ഇബ്രാഹിം വെങ്ങര

ഇംഗ്ലീഷ് വിലാസം

https://ml.wikipedia.org/wiki/Ibrahim_Vengara

നാടകകൃത്ത്, നാടക, ചലച്ചിത്ര നടൻ എന്നീ നിലകളിൽ പ്രശസ്തനാണ്‌ ഇബ്രാഹിം വെങ്ങര.

1941 ഓഗസ്റ്റ് 1 ന്‌ കണ്ണൂർ ജില്ലയിലെ വെങ്ങര എന്ന പ്രദേശത്ത് സൈതം മാടത്ത് ആലിക്കുഞ്ഞിയുടേയും ആമിനായുടേയും മകനായി ജനിച്ചു. 50ൽ പരം റേഡിയോ നാടകങ്ങൾ, 25ൽ കൂടുതൽ നാടകങ്ങൾ, 20ഓളം ഏകാങ്കനാടകങ്ങൾ എന്നിവ രചിച്ചിട്ടുണ്ട്^[1].വെങ്ങര മാപ്പിള യു.പി. സ്‌കൂളിൽ ചേർന്ന് പഠനം ആരംഭിച്ചെങ്കിലും രണ്ടുവർഷംകൊണ്ട് പഠനം മുടങ്ങി. പിന്നീട് തളിപ്പറമ്പ് പബ്ലിക് ലൈബ്രറിയുടെ ആഭിമുഖ്യത്തിൽ നടന്നുവന്നിരുന്ന വയോജന വിദ്യാലയത്തിൽ നിന്നാണ് മലയാളം എഴുതാനും വായിക്കാനും പഠിച്ചത്. 13-ാം വയസ്സിൽ നാടുവിട്ടു. ഇന്ത്യയുടെ വിവിധ ഭാഗങ്ങളിൽ ചെയ്യാവുന്ന ജോലികളെല്ലാം ചെയ്തുജീവിച്ചു. 1962 മുതൽ നാടകപ്രസ്ഥാനവുമായി ബന്ധപ്പെട്ടു.

ആദ്യനാടകമായ ആർത്തി 1965ൽ അഖില കേരള നാടകമത്സരത്തിൽ ഒന്നാം സമ്മാനം നേടുകയുണ്ടായി. തൃശൂർ ശില്പി, കോഴിക്കോട് സംഗമം എന്നീ നാടകസമിതികളിൽ പ്രവർത്തിച്ചിട്ടുണ്ട്. ഭൂതവനം എന്ന നാടകം രചിച്ചതിന്‌ അടിയന്തരാവസ്ഥക്കാലത്ത് ജയിൽവാസം അനുഭവിച്ചിട്ടുണ്ട്^[1]. 1989-'90, 1992-'93 കാലഘട്ടങ്ങളിൽ ആകാശവാണിയുടെ ആഭിമുഖ്യത്തിൽ നടന്ന റേഡിയോനാടകമത്സരങ്ങളിൽ ഏഴിൽ ചൊവ്വ, ഉപഹാരം എന്നീ നാടകങ്ങൾക്ക് ഒന്നാം സ്ഥാനം ലഭിച്ചിട്ടുണ്ട്. ഈ നാടകങ്ങൾ ഭാരതത്തിലെ 14 ഭാഷകളിൽ വിവർത്തനം ചെയ്യുകയും പ്രക്ഷേപണം നടത്തുകയും ചെയ്തു^[1] കേരള സംഗീതനാടക അക്കാദമി അംഗം, പുരോഗമന കലാസാഹിത്യ സംഘംസംസ്ഥാന സമിതി അംഗം, കോഴിക്കോട് ആകാശവാണിയിൽ പരിപാടികളുടെ ഉപദേശകസമിതി അംഗം, കേരള ഡ്രാമാ വർക്കേഴ്സ് വെൽഫെയർ അസോസിയേഷൻ സംസ്ഥാന സമിതി അംഗം, സ്വാതന്ത്ര്യ സുവർണ്ണജൂബിലി സംസ്ഥാന സമിതി അംഗം എന്നീ നിലകളിൽ പ്രവർത്തിച്ചിട്ടുണ്ട്^[1].

• ആർത്തി (1965)- അഖില കേരള നാടക മത്സരത്തിൽ ഒന്നാം സ്ഥാനം.
• വാൽമീകം (1971)- തുഞ്ചൻ നാടക മത്സരത്തിൽ 3 ഒന്നാം സമ്മാനങ്ങൾ.
• ഉത്തരം (1982)- തുഞ്ചൻ അവാർഡ്.
• ഏഴിൽ ചൊവ്വ(1989-'90)- ആകാശവാണി റേഡിയോ നാടകരചനാമത്സരത്തിൽ ഒന്നാം സ്ഥാനം.
• ഉപഹാരം(1992-'93)- ആകാശവാണി റേഡിയോ നാടകരചനാമത്സരത്തിൽ ഒന്നാം സ്ഥാനം, 1995ൽ നാനാ അവാർഡ്.
• പടനിലം(1994)- സംസ്ഥാന പ്രൊഫഷണൽ നാടകമത്സരത്തിൽ രണ്ടാം സ്ഥാനം. 1995-'96ൽ ശക്തി അവാർഡ്, 1996ൽ കോഴിക്കോട് ഈസ്റ്റ് റോട്ടറിക്ലബ്ബ് അവാർഡ്.
• മാളിക വീട് - നാനാ ഗ്യാലപ് പോൾ അവാർഡ്.
• രാജസഭ - കേരള സാഹിത്യ അക്കാഡമി അവാർഡ്^[2][3]. സംസ്ഥാന നാടകമത്സരത്തിൽ 5 ഒന്നാം സ്ഥാനം. ആര്യ അവാർഡ്, ശ്രീമൂലനഗരം അവാർഡ്.
• ഒരിതിഹാസകാവ്യം- കൊല്ലം ഫാസ് അവാർഡ്.

1. ↑ ^{1.0 1.1 1.2 1.3} "ഇബ്രാഹിം വെങ്ങരയെക്കുറിച്ച്". Archived from the original on 2008-01-07. Retrieved 2007-12-10.
2. ↑ "ആർക്കൈവ് പകർപ്പ്". Archived from the original on 2012-08-09. Retrieved 2012-07-27.
3. ↑ കേരള സാഹിത്യ അക്കാദമി പുരസ്കാരം ലഭിച്ച നാടകങ്ങൾ.

ജീവചരിത്രവുമായി ബന്ധപ്പെട്ട ഈ ലേഖനം അപൂർണ്ണമാണ്‌. ഇതു വികസിപ്പിക്കുവാൻ സഹായിക്കുക.