Панцырнікавыя

Панцырнікавыя
Панцырнік даўгарылы (Lepisosteus osseus)
Навуковая класіфікацыя
прамежныя рангі Дамен:  Эўкарыёты Царства:  Жывёлы Падцарства:  Эўметазоі Без рангу:  Двухбакова-сіметрычныя Без рангу:  Другаснаротыя Тып:  Хордавыя Падтып:  Пазваночныя Інфратып:  Сківічнаротыя Клада:  Рыбы Надклас:  Касцявыя рыбы Клас:  Прамянёвапёрыя рыбы Падклас:  Навапёрыя рыбы Інфраклас:  Касцявыя ганоіды Надатрад:  Ginglymodi Атрад:  Панцырнікападобныя (Lepisosteiformes) Падатрад:  Lepisosteioidei Надсямейства:  Lepisosteoidea Сямейства:  Панцырнікавыя
Міжнародная навуковая назва
Lepisosteidae Cuvier, 1825
Сістэматыка на Віківідах Выявы на Вікісховішчы ITIS   161092 NCBI   7915 EOL   5468 FW   63030

Панцырнікавыя (Lepisosteidae) — сямейства ганоідных рыб, адзінае ў атрадзе панцырнікападобных.

Даўжыня звычайна ад 75 см да 3-4 м, маса можа дасягаць 150 кг і больш. Цела падоўжанае, пакрыта масіўнай рамбічнай ганоіднай луской, якая ўтварае панцыр (адсюль назва). Сківіцы выцягнутагай пысы (нагадвае рыла кайманаў) з магутнымі зубамі канічнай формы. Восевы шкілет цалкам акасцянелы, пярэдні канец пазванкоў выпуклы, задні — увагнуты. На галаве ёсць покрыўныя (скурныя) косці. Промняў жабернай перапонкі — 3. Спінны і анальны плаўнікі кароткія, адсунуты да хваставога плаўніка. Унутры верхняй лопасці хваставога плаўніка працягваецца восевы шкілет (гетэрацэркальны плаўнік). Пырскальца адсутнічае.

Сценкі ячэістага плавальнага пузыра, злучанага з глоткай, пранізаны крывяноснымі сасудамі, што дазваляе рыбінам, якія жывуць у вадзе з нізкай канцэнтрацыяй кіслароду, выкарыстоўваць для дыхання атмасферны кісларод. У кішачніку маецца недаразвіты спіральны клапан.

Вядомыя з позняга мелу. Налічваецца 7 сучасных відаў. Жывуць у прэсных вадаёмах Паўночнай і Цэнтральнай Амерыкі (ад Вялікіх азёр да Коста-Рыкі, на в. Куба); некаторыя віды заходзяць у саланаватыя і марскія воды.

Сустракаюцца звычайна ў мелкаводных раёнах з густой расліннасцю.

Асноўная пажыва — рыба; здабычу падсцерагаюць у схованцы і наганяюць у рэзкім кідку. Могуць працяглы час ляжаць нерухома ў тоўшчы вады ці на яе паверхні.

Нераст у прэсных водах на мелкаводдзі.

Прамысловага значэння не маюць.

Для паляпшэння артыкула пажадана Паставіць зноскі з дакладнейшым указаннем крыніцы.

• Ганоіды // Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — 576 с. — 10 000 экз. — ISBN 985-11-0035-8. — ISBN 985-11-0090-0 (т. 5).