Цытаспароз

Цытаспароз — некрозна-ракавае грыбковае захворванне, якое выклікае ўсыханне пладовых і лясных дрэвавых парод^[1]. Выклікаецца грыбам з роду цытаспора (Cytospora)^[2].

Цытаспарозам пашкоджваюцца дрэвы і хмызнякі семечкавых парод, аслабленыя ў выніку падмярзання, засухі, сонечных апёкаў, несвоечасовай абрэзкі і т.д. Цытаспароз выклікае засыханне асобных участкаў кары, затым надыходзіць гібель асобных галін і цэлых дрэў. На пашкоджаных участках кара набывае чырванавата-карычневы колер. Пры спробе аддзяліць яе ад драўніны яна не адслойваецца, а раскудзельваецца. На ўсёй паверхні пашкоджанай кары бачныя дробныя чорныя грудкі (пікніды) з скапленнямі спор грыба^[3].

Прафілактычныя мерапрыемствы: павышэнне зімаўстойлівасці дрэў і іх супраціўляльнасці захворванню. Пабел позняй восенню штамбаў і асноўных галін вапнай. Абарона раслін ад механічных пашкоджанняў. Своечасовая і правільная абрэзка дрэў з выдаленнем пашкоджаных галін.

Лячэбныя мерапрыемствы: выразка вострым нажом пашкоджаных участкаў кары да драўніны, Дэзінфекцыя ран 1-2%-ным растворам меднага купарваса або жалезнага купарваса і абкітоўка іх садовым варам^[4].

• Корчагин В. Н. Защита растений от вредителей и болезней на садово-огородном участке. — М.: Агропромиздат, 1987. — 317 с.