Rim Tim Tagi Dim

«Rim Tim Tagi Dim» Song av Baby Lasagna[1]
Land	Kroatia
Språk	Engelsk
Utgjeve	12. januar 2024
Sjanger	Techno, heavy metal, pop, trap
Lengd	02:59
Selskap	Virgin Music Group
Låtskrivar(ar)	Marko Purišić[2]

«Rim Tim Tagi Dim» er ein song av og med den kroatiske artisten Baby Lasagna^[3]. Songen vann den kroatiske songkonkurransen Dora 2024 og var det kroatiske bidraget i Eurovision Song Contest 2024 i Malmö i Sverige.

«Rim Tim Tagi Dim» er skriven og komponert av Marko Purišić, kjend under artistnamnet Baby Lasagna.^[4] Ifølgje Purišić blei songen skriven av han sjølv på soverommet hans, og var inspirert av ei moglegheit han hadde til å ta ein jobb på eit cruiseskip som han avslo.^[5] Songen var opphavleg meint å vere utfyllingssong på det framtidige debutalbumet hans, Demons and Mosquitoes, men Purišić innsåg potensialet til songen etter at han steig i strøymetal og bestemte seg for å sende songen inn til Dora 2024.^[6] Den 2. januar 2024 blei «Rim Tim Tagi Dim» offisielt kunngjord som ein reservesong for den kroatiske nasjonale finalen for Eurovision Song Contest 2024, Dora 2024.^[7]

I ei rekkje intervju uttalte Purišić at songen var inspirert av ei masseutvandring av unge vaksne som forlét Kroatia for betre moglegheiter i framande land.^[8][6] For Purišić er songen «ei humoristisk og letthjarta tilnærming» til problemet.^[9] Sjølve songen fortel ein historie om ein ung, landleg mann som forlet landsbyen sin for eit betre liv i eit framandt land; sjølv om han er spent, er han fortsatt plaga av angst for å flytte.^[8][9][5] Purišić blei også inspirert av sin eigen angst. I songteksten fungerer «rim tim tagi dim» som namnet på ein fiktiv folkedans frå heimbyen til mannen.^[10] Lydmessig har «Rim Tim Tagi Dim» element av techno, heavy metal, pop og trap.^[11][12][13]

Den 2. januar 2024 blei Purišić og «Rim Tim Tagi Dim» kunngjort som reservebidrag i Dora 2024, den kroatiske nasjonale finalen til Eurovision Song Contest, i tilfelle nokon skulle trekkje seg frå konkurransen.^[14] Dagen etter trekte artisten Zsa Zsa seg frå konkurransen, og Purišić overtok plassen hennar.^[15]

«Rim Tim Tagi Dim» klarte å kvalifisere seg frå semifinale 2, som blei arrangert 23. februar.^[16] Sundag 25. februar vann songen Dora 2024, den kroatiske uttakinga til Eurovision Song Contest. Som vinnar blei «Rim Tim Tagi Dim» det kroatiske bidraget til Eurovison Song Contest 2024.^[17]

Kroatia deltok i den fyrste semifinalen tysdag 7. mai i Malmö.^[18] «Rim Tim Tagi Dim» vann semifinalen og kvalifiserte seg til finalen laurdag 11. mai.^[19][20] I finalen enda låten på andreplass med 547 poeng; 210 poeng frå juryane og 337 poeng frå sjåarane.^[21][22] Dette var den beste plasseringa til Kroatia i Eurovision Song Contest til då.^[23]