ജി.എസ്. കൃഷ്ണൻ

ഇംഗ്ലീഷ് വിലാസം

https://ml.wikipedia.org/wiki/Guruvayur_S._Sreekrishnan

പുല്ലാങ്കുഴൽ വിദഗ്ദ്ധനും സംഗീതജ്ഞനുമായിരുന്നു ഗുരുവായൂർ എസ്. ശ്രീകൃഷ്ണൻ (1934 - 2019 സെപ്റ്റംബർ 1). എണ്ണൂറിലധികം ലളിതഗാനങ്ങൾക്കും ഭക്തിഗാനങ്ങൾക്കും ഇദ്ദേഹം സംഗീതം നൽകിയിട്ടുണ്ട്. രാജ്യമെമ്പാടും പുല്ലാങ്കുഴൽ കച്ചേരി നടത്തിയിട്ടുണ്ട്. കേരള സംഗീത നാടക അക്കാദമി അവാർഡ് ലഭിച്ചിട്ടുണ്ട്.^[1]

1934-ൽ ക്ഷേത്രനഗരമായ ഗുരുവായൂരിൽ ശങ്കരനാരായണയ്യർ-കനകാംബാൾ ദമ്പതികളുടെ മകനായി ജനിച്ച ശ്രീകൃഷ്ണനെ അമ്മ കനകാംബാളാണ് സംഗീതത്തിലേക്ക് നയിച്ചത്. എൻ. കൃഷ്ണഭാഗവതർ, കെ.വി. രാമചന്ദ്രഭാഗവതർ എന്നിവരിൽ നിന്നും പുല്ലാങ്കുഴലിൽ പ്രാഥമിക പരിശീലനം നേടി. എട്ടാം വയസ്സിൽ ആദ്യമായി പൊതുപരിപാടി അവതരിപ്പിച്ചു. 1954-ൽ ഓൾ ഇന്ത്യാ റേഡിയോയിൽ ജോലിയിൽ പ്രവേശിച്ച ശ്രീകൃഷ്ണൻ 1994ൽ സ്റ്റേഷൻ ഡയറക്ടറായി വിരമിച്ചു. 2019 സെപ്റ്റംബർ 1-ന് 85-ആം വയസ്സിൽ അന്തരിച്ചു.

ശ്രീകൃഷ്ണന് 1985-ൽ കേരള സംഗീത നാടക അക്കാദമി അവാർഡ് ലഭിച്ചിട്ടുണ്ട്. 1997-ൽ കേരള സംഗീത നാടക അക്കാദമിയുടെ ഫെലോഷിപ്പ് ലഭിച്ചു. 2001-ൽ ഗുരുവായൂരപ്പൻ പുരസ്‌കാരവും ലഭിച്ചു.

'നാഴിയുരിപ്പാലുകൊണ്ട് നാടാകെ കല്യാണം' എന്ന ഗാനത്തിലൂടെ പ്രശസ്തയായിരുന്ന ഗായത്രി ശ്രീകൃഷ്ണനായിരുന്നു ഭാര്യ. ഇവർ 2019 ജൂണിൽ അന്തരിച്ചു. പുല്ലാങ്കുഴൽ വിദഗ്ദ്ധനും സംഗീതജ്ഞനുമായ ജി.എസ്. രാജൻ, ഭരതനാട്യം നർത്തകിയും നാടകപ്രവർത്തകയുമായ സുജാതാ ദാസ് എന്നിവർ മക്കളാണ്.