ߞߊ߬ߡߊ߲߬ߖߊ߲߫ ߞߡߊ߬ߙߊ߫

ߞߊ߬ߡߊ߲߬ߖߊ߲߫ ߞߡߊ߬ߙߊ߫ ߕߘߍ߬ ߦߋ߫ ߡߊ߲߬ߘߋ߲߫ ߣߊ߲߬ߞߌ߲ ߠߎ߬ ߘߏ߫ ߟߋ߬ ߘߌ߫ ߡߊ߲߬ߘߋ߲߫ ߞߍ߬ߟߍ ߟߎ߫ ߝߍ߬ ߛߏ߲߬ߖߘߊ߬ ߟߊ߫ ߝߊ߰ߡߊ߬ߦߊ ߡߊߜߍ߲ ߘߐ߫. ߞߊ߬ߡߊ߲߬ߖߊ߲߫ ߞߵߊ߬ ߟߊ߫ ߘߋߣߍ߲ߦߊ ߞߍ߫ ߣߊߙߋߡߊ߲߰ ߝߍ߬ ߟߋ߬ ߢߊ߬ߣߌ߲߬ߓߊ߫߸ ߡߍ߲ ߘߐ߫ ߣߌ߫ ߕߋߙߌߦߊ ߣߌ߫ ߟߊ߲ߒߠߦߊ ߘߏ߲߬ ߘߴߊ߬ ߣߌ߫ ߛߏ߲߬ߖߘߊ߬ ߕߍ߫ ߏ߬ ߟߊ߫ ߕߊ߯ߡߊ ߞߐ ߘߐ߫. ߘߊ߲߬ߞߊ߬ߙߊ߲߬ ߕߎߡߊ߫ ߡߊ߲߬ߛߦߊ߬ߣߍ߲ ߞߵߊ߬ߟߎ߫ ߜߍ߲߫ ߛߏ߰ߟߏ߲߬ ߞߐ߲ߘߍ߫ ߣߴߊ߬ ߘߋ߲ ߠߎ߬ ߟߊߝߋߝߋ ߞߐ ߘߐ߫߸ ߒ߬ߓߊ߬ ߊ߬ߟߎ ߟߋ߬ ߞߍ߫ ߘߊ߫ ߛߏ߲߬ߖߘߊ߫ ߖߌ߱ ߘߴߊ߬ ߞߐߛߊߦߌ߫ ߕߎߡߊ ߟߊ߫ ߡߊ߲߬ߘߋ߲߫^[߁].

ߞߊ߬ ߓߍ߲߬ ߊ߲ ߓߋ߲ߓߊ ߟߎ߬ ߟߊ߫ ߟߊ߲߬ߘߊ ߡߊ߬߸ ߡߊ߲߬ߛߊ߬ ߘߎ߯ߟߊ ߟߎ߬ ߓߍ߯ ߘߋߣߌ߲ߠߡߊ ߕߘߍ߬ ߦߋ߫ ߡߐ߬ ߟߊ߫ ߡߊ߲߬ߛߊ߬ ߛߊ߲ߘߐ ߟߎ߬ ߓߘߊ ߟߋ߬߸ ߒ߬ߓߊ߬ ߞߊ߬ߡߊ߲߬ߖߊ߲߫ ߣߌ߫ ߕߊ߲ߓߏ߲߫ ߥߣߊ߬ߝߊߙߊ߲߫ ߞߡߊ߬ߙߊ߫ ߟߎ߫ ߡߐ߬ ߘߊ߫ ߞߏ߲ߞߢߊ߫ ߢߊ߫ ߞߋߟߋ߲ ߏ߬ ߟߋ ߡߊ߬. ߞߊ߬ߦߌ߯ ߛߏ߰ߟߏ߲߬ߘߋ߲ ߕߊ߯ߡߓߊߟߌ߸ ߊ߬ ߣߌ߫ ߞߊ߬ߡߊ߲߬ߖߊ߲߫ ߠߎ߫ ߕߘߍ߬ ߦߋ߫ ߛߋ߲߬ߘߏ߲߬ߢߐ߲߮ ߠߎ߬ ߟߋ߬ ߘߌ߫߸ ߒ߬ߓߊ߬ ߛߌ߲߬ߓߏ߲ ߕߊ߯ߡߊߣߍ߲ ߏ߬ ߘߐ߫ ߛߊ߫߸ ߊ߬ ߞߊ߬ ߞߏ ߛߎ_ߎ߯_ߛߎ߫ ߞߍ߫ ߦߋ߲߬ ߦߊ߬ߣߴߊ߬ ߟߊ߫ ߢߊߣߌ߲ߡߊߓߏߙߌ ߕߍ߫߸ ߊ߬ ߣߌ߫ ߞߊ߬ߡߊ߲߬ߖߊ߲߫ ߠߎ߫ ߟߋ߬ ߞߵߏ߬ ߓߍ߯ ߟߊߘߍ߬.

