Прынцып тоеснасці

Пры́нцып то́еснасці — фундаментальны прынцып квантавай механікі, паводле якога тоесныя часціцы пры квантавамеханічным апісанні іх станаў лічацца прынцыпова неадрознымі. Гэта азначае, што станы фізічнай сістэмы, якія адрозніваюцца перастаноўкамі тоесных часціц, лічацца адным станам. У адрозненне ад класічнай механікі, дзе за кожнай часціцай можна прасачыць па яе траекторыі, у квантавай механіцы паняцце траекторыі адсутнічае і тоесныя часціцы страчваюць сваю індывідуальнасць.

З прынцыпу тоеснасці вынікае, што сістэма тоесных базонаў павінна апісвацца поўнасцю сіметрычнымі (адносна перастановак каардынат і спінавых пераменных), а сістэма тоесных ферміёнаў — поўнасцю антысіметрычнымі хвалевымі функцыямі.

З прынцыпу тоеснасці вынікае таксама існаванне ў сістэмах тоесных часціц спецыфічных квантава-механічных абменных эфектаў, напрыклад, абменнага ўзаемадзеяння.

• Тоесныя часціцы
• Прынцып Паўлі

• Тоеснасці прынцып // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. С. 481.