ജമ്മു കശ്മീരിന്റെ പതാക (1952–2019)

**ജമ്മു കശ്മീരിന്റെ പതാക**
ഉപയോഗം	State flag
സ്വീകരിച്ചത്	1952

ഇന്ത്യൻ ഭരണഘടനയുടെ ആർട്ടിക്കിൾ 370 പ്രകാരം ജമ്മു കശ്മീരിന് ഇന്ത്യയുടെ ദേശീയ പതാകയ്‌ക്കൊപ്പം സ്വന്തം സംസ്ഥാന പതാക ഉയർത്താൻ അനുവാദം നൽകിയിരിക്കുന്നു. ഇന്ത്യൻ ഭരണഘടന പ്രകാരം സംസ്ഥാനത്തിന്റെ പ്രത്യേക പദവി കാരണമാണ് സ്വന്തമായി പതാക അനുവദിക്കപ്പെട്ടത്. ^[1]

2019 ഓഗസ്റ്റ് 5 ന് ഇന്ത്യൻ ഭരണഘടനയുടെ ആർട്ടിക്കിൾ 370 റദ്ദാക്കിയതോടെ പതാകയ്ക്ക് ഔദ്യോഗിക പദവി നഷ്ടപ്പെട്ടു. ^[2]

ചരിത്രം

1931 ജൂലൈ 13 ന് ശ്രീനഗറിൽ നടന്ന സംഭവങ്ങളാണ് പതാകയുടെ ഉത്ഭവത്തിന് കാരണമായത്. ഡോഗ്ര ഭരണാധികാരികൾക്കെതിരായ പ്രകടനത്തിനിടെ പോലീസ് വെടിയുതിർക്കുകയും 21 പേർ കൊല്ലപ്പെടുകയും ചെയ്തു. ഇരകളിലൊരാളുടെ രക്തക്കറ പുരണ്ട കുപ്പായം കശ്മീരിലെ പുതിയ പതാകയായി കാണികൾ ഉയർത്തുകയും ജൂലൈ 13 രക്തസാക്ഷി ദിനമായി പ്രഖ്യാപിക്കുകയും ചെയ്തു. ജൂലൈ 13 ജമ്മു കാശ്മീരിന്റെ ഔദ്യോഗിക അവധി ദിനമാണ്.

1939 ജൂലൈ 11 ന് ജമ്മു-കാശ്മീരിലെ ഒരു പ്രബല രാഷ്ട്രീയ കക്ഷിയായ നാഷണൽ കോൺഫറൻസ് എന്ന രാഷ്ട്രീയ പാർട്ടിയാണ് ഔദ്യോഗിക പതാകയായി ഇത് സ്വീകരിച്ചത്. 1952 ജൂൺ 7 ന് ജമ്മു കശ്മീരിലെ ഭരണഘടനാ അസംബ്ലി പാസ്സാക്കിയ പ്രമേയം അനുസരിച്ച് ഇത് സംസ്ഥാനത്തിന്റെ ഔദ്യോഗിക പതാകയാക്കി. അതേസമയം, നെഹ്‌റുവും ഷെയ്ഖ് അബ്ദുല്ലയും തമ്മിലുള്ള ദില്ലി കരാർ പ്രകാരം ഇന്ത്യയുടെ പതാകയ്ക്ക് ജമ്മു കശ്മീരിലും മറ്റ് രാജ്യങ്ങളിലെന്നപോലെ സമാന പദവിയുണ്ട്. ^[3]

പ്രതീകാത്മകത

പതാകയുടെ നിറം ചുവപ്പാണ്. ഇത് യഥാർത്ഥത്തിൽ 1931 ജൂലൈ 13 ലെ രക്തസാക്ഷിത്വത്തെ പ്രതിനിധാനം ചെയ്യുന്നു. പക്ഷേ പിന്നീട് ഇത് തൊഴിലാളികളുടെ പ്രതീകമായിമാറി. മധ്യത്തിലെ വെളുത്ത കലപ്പ കൃഷിക്കാരെ പ്രതീകപ്പെടുത്തുന്നു. കലപ്പയുടെ അടുത്തായുള്ള, ലംബമായ മൂന്ന് വെളുത്ത വരകൾ യഥാക്രമം ജമ്മു, കശ്മീർ, ലഡാക്ക് എന്നീ മൂന്ന് പ്രദേശങ്ങളെ പ്രതിനിധീകരിക്കുന്നു.