ߣߊߙߋ߲ߡߊ߲߰ ߛߊ߬ ߘߊ߫ ߞߵߊ߬ߟߎ߫ ߕߏ߫ ߛߌ߱ ߏ߬ ߟߋ ߘߐ߫ ߦߋ߲߬߸ ߘߊ߲߬ߞߊ߬ߙߊ߲߬ ߕߎߡߊ߫ ߣߊ߬ ߛߏ߰ߟߏ߲߬ ߞߐ߲ߘߍ߫ ߣߴߊ߬ ߘߋ߲ ߠߎ߬ ߟߊߝߋߝߋ߫ ߟߊ߸ ߊ߬ ߞߊ߬ ߕߋ߭ ߘߏ߲߬ ߊ߬ߟߎ ߝߣߊ߫ ߘߐ߫ ߞߏ߫ ߣߌ߫ ߡߍ߲ ߕߍ߫ ߢߊ߬ ߛߏ߲߬ߖߘߊ߬ ߞߐ߫߸ ߞߴߏ߬ ߦߴߊ߬ ߛߊ߯ߘߴߊ߬ ߘߌߦߊ ߣߌ߲߬ ߘߐ߫߸ ߏ߬ ߟߋ ߞߍ߫ ߘߴߊ߬ߟߎ ߛߊ߬ߦߌ ߘߌ߫ ߛߏ߫.

ߛߏ߲߬ߖߘߊ߬ ߞߐߛߊߦߌ߫ ߕߎߡߊ ߟߊ߫ ߞߊ߬ ߓߐ߫ ߢߊߣߌ߲ߡߊߓߏߙߌ ߘߐ߫߸ ߏ߬ ߞߵߊ߬ ߕߘߍ߬ ߞߊ߬ߡߊ߲߬ߖߊ߲߫ ߣߌ߫ ߕߊ߲ߓߏ߲߫ ߥߣߊ߬ߝߊߙߊ߲߫ ߠߎ߫ ߓߘߊ߫ ߓߊ߲߫ ߡߊ߲߬ߛߊ߬ߦߊ߬ ߟߊ߫߸ ߏ߬ ߟߎ ߟߋ߬ ߞߍ߫ ߘߴߊ߬ ߖߌ߱ ߘߌ߫ ߞߍ߬ߟߍ ߓߍ߯ ߘߐ߫ ߝߏ߫ ߞߊ߬ ߥߴߊ߬ ߛߵߊ߬ ߟߊ߫ ߝߊ߰ߡߊ߬ߦߊ ߟߊ߫. ߕߊߓߏ߲߫ ߞߟߊߓߍ߲ ߟߊ߬ߥߛߊ ߞߐ߫߸ ߣߍ߰ߓߏ߬ߙߌ߬ߦߊ߫ ߞߟߊߓߍ߲ ߞߎ߲߬ߠߊ߬ߦߋߙߋ߲ ߞߐ ߘߐ߫߸ ߞߊ߲ߞߌߢߍ߫ ߞߟߊߓߍ߲ ߛߋߓߊ߯ߦߊ߫ ߛߐߘߐ߲ ߞߐ ߘߐ߫߸ ߛߏ߲߬ߖߘߊ߫ ߣߴߊ߬ ߣߐ߬ߟߊ ߟߎ߬ ߥߊ߫ ߘߴߊ߬ߟߎ߫ ߘߊ߯ߡߊߞߍ߫ ߛߓߌ߬ߞߙߎ ߟߊ߫ ߞߊ߬ߡߊ߲߬ߖߊ߲߫ ߝߍ߬ ߛߌ߬ߓߌ߫.

