പുൻടിയസ് ഡോളിച്ചൊപിട്രസ്

ഇംഗ്ലീഷ് വിലാസം

https://ml.wikipedia.org/wiki/Puntius_dolichopterus

ചെറുതും ആഴംകുറഞ്ഞതുമായ ജലാശയങ്ങളിൽ കാണപ്പെടുന്ന ഒരിനം ശുദ്ധജല മത്സ്യമാണ് പുൻടിയസ് ഡോളിച്ചൊപിട്രസ് (Puntius dolichopterus).^[1]. പരൽ വർഗ്ഗം അഥവാ സിപ്രിനിഡെ (Cyprinidae) എന്ന മത്സ്യകുടുംബത്തിലെ അംഗമാണ് ഈ മത്സ്യം.^[1] ഭക്ഷ്യയോഗ്യവും അലങ്കാരത്തിനായി വളർത്താവുന്നതുമായ ഈ മത്സ്യത്തെ, 2015-ൽ ആലപ്പുഴ ജില്ലയിലെ കായംകുളംഎന്ന സ്ഥലത്തെ ഒരു കനാലിൽ നിന്നാണ് ആദ്യമായി കണ്ടെത്തിയത്. ^[2] മാവേലിക്കര സ്വദേശിയും ചവറ ബി. ജെ. എം. ഗവൺമെന്റ് കോളേജ് സുവോളജി വിഭാഗം മേധാവിയുമായ പ്രഫ. മാത്യൂസ് പ്ലാമൂട്ടിലാണ് മത്സ്യത്തെ കണ്ടെത്തുകയും പേരിടുകയും ചെയ്തത്. ^[1] പ്രമുഖ അന്താരാഷ്ട്ര ജേർണലായ ഇന്റർനാഷണൽ ജേണൽ ഫോർ പ്യുവർ ആൻഡ് അപ്ലൈഡ് സുവോളജിയുടെ 2015 ജൂലൈ ലക്കത്തിൽ മത്സ്യത്തിൻറെ കണ്ടുപിടിത്തം സംബന്ധിച്ച വിശദമായ ലേഖനം പ്രസിദ്ധീകരിക്കപ്പെട്ടു. ^[2]പുതുതായി കണ്ടെത്തുന്ന ജന്തുക്കൾക്കു പേര് നൽകുന്ന 'ഇന്റർനാഷണൽ കമ്മീഷൻ ഓഫ് സുവോളജിക്കൽ നോമൻക്ലേച്ചറിൽ നിന്നും ഈ മത്സ്യത്തിനു സൂബാങ്ക് രജിസ്റ്റർ നമ്പറും ലഭ്യമായിട്ടുണ്ട്. ^[1]

'പുൻടിയസ് ' എന്നത് ജീനസ് നാമവും 'ഡോളിച്ചോപിട്രസ്' എന്നത് സ്പീഷീസ്നാമവുമാണ്.മത്സ്യത്തെ കണ്ടെത്തിയ പ്രഫ. മാത്യൂസ് പ്ലാമൂട്ടിലാണ് 'ഡോളിച്ചോപിട്രസ്' എന്ന സ്പീഷീസ് നാമം നൽകുവാൻ നിർദ്ദേശിച്ചത്.^[1].ഗ്രീക്കുഭാഷയിൽ 'നീളമുള്ള' എന്നർത്ഥമുള്ള 'ഡോളിച്ചോസ്' (Dolichos), 'ചിറകുകൾ' എന്നർത്ഥമുള്ള 'ടെറോൺ'(Pteron) എന്നീ വാക്കുകളിൽ നിന്നുമാണ് 'ഡോളിച്ചോപിട്രസ്' എന്ന വാക്കുണ്ടായത്.^[2] അതായത് ഈ വാക്കിന്റെ അർത്ഥം 'നീളമുള്ള ചിറകുകളോടുകൂടിയത്' എന്നതാണ്. ^[2] ഈ മത്സ്യത്തിനു നീളമുള്ള നെഞ്ചുചിറകുകൾ(Pectorial fins) ഉള്ളതിനാലാണ് ഈ പേര് നൽകിയത്. ^[2]

