ОУ „Јашар-бег Скопски“ - Чаир

Основно училиште „Јашар-бег Скопски“^[1] (во минатото: Основно училиште „Јане Сандански“; официјално: Основно општинско училиште „Јашар-бег Скопски“ - Чаир; скратено: ООУ „Јашар-бег Скопски“) — централно основно училиште во скопската населба Дуќанџик, Општина Чаир.^[2]

Денес, училиштето е именувано по некогашниот градоначалник на Скопје Јашар-бег Кумбараџи, додека во минатото било именувано по македонскиот револуционер, Јане Сандански.

Во 2012 година, Општина Чаир донела одлука за преименување на четири основни училишта, меѓу кои и училиштето „Јане Сандански“ во „Јашар-бег Скопски“ („Јашар Беј Шкупи“), но Управниот инспекторат се противел на одлуката поради непочитување на Бадентеровото мнозинство при носењето на одлуката во советот на општината.^[3] Сепак, во 2021 година, Министерството за образование и наука ги прифатило преименувањата. На 5 мај 2021 година, Уставниот суд не повел постапка за оценување на уставноста и законитоста на донесената одлука од 2012 година.^[4]

Училиштето „Јане Сандански“ е основано во 1957 година и во него учат околу 600 ученици, на македонски, албански и на турски наставен јазик.