ഇന്ദിര അനന്ത് മായ്ദേവ്

ഇംഗ്ലീഷ് വിലാസം

https://ml.wikipedia.org/wiki/Indira_Anant_Maydeo

ഇന്ത്യൻ നാഷണൽ കോൺഗ്രസ് പ്രവർത്തകയും സ്വാതന്ത്ര്യസമര പ്രവർത്തകയുമായിരുന്നു ഇന്ദിര അനന്ത് മായ്ദേവ്. ഒന്നാം ലോകസഭയിൽ പൂനെ സൗത്ത് മണ്ഡലത്തെ പ്രതിനിധീകരിച്ചു.

1903 സെപ്തംബർ 7 നാണ് ഇന്ദിര ജനിച്ചത്. പൂനെയിലെ ഫെർഗൂസൻ കോളേജിൽ നിന്ന് ബിരുദം നേടി ^[1].

ഇന്ത്യൻ സ്വാതന്ത്ര്യ സമരത്തിൽ അവർ സജീവമായി പങ്കെടുത്തിരുന്നു. 1933 ൽ ഹരിജൻ സേവക് സംഘത്തിന്റെ മഹാരാഷ്ട്ര ഘടകത്തിൽ അംഗമായി. പുനെയിൽ (പിന്നീട് ബോംബെ സംസ്ഥാനത്ത്) പാർട്ടിയുടെ ഏറ്റവും പ്രമുഖ വനിത അംഗമായിരുന്നു. സ്വതന്ത്ര ഇന്ത്യയുടെ ആദ്യ പൊതു തിരഞ്ഞെടുപ്പ് നടന്നപ്പോൾ പൂനെ സൗത്ത് നിയോജകമണ്ഡലത്തിലെ ഔദ്യോഗിക സ്ഥാനാർത്ഥി ആയി ^[2][3]. സോഷ്യലിസ്റ്റ് പാർട്ടി സ്ഥാനാർത്ഥി ശ്രീധർ ലിമെയെ പരാജയപ്പെടുത്തി. മണ്ഡലത്തിലെ 64% വോട്ടുകളാണ് അവർ സ്വന്തമാക്കിയത്. ഈ റെക്കോർഡ് ഇന്നും നിലനിൽക്കുന്നു ^[2]. പാർലമെന്റ് അംഗമെന്ന നിലയിൽ, ലോകസഭയിൽ വിവാഹമോചനവുമായി ബന്ധപ്പെട്ട ഒരു ബിൽ കൊണ്ടുവന്നിരുന്നുവെങ്കിലും അത് ചർച്ച ചെയ്യാതെ പോയി ^[4]. 1952 ൽ നാഷണൽ സ്റ്റുഡന്റ്സ് യൂണിയൻ ഓഫ് ഇന്ത്യയുടെ പ്രസിഡന്റായി ^[1].

1927 ൽ അനന്ദ് ഗോവിന്ദ് മായ്ദേവിനെ ഇന്ദിര വിവാഹം കഴിച്ചു. ഈ ദമ്പതികൾക്ക് ഒരു മകനും മൂന്നു പെൺമക്കളും ആണുള്ളത്^[1].