ߞߊ߬ߡߊ߲߬ߖߊ߲߫ ߣߌ߫ ߕߊߓߏ߲߫ ߥߣߊ߬ߝߊߙߊ߲߫ ߠߎ߫ ߟߋ߬ ߞߊ߬ ߗߋߘߋ߲ ߠߎ߬ ߟߊߖߍ߲ߛߍ߲߫ ߡߊ߲߬ߘߋ߲߫ ߖߡߊ߬ߣߊ ߟߎ߫ ߟߊ߫ ߗߍ߬ߟߊ߬ߘߍ ߟߊ߫߸ ߞߟߍ߬ߘߋ߲ ߠߎ߬ ߣߊ߬ ߘߊ߫ ߞߊ߬ ߓߐ߫ ߝߊ߲߭ ߓߍ߯ ߟߊߘߍ߬ߣߍ߲ ߘߐ߫ ߞߊ߬ ߛߌ߬ߓߌ߫ ߡߊߜߍ߲߫. ߒ߬ߓߊ߬ ߞߍ߬ߟߍ ߛߎ߯-ߎ-ߛߎ߯ ߞߍ߫ ߘߊ߫ ߛߌ߬ߓߌ߫ ߛߋ ߞߐ ߘߐ߫߸ ߞߊ߬ߡߊ߲߬ߖߊ߲߫ ߕߘߍ߬ ߘߴߏ߬ ߟߎ߫ ߓߍ߯ ߘߐ߫ ߞߐߘߍ߫.

• ߛߎߡߊߥߙߏ߫ ߣߊ߬ߣߍ߲ ߘߊ߯ ߟߊߛߌ߮ ߟߊ߫ ߓߊ߲ߕߊ߲߫ ߛߏ ߞߣߐ߫ ߡߊ߲߬ߘߋ߲߬ ߓߐߕߏ߲ߠߊ߫ ߛߏ ߘߏ߫ ߟߊ߫߸ ߡߊ߲߬ߘߋ߲߬ߞߊ ߟߎ߬ ߞߊ߬ ߞߍ߬ߟߍ ߟߊߥߌ߬ߟߌ߫ ߞߊ߬ ߥߊ߫ ߓߙߊ߬ ߏ߬ ߟߎ߬ ߘߐ߫ ߞߊ߬ ߘߊ߮ ߏ߬ ߕߋ߬, ߘߏ߯ߣߍ߲߫ ߠߋ߬ ߞߵߊ߬ ߕߏ߫ ߛߎߡߊߥߙߏ߫ ߞߊ߲ߕߍ߫ ߕߘߍ߬ ߦߋ߫ ߕߏ߫ ߞߍ߬ߟߍ ߏ߬ ߘߐ߫.

• ߞߙߌߣߊ߬ ߞߟߊߓߍ߲ ߝߍ߬߸ ߡߊ߲߬ߘߋ߲߬ߞߊ ߟߎ߬ ߥߊ߫ ߘߴߊ߬ߟߎ߫ ߘߊ߯ߡߊߞߍ߫ ߘߊ߯ߖߟߊ߫ ߟߋ߬߸ ߛߏ߬ߛߏ߬ߞߊ ߟߎ߬ ߝߣߊ߫ ߥߊ߫ ߘߴߊ߬ߟߎ߫ ߘߊ߯ߡߊߞߍ߫ ߞߙߌߣߊ߬ ߛߏ ߞߣߐ߫. ߞߍ߬ߟߍ ߛߏ߲ߛߙߏߡߊ߫ ߘߴߊ߬ ߘߐ߫ ߛߐ߰ߡߊ߬ߘߊ ߟߊ߫ ߥߏߎ߫߸ ߞߵߊ߬ ߕߊ߬ ߝߏ߫ ߕߟߋ߬ߞߎߣߊ ߘߐ߫ ߣߌ߫ ߛߏ߬ߛߏ߬ ߡߊߣߐ߬ ߘߊ߫߸ ߛߎߡߊߥߙߏ߫ ߛߊ߯ߘߊ߫ ߘߊ߫ ߞߊ߬ ߥߴߊ߬ ߟߊߘߏ߲߬ ߝߊߟߊ߲ ߠߊ߫ ߞߎ߬ߟߌ߬ߞߙߐ߫.

• ߛߏ߬ߛߏ߬ ߞߟߊߓߍ߲ ߘߐ߫߸ ߞߟߍ߬ߘߋ߲ ߠߎ߬ ߞߐߛߊ߬ߦߌ߬ߣߍ߲ ߞߊ߬ ߓߐ߫ ߞߙߌߣߊ߬ ߞߊ߬ ߥߊ߫ ߟߊ߫ ߣߎ߲߬ߞߍ߬ߓߊ߫ ߞߊ߲ߕߍ߫ ߣߴߊ߬ ߟߊ߫ ߞߟߍ߬ߓߏߟߏ߲ ߞߊ߲߬߸ ߊ߬ ߝߐ߫ ߘߊ߫ ߛߏ߲߬ߖߘߊ߬ ߢߍ߫ ߞߴߊ߬ߟߎ߫ ߦߋ߫ ߓߟߏߘߐߓߍ߲ ߞߊ߲߬ ߞߟߍ߬ ߜߘߍ߫ ߞߊ߲ߡߊ߬. ߡߊ߲߬ߘߋ߲߬ߞߊ ߟߎ߬ ߥߟߌ߬ ߘߴߏ߬ ߟߋ ߘߐ߫ ߞߊ߬ ߥߴߊ߬ߟߎ߫ ߕߘߍ߬ ߦߋ߲߬ ߞߵߊ߬ߟߎ߫ ߞߟߍ߬ ߞߊ߬ ߛߋ߫ ߊ߬ߟߎ߫ ߟߊ߫߸ ߞߵߊ߬ߟߎ߫ ߟߊ߫ ߡߐ߰ߘߐ߬ߜߍ ߟߎ߬ ߡߌ߬ߘߊ߬^[߁].

