ഒരു സിറിയൻ സ്വാതന്ത്ര്യസമരനേതാവായിരുന്നു ഹാഷിം അൽ അത്താസി. ഒട്ടോമൻ സാമ്രാജ്യത്തിന്റെ ഭാഗമായിരുന്ന ഹോംസിൽ 1875-ൽ ജനിച്ചു. ചെറുപ്പത്തിൽ ഒട്ടോമൻ ഭരണകൂടത്തിൽ ഉദ്യോഗം വഹിച്ചിരുന്നു. ഒന്നാം ലോകയുദ്ധാനന്തരം അമീർ ഫൈസലിന്റെ നേതൃത്വത്തിൽ രൂപവത്കരിച്ച താത്കാലിക ഗവണ്മെന്റിൽൽ അംഗമായി. സിറിയയിലെ ഫ്രഞ്ച് ആധിപത്യത്തിനെതിരായി ഇദ്ദേഹം സമരം നയിച്ചു. സിറിയൻ സ്വാതന്ത്യ്രം വാഗ്ദാനം ചെയ്തിരുന്ന ഫ്രാങ്കോ-സിറിയൻ കരാറിന്റെ മുഖ്യശില്പികളിലൊരാളായിരുന്നുഅത്താസി. 1936-ൽ സിറിയൻ റിപ്പബ്ളിക്കിന്റെ പ്രസിഡണ്ടായി തെരഞ്ഞെടുക്കപ്പെട്ടു. ഫ്രാങ്കോ-സിറിയൻ കരാർ ലംഘിക്കപ്പെട്ടതിന്റെ ഫലമായി 1939-ൽ തത്സ്ഥാനം രാജിവച്ചു. 1949-ലെ സൈനിക കലാപത്തെ തുടർന്ന് അത്താസി പ്രധാനമന്ത്രിയും പ്രസിഡണ്ടുമായിത്തീർന്നു. താമസിയാതെ സിറിയൻ ഭരണം അദിബ്ഷിഷാക്ളി പിടിച്ചെടുത്തുവെങ്കിലും അത്താസി പ്രധാനമന്ത്രി സ്ഥാനത്ത് തുടർന്നു. ഭരണാധികാരം മുഴുവൻ ഷിഷാക്ളി കൈയടക്കിയതിനാൽ 1951-ൽ അത്താസി പ്രധാനമന്ത്രി സ്ഥാനം രാജിവച്ചു. 1954-ലെ മറ്റൊരു വിപ്ളവം മൂലം അത്താസി വീണ്ടും സിറിയൻ പ്രസിഡണ്ടായി. 1955-ലെ തെരഞ്ഞെടുപ്പിനുശേഷം അത്താസി പൊതുജീവിതത്തിൽനിന്നും വിരമിച്ചു. 1960-ൽ ഇദ്ദേഹം അന്തരിച്ചു.
