കേരളത്തിലെ ഒരു രാഷ്ട്രീയ പ്രവർത്തകനും മുൻ നിയമസഭാംഗവുമായിരുന്നു ജെ.സി. മൊറായിസ്[1]. കോവളം നിയമസഭാമണ്ഡലത്തിൽ നിന്നും ഇടതു പിന്തുണയുള്ള സ്വതന്ത്ര സ്ഥാനാർഥിയായി വിജയിച്ചാണ് ഇദ്ദേഹം മൂന്നാം കേരളനിയമസഭയിൽ അംഗമായത്. 1909 ജൂണിൽ ജനനം, ഇദ്ദേഹത്തിന് അഞ്ച് ആൺമക്കളും രണ്ട് പെൺമക്കളുമുണ്ടായിരുന്നു. ചെറുപ്രായത്തിൽ തന്നെ രാഷ്ട്രീയ പ്രവർത്തനങ്ങളിൽ സജീവമായിരുന്ന ഇദ്ദേഹം വിദ്യാഭ്യാസാനന്തരം സർക്കാർ ജോലിയിൽ പ്രവേശിച്ചു. തിരുവിതാംകൂർ ജുഡീഷണൽ മജിസ്ട്രേറ്റ്, തഹൽസീദാർ, പുഞ്ച സെപ്ഷ്യൽ ഓഫീസർ, റവന്യൂ ഡിവിഷണൽ ഓഫീസർ എന്നീ നിലകളിൽ പ്രവർത്തിച്ച അദ്ദേഹം ഡെപ്യൂട്ടി കളക്ടറായാണ് സർക്കാർ സർവ്വീസിൽ നീന്ന് വിരമിച്ചത്. 1970-71 കാലഘട്ടങ്ങളിൽ പെറ്റീഷൻ കമ്മിറ്റിയുടെ ചെയർമാൻ സ്ഥാനവും ഇദ്ദേഹം വഹിച്ചിരുന്നു[2]. 1965-ലെ തിരഞ്ഞെടുപ്പിൽ കോവളത്ത് നിന്നും കേരളാകോൺഗ്രസ് പ്രതിനിധിയായി മത്സരിച്ചെങ്കിലും എം. കുഞ്ഞുകൃഷ്ണൻ നാടാരോട് പരാജയപ്പെട്ടു. 1997-ൽ അന്തരിച്ചു.
