മാർത്തോമ്മ സുറിയാനി സഭയുടെ പരമാധ്യക്ഷനായിരുന്നു അലക്സാണ്ടർ മാർത്തോമ്മ മെത്രാപ്പോലീത്ത. മാർത്തോമ്മ ശ്ലീഹായുടെ മലങ്കര സിംഹാസനം 17-ആം നൂറ്റാണ്ടിൽ പുനസ്ഥാപിച്ചതിനു ശേഷമുള്ള 19-ആം മാർത്തോമ്മ ആണ് അദ്ദേഹമെന്ന് കണക്കാക്കപ്പെടുന്നു. പത്തനംതിട്ട ജില്ലയിലെ കുറിയന്നൂരിൽ മാളിയേക്കൽ റവ. എം.സി.ജോർജ്- ഏലിയാമ്മ ദമ്പതികളുടെ മകനായി 1913 ഏപ്രിൽ 10ന് അദ്ദേഹം ജനിച്ചു. എം ജി ചാണ്ടി എന്നായിരുന്നു അദ്ദേഹത്തിന്റെ പൂർവനാമം. എറണാകുളം മഹാരാജാസ് കോളജ്, ആലുവ യൂണിയൻ ക്രിസ്ത്യൻ കോളജ്, ബാംഗ്ലൂർ യുണൈറ്റഡ് തിയോളജിക്കൽ കോളജ് എന്നിവിടങ്ങളിലായി വിദ്യാഭ്യാസം പൂർത്തിയാക്കി. 1946ൽ വൈദികനായി തിരഞ്ഞെടുക്കപ്പെട്ട അദ്ദേഹം 1953ൽ അലക്സാണ്ടർ മാർ തെയോഫിലോസ് എന്ന സ്ഥാനനാമത്തോടെ എപ്പിസ്കോപ്പ ആയി ഉയർത്തപ്പെട്ടു. 1976 ഒക്ടോബർ 23-ആം തീയതിയാണ് അദ്ദേഹം മാർത്തോമ്മ മെത്രാപ്പോലീത്ത സ്ഥാനത്തേക്ക് ഉയർത്തപ്പെട്ടത്. 1999-ൽ പിഗാമിയായി ഡോ ഫിലിപ്പോസ് മാർ ക്രിസോസ്റ്റം മാർത്തോമായെ വാഴിച്ചു മാർത്തോമാ സഭയുടെ വലിയ മെത്രാപൊലീത്ത ആയി. 2000 ജനുവരി 11-ആം തീയതി അദ്ദേഹം അന്തരിച്ചു. തിരുവല്ലയിലാണ് അദ്ദേഹത്തെ കബറടക്കിയിരിക്കുന്നത്.