• ഈ മത്സ്യങ്ങൾക്ക് ഇടത്തരം വലിപ്പമാണുള്ളത് (7.3 മുതൽ 8.7 സെ.മീ വരെ നീളം) ^{[2] [3]}
• ഉടലിനു തിളക്കമുള്ള വെള്ളിനിറം. ^{[2] [3]}
• നീളം കൂടിയ തല ^[2]
• നീളമുള്ള നെഞ്ചുചിറകുകൾ (Pictorial fins).ഇവയ്ക്ക് പച്ച കലർന്ന മഞ്ഞ നിറമാണ്. ^{[2] [1]}
• പാർശ്വ ശൽക്കങ്ങളുടെയും (Lateral Scales) പിറകിലെ ശൽക്കങ്ങളുടെയും(Dorsal fins) എണ്ണം കുറവാണ്. ^{[2] [3]}
• മുതുകു ചിറകുകൾക്ക് (Dorsal fins) വലിപ്പം കുറവാണ്. ^[2] ഇവയ്ക്ക് ചുവപ്പു കലർന്ന ഓറഞ്ച് നിറമാണ്. ^[3]
• മുതുകുമുള്ള്(Dorsal spine) നീളം കൂടിയതും കട്ടികൂടിയതുമാണ്. ^[3]
• മഞ്ഞനിറത്തിലുള്ള വാൽച്ചിറകുകൾക്കു തൊട്ടുമുന്നിലായി 21,22 ശൽക്കങ്ങളിൽ അവ്യക്തമായ ഒരു കറുത്ത പൊട്ടുണ്ട്. ^{[3] [1]}
• പാർശ്വരേഖയുടെ(Lateral line) താഴെയായി മൂന്നു മുതൽ നാലുവരെ എണ്ണം വരകളുണ്ട്. ^[3].മറ്റു സ്പീഷീസുകൾക്കില്ലാത്ത ഒരു പ്രത്യേകതയാണിത്. ^{[2] [3]}
• നീളംകുറഞ്ഞ മുതുകുചിറകുകളും നീളംകൂടിയ പാർശ്വചിറകുകളും നീണ്ട തലയും മറ്റു പരൽ ഇനങ്ങളിൽനിന്ന് ഇതിനെ വേർതിരിക്കുന്നു.^[4]
• മലിനമായ ജലത്തിൽ നിന്നാണ് മത്സ്യത്തെ കണ്ടെത്തുവാൻ കഴിഞ്ഞത്.അതിനാൽ തന്നെ ഇവയ്ക്ക് മലിനജലത്തെ ഒരു പരിധിവരെ അതിജീവിക്കാനാകും.^[5]

ചെറിയ ജലാശയങ്ങളിലാണ് ഈ ശുദ്ധജലമത്സ്യത്തെ കാണുവാൻ സാധിക്കുക.^[1]ആലപ്പുഴ ജില്ലയിലെ കായംകുളത്തുനിന്നാണ് മത്സ്യത്തെ ആദ്യം തിരിച്ചറിഞ്ഞത്. ^[3]ഈ മത്സ്യത്തെ മറ്റു സ്ഥലങ്ങളിൽ നിന്നും കണ്ടെത്തിയതായി രേഖപ്പെടുത്തിയിട്ടില്ല. ^[5].ഇവയുടെ ആറ് സാമ്പിളുകൾ ആൻഡമാൻ നിക്കോബാർ ദ്വീപുകളുടെ തലസ്ഥാനമായ പോർട്ട് ബ്ലെയറിലെ സർക്കാർ സ്ഥാപനമായ സുവോളജിക്കൽ സർവ്വേ ഓഫ് ഇന്ത്യയിൽ സൂക്ഷിച്ചിട്ടുണ്ട്. ^[5]

• കേരളത്തിലുള്ളവ ^{[2] [3]}
  • പുൻടിയസ് നൈഗ്രോനോട്ടസ്‌ (Puntius nigronotus)
  • പുൻടിയസ് വിറിഡീസ് (Puntius viridis)
  • പുൻടിയസ് നെൽസണി (Puntius nelsoni)
  • പുൻടിയസ് പാര (Puntius parrah)
• തമിഴ്നാട്ടിലുള്ളവ. ^{[2] [3]}
  • പുൻടിയസ് ഡോർസാലിസ് (Puntius dorsalis)
• ഗംഗാനദിയിലുള്ളവ ^{[2] [3]}
  • പുൻടിയസ് ചോള (Puntius Chola)
  • പുൻടിയസ് സോഫോർ (Puntius sophore)

വിക്കിസ്പീഷിസിൽ Puntius dolichopterus എന്നതുമായി ബന്ധപ്പെട്ട കൂടുതൽ വിവരങ്ങൾ ലഭ്യമാണ്.

ഇന്റർനാഷണൽ ജേർണൽ ഫോർ പ്യുവർ ആൻഡ് അപ്ലൈഡ് സുവോളജിയിലെ മത്സ്യത്തിൻറെ കണ്ടുപിടിത്തം സംബന്ധിച്ച ലേഖനം (PDF) (ഇംഗ്ലീഷ് )