လာအို-မြန်မာ ချစ်ကြည်ရေးတံတား

ဤဆောင်းပါးကို မြန်မာ−လာအို ချစ်ကြည်ရေး မဲခေါင်မြစ်ကူးတံတား နှင့် ပေါင်းစပ်ရန် အကြံပြုထားပါသည်။ (ဆွေးနွေးရန်)

လာအို-မြန်မာ ချစ်ကြည်ရေးတံတား သည် မြန်မာနိုင်ငံ၊ ရှမ်းပြည်နယ်အရှေ့ပိုင်း၊ တာချီလိတ်ခရိုင်၊ ကျိုင်းလပ်မြို့နှင့် လာအိုနိုင်ငံ၊ လွန်းနံ့သာ (Luang Namtha) ပြည်နယ်၊ လောင်းပြည်နယ်၊ ကျိုင်းကော့ (Xieng Kok) ရွာကို ချိတ်ရန် မဲခေါင်မြစ်ကို ဖြတ်ထိုးသော တံတားဖြစ်သည်။ ^[၁]

၂၀၀၃ ခု၊ အောက်တိုဘာလတွင် ရန်ကုန်၌ ကျင်းပသော ဧရာဝတီ-ကျောက်ဖရား-မဲခေါင်စီးပွားရေးပူးပေါင်းဆောင်ရွက်မှု မဟာဗျူဟာ (ACMCES) အစည်းအဝေးတွင် ဗီယက်နမ်က အဆိုသွင်းသည်။ ^[၂] ဤတံတား တည်ဆောက်ခြင်းဖြင့် ဗီယက်နမ်ရှိ ဟိုင်ဖုံ (Hai Phong) ပင်လယ်ဆိပ်နှင့် မြန်မာရှိ ကျောက်ဖြူပင်လယ်ဆိပ် တဆက်တည်းဖြစ်ကာ မြန်မာ-လာအို-ဗီယက်နမ်စင်္ကြန် ဖြစ်လာမည် ဖြစ်၏။

၆၉၁.၆ မီတာ ရှည်ပြီး လာအိုဘက် ချဉ်းကပ်လမ်း ၇၅၈ မီတာ၊ မြန်မာဘက် ချဉ်းကပ်လမ်း ၆၁၀ မီတာ ရှိသည်။ ဒေါ်လာ ၂၆ မီလီယံ သုံးခဲ့ပြီး ၂၀၁၃ ခု၊ ဖေဖော်ဝါရီလ ၁၆ ရက်တွင် စဆောက်သည်။ လ ၃၀ အပြီးဆောက်ရန် မှန်းထားသော်လည်း ၂၅ လနှင့် ပြီးသည်။ တန် ၇၀ ဝန် ခံနိုင်သည်။ ^[၂]

၂၀၁၅ ခု၊ မေလတွင် တံတားဖွင့်ပွဲ ကျင်းပရာ မြန်မာသမ္မတ ဦးသိန်းစိန်နှင့် လာအို လာအိုပြည့်သူတော်လှန်ရေးပါတီ အထွေထွေအတွင်းရေးမှူး ခြုံမလီ ဆရာဆုံ (ຈູມມະລີ ໄຊຍະສອນ) တို့ တက်သည်။ ^[၃] မြန်မာ-လာအို သံဆက်ဆံရေး နှစ် ၆၀ ပြည့် အထိမ်းအမှတ်အဖြစ် ဖွင့်ခြင်း ဖြစ်၏။

သို့သော် နှစ်နိုင်ငံ အခွန်ဆိုင်ရာကိစ္စများ ညှိမရ၍ ၂၀၁၆ ခုတိုင် အဖြတ်အသွား မရှိခဲ့။ ^[၄] တရုတ်အရှေ့ပိုင်းသို့ ဗီယက်နမ်ရှိ ပင်လယ်ဆိပ်မှ ပို့လျှင် ခရီးတိုသည်။ သို့သော် စာရွက်စာတမ်းကိစ္စ လွယ်ကူသည့် ထိုင်းမှတဆင့် ပို့ခြင်းကိုသာ မြန်မာပို့ကုန်သမားတို့က လုပ်သည်။ ထို့ကြောင့် ထိုတံတားမှာ အကူးအသန်း အနည်းငယ်သာ ရှိသည်။

1. ↑ Yola Verbruggen (5 May 2016) "Nation's Leaders Set for First Foreign Visit to Laos 18 November 2019 ၌ မော်ကွန်းပြန်ကြည့်စက်တွင် မော်ကွန်းတင်ပြီး .". Myanmar Times.
2. ↑ ^{၂.၀ ၂.၁} (12 May 2015) "Laos-Myanmar Friendship Bridge Opens". J&C Services.
3. ↑ (11 May 2015) "Myanmar-Lao Friendship Bridge Opens 18 November 2019 ၌ မော်ကွန်းပြန်ကြည့်စက်တွင် မော်ကွန်းတင်ပြီး .". Mizzima.
4. ↑ Chan Mya Htwe (7 Jul 2016) "Border Issues Delay Myanamr-Laos Friendship Bridge Trade 18 November 2019 ၌ မော်ကွန်းပြန်ကြည့်စက်တွင် မော်ကွန်းတင်ပြီး .". Myanmar Times.