ഡെന്നീസ്‌ ജോസഫ്‌

ഡെന്നീസ്‌ ജോസഫ്‌
ചിത്രീകരണത്തിനിടയിൽ
ജനനം	1957 ഒക്ടോബർ 20 ഏറ്റുമാനൂർ, കോട്ടയം
മരണം	2021 മെയ് 10
തൊഴിൽ(s)	തിരക്കഥാകൃത്ത്, സംവിധായകൻ, ജേർണലിസ്റ്റ്
സജീവ കാലം	1985 – മുതൽ
ജീവിതപങ്കാളി	ലീന ഡെന്നീസ്
കുട്ടികൾ	എലിസബത്ത്,റോസി,ജോസ്

മലയാളതിരക്കഥാകൃത്തും സംവിധായകനുമായിരുന്നു ഡെന്നീസ് ജോസഫ് (ജീവിതകാലം, ഒക്ടോബർ 20, 1957 – മെയ് 10, 2021)^[1]. 1985-ൽ ജേസി സംവിധാനംചെയ്ത 'ഈറൻ സന്ധ്യ' എന്ന ചിത്രത്തിനു തിരക്കഥ എഴുതി ചലച്ചിത്രരംഗത്ത് പ്രവേശിച്ചു. മനു അങ്കിൾ എന്ന ചലച്ചിത്രത്തിലൂടെ ആദ്യമായി സംവിധായകനായി. കോട്ടയം ജില്ലയിലെ ഏറ്റുമാനൂരിൽ 1957 ഒക്ടോബർ 20ന് എം.എൻ. ജോസഫിന്റെയും ഏലിയാമ്മ ജോസഫിന്റെയും മകനായി ജനിച്ചു. ഏറ്റുമാനൂർ ഗവൺമെന്റ് ഹൈസ്കൂളിൽനിന്ന് സ്കൂൾ വിദ്യാഭ്യാസവും കുറവിലങ്ങാട് ദേവമാതാ കോളെജിൽ നിന്നും ബിരുദവും നേടി. പിന്നീട് ഫാർമസിയിൽ ഡിപ്ലോമയും കരസ്ഥമാക്കി.

ഇദ്ദേഹം തിരക്കഥ രചിച്ച നിറക്കൂട്ട് (1985), രാജാവിന്റെ മകൻ (1986), ശ്യാമ (1986), ന്യൂഡൽഹി (1987), സംഘം, നമ്പർ 20 മദ്രാസ് മെയിൽ (1990), കോട്ടയം കുഞ്ഞച്ചൻ (1990), ഇന്ദ്രജാലം (1990), ആകാശദൂത് (1993), പാളയം (1994), എഫ്.ഐ.ആർ (1999) എന്നീ ചിത്രങ്ങൾ ബോക്സ് ഓഫീസിൽ വമ്പൻ വിജയം നേടിയിട്ടുണ്ട്. സംവിധായകൻ ജോഷി, തമ്പി കണ്ണന്താനം എന്നിവരുമായി ചേർന്ന് മികച്ച ഒരുപിടി നല്ല ചിത്രങ്ങൾ മലയാള പ്രേക്ഷകർക്ക് നൽകി ഇദ്ദേഹം. അഞ്ച് ചിത്രങ്ങൾ സംവിധാനം ചെയ്തിട്ടുള്ള ഡെന്നിസ് ജോസഫിന്റെ മനു അങ്കിൾ എന്ന ചിത്രം1988 ൽ മികച്ച കുട്ടികളുടെ ചിത്രത്തിനുള്ള ദേശീയ ചലച്ചിത്ര അവാർഡും 1989 ൽ മികച്ച കുട്ടികളുടെ ചിത്രത്തിനുള്ള കേരള സംസ്ഥാന ചലച്ചിത്ര അവാർഡും നേടിയിരുന്നു.^[2][3]ഹൃദയാഘാതത്തെ തുടർന്നു കോട്ടയത്തെ സ്വകാര്യ ആശുപത്രിയിൽ വെച്ചായിരുന്നു അദേഹത്തിന്റെ അന്ത്യം.

1957 ഒക്ടോബർ 20 ന് കേരളത്തിലെ കോട്ടയം ജില്ലയിലെ ഏറ്റുമാനൂരിൽ^[4] ജനിച്ച അദ്ദേഹം നടൻ ജോസ് പ്രകാശിന്റെ അനന്തരവനാണ്.^[5]