Ден на независноста (САД)

Ден на независноста (англиски: Independence Day, разговорно Четврти јули, Fourth of July) — федерален празник во Соединетите Американски Држави (САД) во чест на Декларацијата за независност, ратификувана од Вториот континентален конгрес на 4 јули 1776 година, со што се основани Соединетите Американски Држави.

Делегатите на Вториот континентален конгрес прогласиле дека Тринаесетте колонии повеќе не се потчинети на монархот на Британија, кралот Џорџ III, и дека сега се обединети, слободни и независни држави.^[1] Конгресот гласал да ја одобри независноста со усвојување на Лиовата резолуција на 2 јули и ја усвоил Декларацијата за независност два дена подоцна, на 4 јули.

Денот на независноста најчесто се поврзува со огномети, паради, скари, карневали, саеми, излети, концерти, бејзбол игри, семејни собири, политички говори и церемонии, како и разни други јавни и приватни настани кои ја слават историјата, владата и традициите на Соединетите Американски Држави. Денот на независноста е национален празник на САД.^[2]^[3]^[4]