Персеј и Андромеда (Тицијан) Персеј и Андромеда ― слика од италијанскиот ренесансен уметник Тицијан, денес се наоѓа во Волесовата збирка во Лондон. Нацртана е во 1554–1556 година како дел од серијата митолошки слики наречени „poesie“ („поезија“) наменети за кралот Филип II од Шпанија. Сликите позајмуваат тематика од Метаморфози од римскиот поет Овидиј; за оваа слика од Книга IV, редови 663–752, [1] и сите прикажувале женски актови. Сликата е со масло на платно, со димензии 175 x 189,5 см. Во 1605 година, веројатно била веќе опишана како „оштетена“, а потоа била дополнително оштетувана.[2] Сликата го прикажува Персеј како лета во воздух додека се бори да го убие морското чудовиште кое дошло да ја убие Андромеда, која поради чудовиштето е окована на карпа крај морскиот брег. Персеј веќе го нападнал и го ранил чудовиштето на рамото.[3] Сликата често патувала; насликана е во Венеција, била испорачана во денешна Белгија, а потоа била во Шпанија, Италија, Англија и Франција и на крај се вратила во Англија. Предмет и извори Во грчката митологија, кралството Етиопија било управувано од прекрасната, но суетна кралица Касиопеја; која тврдела дека нејзината убавина и убавината на нејзината ќерка Андромеда ја надминува убавината на морските нимфи, кои биле ќерки на Посејдон, богот на морето. Кога нимфите разбрале за таквите тврдења, се пожалиле кај нивниот татко, кој се одмаздил со тоа што повикал морското чудовиште Кет да го опустоши крајбрежјето на Етиопија. По совет на Јупитер, кралицата, заедно со нејзиниот сопруг Кефеј, решила да ја жртвува својата ќерка Андромеда на чудовиштето.[3] Персеј, откако ја убил горгоната Медуза, го убил и чудовиштето и ја спасил Андромеда, со која потоа се оженил.[3] Тицијан прилично внимателно го следел Овидиј, но веројатно е дека неговиот латински бил слаб, и претежно се потпирал на поедноставени верзии на италијански, кои му биле достапни. Ова може да ги објасни разликите од латинскиот оригинал, иако Тицијан можеби слободно ја толкувал приказната. Кај Овидиј родителите на Андромеда се во близина; веројатно на брегот спроти некој град. Андромеда стои меѓу морски школки и корали. Коралот е спомнат од Овидиј, но дека е формиран од крвта на Медуза. Овидиј Андромеда ја опишува дека изгледа како статуа и дека плаче; сликата на Тицијан се совпаѓа со ова. [3] Меркур на Персеј му го дал својот закривен меч, а Минерва нејзиниот штит. Исто како Меркур, Персеј носи обувки со крила, а носи и шлем со крила.[4] НаводиИзвори
|
Portal di Ensiklopedia Dunia
