Диелектрична спроводливост

Диелектрична спроводливост, пермитивност (од латински: permittere: допушта), диелектрична пермитивност или диелектричност со ознака ε (епсилон) - физичка величина која го опишува влијанието на диелектрикот на меѓусебното делување на електричните полнежи. Ако електричните полнежи се точкести и растојанието меѓу нив е постојано, електричната сила меѓу нив е обратнопропорционална на диелектричната спроводливост (Кулонов закон). Може да се дефинира како константа на односот:

${\displaystyle \varepsilon ={\frac {D}{E}}}$

каде:

• D е вектор на електричната индукција, а
• E е вектор на јачината на електричното поле.

Мерна единица за диелекрична спроводливост е фарад на метар (F/m).

Диелектричната спроводливост може да се прикаже и како:

${\displaystyle \varepsilon =\varepsilon _{\text{r}}\cdot \varepsilon _{0}}$

каде:

• ε_r е релативна диелектрична спроводливост на материјалот на диелектрикот, и
• ε₀ = 8,8541878176.. × 10⁻¹² F/m е диелектрична константа во вакуум.

Кулоновиот закон е еден од основните закони на електростатиката кој го утврдил Шарл-Огистен де Кулон во 1785 година: "Електричната сила F меѓу два точкести електрични полнежи (одбивна или привлечна, зависно од тоа дали телата се со еднакви или спротивни електрични полнежи) е пропорционална на количините на електричен полнеж q, а обратнопропорционална на квадратот на растојанието r меѓу двете тела. " (напомена: важи само во вакуум)

${\displaystyle F={\frac {1}{4\cdot \pi \cdot \varepsilon _{0}}}\cdot {\frac {q_{1}\cdot q_{2}}{r^{2}}}}$

каде:

• ε₀ е диелектрична спроводливост во вакуум. Силата е најјака во вакуум, а послаба во сите други медиуми:

${\displaystyle F={\frac {1}{4\cdot \pi \cdot \varepsilon }}\cdot {\frac {q_{1}\cdot q_{2}}{r^{2}}}={\frac {1}{\varepsilon _{r}}}\cdot {\frac {1}{4\cdot \pi \cdot \varepsilon _{0}}}\cdot {\frac {q_{1}\cdot q_{2}}{r^{2}}}}$

каде:

• ε _r е релативна диелектрична спроводливост на материјалот,
• ε е диелектрична спроводливост на материјалот.

Диелектрик или изолатор е материјал или медиум кој не ја спроведува електричната струја, т.е. вакуум или материјал кој содржи занемарлив број на слободни електрони и јони кои можат да се движат под влијание на надворешно електрично поле, односно секој материјал чија електрична отпорност е поголема од 10⁸ Ωm. Електричната отпорност на килибарот е поголема од 10¹⁶ Ωm, на парафинот, сумпорот и стаклото е поголема од 10¹⁴ Ωm.

• Electromagnetism Архивирано на 3 јуни 2011 г., a chapter from an online textbook
• What's all this trapped charge stuff . . ., A different approach to some capacitor problems
• Complex Permittivites of Metals Архивирано на 4 март 2016 г., Plots of the complex permittivity and refractive index for many different metals.
• DrudeLorentz.com Архивирано на 30 јули 2021 г. Online plotting and parameterisation database of the Drude-Lorentz permittivity models of common metals