П. Пашкоў і інш. — Мн. : БелЭн, 1998. — Т. 7. — 604 с. — 10 000 экз. — ISBN 985-11-0035-8. — ISBN 985-11-0130-3 (т. 7).