Мікалай Леанідавіч Аўсянка

Мікалай Леанідавіч Аўсянка (нар. 1977, Мінск) — беларускі дыпламат.

У 1999 годзе скончыў Беларускі дзяржаўны ўніверсітэт^[1].

Сваю працоўную дзейнасць пачаў пасля заканчэння ВНУ. З 1999 года працаваў на розных пасадах Міністэрства замежных спраў Беларусі. З 1999 па 2002 гады — другі сакратар, першы сакратар упраўлення інфармацыі. У 2002 годзе стаў працаваць у пасольстве Беларусі ў ЗША на пасадзе другога сакратара. У ЗША прапрацаваў да 2005 года, пасля чаго быў прызначаны першым сакратаром, саветнікам упраўлення міжнароднай бяспекі і кантролю над узбраеннямі МЗС Беларусі. З 2009 па 2014 гады працаваў саветнікам Пастаяннага прадстаўніцтва Рэспублікі Беларусь пры ААН. З 2014 па 2016 гады — старшы саветнік упраўлення міжнароднай бяспекі і кантролю над узбраеннямі МЗС Беларусі. З 2018 па 2019 гады — начальнік аддзела міжнароднай бяспекі і кантролю над узбраеннямі галоўнага ўпраўлення шматбаковай дыпламатыі МЗС Беларусі^[1].

12 верасня 2019 указам Прэзідэнта Рэспублікі Беларусь Аляксандра Лукашэнка быў прысвоены дыпламатычны ранг Надзвычайнага і Паўнамоцнага Пасланніка другога класа. Гэтым жа ўказам ён быў прызначаны Надзвычайным і Паўнамоцным Паслом Рэспублікі Беларусь ў Рэспубліцы Эквадор і па сумяшчальніцтве ў Рэспубліцы Калумбія, Рэспубліцы Нікарагуа і Рэспубліцы Панама^[2][3]. 21 лютага 2019 года ўручыў даверчую грамату Прэзідэнту Эквадора Марэна Леніну^[4].

21 сакавіка 2022 года вызвалены з пасады пасла Беларусі ў Нікарагуа па сумяшчальніцтве^[5], 30 мая 2023 года — з пасады Надзвычайнага і Паўнамоцнага Пасла Беларусі ў Калумбіі і па сумяшчальніцтве ў Панаме і Эквадоры^[6].

Акрамя роднай мовы валодае англійскай і іспанскай мовамі^[1].

Жанаты, мае дачку і сына^[1].