ល្បែងរាវបង្កងល្បែងរាវបង្កងជាល្បែងប្រជាប្រិយមួយប្រភេទដែលប្រជាជនខ្មែរតែងតែនិយមលេងក្នុងថ្ងៃបុណ្យចូលឆ្នាំប្រពៃណីជាតិ ល្បែងរាវបង្កងភាគច្រើនគេលេងនៅពេលរាត្រីខែភ្លឺ ហើយចំនួនអ្នកលេងគឺមិនកំណត់នោះទេ។ ល្បែងនេះគេលេងមានលក្ខណៈខុសគ្នាបន្តិចបន្តួចទៅតាមតំបន់។[១] របៀបលេងជាដំបូង គេត្រូវជ្រើសរើសសមាជិកលេងជាមុនសិន ចំនួនសមាជិកគឺមិនកំណត់ចំនួនឡើយ។ បន្ទាប់មកគេក៏ចាប់ផ្ដើមជ្រើសរើសយកមនុស្ស២នាក់ ម្នាក់ធ្វើជាអ្នករាវបង្កង ម្នាក់ទៀតធ្វើជាបង្កង(ភាគច្រើនគេជ្រើសរើសយកប្រុសម្នាក់ស្រីម្នាក់)។ បន្ទាប់មកទៀត គេនឹងយកក្រមាចងភ្នែកអ្នកទាំង២មិនឲ្យមើលឃើញអ្វីឡើយ។ អ្នកដែលដើរតួជាបង្កងគេឲ្យកាន់ត្រឡោកឬបំពង់ឬស្សី ចំនែកអ្នករាវបង្កងគឺគ្មានកាន់អ្វីទាំងអស់។ អ្នកលេងទាំងអស់គ្នាឈរជារង្វង់(ទុកទីធ្លាធំទូលាយ) ចំនែកមនុស្ស២នាក់ដែលត្រូវបានជ្រើសរើសគឺចាប់ផ្ដើមលេងនៅកណ្ដាលវង់។ នៅពេលម្នាក់ដែលដើរតួជាបង្កងចាប់ផ្ដើមគោះត្រឡោកឬបំពង់ឬស្សីហើយ ត្រូវតែរហ័សគេចខ្លួនពីទីតាំងដែលកំពុងឈរ ហើយសំលេងគោះហ្នឹងនឹងឮដល់អ្នករាវបង្កង នៅពេលនោះអ្នករាវបង្កងនឹងស្ទុះទៅចាប់ឱបតាមប្រភពសំលេងផងដែរ ។បើសិនជា អ្នករាវបង្កងចាប់បាន នោះអ្នករាវបង្កងឈ្នះ ហើយមានសិទ្ធឲ្យអ្នកចាញ់ធ្វើកាយវិការសត្វអ្វីដែលខ្លួនចង់ឲ្យធ្វើបានតាមចិត្ត។ បើសិនជា អ្នករាវបង្កងចាប់មិនបាននោះអ្នករាវបង្កងចាញ់ ហើយអ្នកដើរតួជាបង្កងមានសិទ្ធឲ្យអ្នករាវធ្វើកាយវិការសត្វអ្វីដែលខ្លួនចង់ឲ្យធ្វើតាមចិត្ត។ គេលេងបែបនេះដដែលៗដោយពីមួយគូទៅមួយគូ រហូតដល់ឈប់លេង។ ល្បែងនេះ ជាការហាត់ត្រចៀកអោយស្ទាត់ ក្នុងការស្ដាប់សំលេង និង មានស្មារតីរឹងប៉ឹង រហ័សដៃជើងផងដែរ ៕
|
Portal di Ensiklopedia Dunia
