Atenti en London e Glasgow en junio 2007 Ye la 29ma di junio 2007 du teroristal atenti preventesis en London. La dio sequanta, la 30ma di junio 2007 atento en Glasgow fiaskis. London, la 29ma di junioFrue en la matino di 29 junio bombautomobilo hazarde deskovresis da pasant ambulanco. L'automobilo garesis avan nokto-klubo en Haymarket. La kruo dil ambulanco vidis fumuro en l'automobilo pos qua li avertis la polico. La polico baris l'aceso a la cirkumajo. Pos exploro konkluzesis ke l'automobilo, Mercedes 300SE, kontenis kelka cilindri de propran-gaso e benzinuyo kun 60 litri de benzino e granda quanteso de klovi. La gaso e materiali forigesis, l'automobilo fortranesis por judicial exploro. Plu tarde la sama dio la polico trovis altra suspektit automobilo, anke Mercedes, simila bombautomobilo, pos qua la polico alarmigis la populo esar vigilant e kalma pro serioza minaco di atenti. Glasgow, la 30ma di junioLa 30ma di junio eventis incidento sur l'Internaciona Aeroportuo di Glasgow: Jeep Cherokee envehis per granda rapideso halo 1 ed incendieskis. Segun la polico esis intencit ago. L'ago produktis un vundito: la duktinto dil automobilo. Il esis aceptita kun grava brul-vunduri en la hospitalo, altra persono arestesis. La polico di Britania konsideris l'incidento kom fiaskint atento. La 3ma di agosto 2007 la vundita duktinto, Kafil Amed, mortis en la hospitalo pos esir en komato dum kelka tempo. |
Portal di Ensiklopedia Dunia