ߞߍ߬ߟߍ ߟߎ߬ ߓߊ߲ߣߍ߲ ߁߂߃߅ ߟߊ߫߸ ߓߊߏ߬ ߞߍ߬ߟߍ ߓߊ߲߫ ߘߊ߫ ߛߊ߬ߡߊ ߡߊߜߍ߲ ߠߋ߬ ߘߐ߫߸ ߓߍ߲߬ ߞߍ߫ ߘߴߊ߬ ߘߐ߫ ߞߏ߫ ߞߊ߬ ߥߊ߫ ߛߍ߬ߣߍ ߞߍ߫߸ ߞߏ߫ ߣߌ߫ ߛߎ߬ߡߊ߲߬ߠߊ߬ߘߊ߲ ߓߊ߲߫ ߘߊ߫ ߕߎ߬ߡߊ ߡߍ߲ ߠߊ߫߸ ߞߏ߫ ߞߊ߬ ߢߐ߲߯ߓߍ߲߬ ߞߊ߯ߓߊ߫. ߊ߬ߟߎ߫ ߞߊ߬ ߢߐ߲߮ ߓߍ߲߬ ߦߋ߲߬ ߞߊ߬ ߛߏ߬ߛߏ߫ ߞߎ߲߬ߞߏ߬ߕߐ ߟߎ߬ ߞߕߌ߫߸ ߊ߬ ߣߌ߫ ߞߊ߬ ߞߎ߬ߙߎ߲߬ߘߎ߫ ߁߅߀ ߣߌ߫ ߞߐ߫ ߟߎ߫ ߟߊߘߊ߲߫. ߊ߬ߟߎ߫ ߞߊ߬ ߕߊ߲߬ߓߊ߬ ߟߊ߬ߕߊߡߌ߲ ߞߍ߫ ߛߏ߰ߟߏ߲߬ߡߊ߲߰ ߢߍ߫.

ߕߊ߲߬ߓߊ߬ߕߘߎ ߏ߬ ߘߐ߫߸ ߓߊߏ߬ ߞߊ߬ߡߊ߲߬ߖߊ߲߫ ߠߋ߬ ߞߍ߫ ߘߊ߫ ߡߊ߲߬ߘߋ߲߬ ߓߍ߯ ߖߋ߬ߕߌ ߘߌ߫ ߞߍ߬ߟߍ ߏ߬ ߝߍ߬߸ ߊ߬ߟߋ ߟߋ߬ ߝߟߐߝߟߐ߫ ߥߟߌ߬ ߘߊ߫ ߞߊ߬ ߥߴߊ߬ ߣߐ߲߬ߞߐ߲߬ߛߐ߫ ߛߏ߰ߟߏ߲߬ߖߘߊ߫ ߣߊ߰ߟߊ߫ ߞߊ߬ ߕߊ߲߬ߓߊ ߟߊߕߊ߬ߡߌ߲߫ ߊ߬ ߡߊ߬:

«ߊ߬ߟߋ ߟߋ߬ ߦߴߏ߬ ߘߌ߫ ߛߌߣߍ߬ ߊߟߊ߫ ߛߊ߬ߥߏ߬߸ ߊߟߎ߫ ߛߊ߬ߥߏ߬߸ ߌ ߝߊ߲ߝߊ߲߫ (ߌ ߖߌ߬ߣߍ߬ߞߊߣߌ߲) ߛߊ߬ߥߏ߬; ߒߠߋ ߞߊ߬ߡߊ߲߬ߖߊ߲߫ ߓߊߘߋ߲ ߛߌߣߌ߲ߞߌ߲ߓߏ߲ ߞߡߊ߬ߙߊ ߟߎ߬ ߞߵߊ߬ߟߎ߫ ߥߊ߬ߛߊߘߏ߲߬ ߒߠߋ ߟߋ߬ ߘߐ߫ ߞߊ߬ ߓߍ߲߬ ߡߐ߰ߓߊ ߟߎ߬ ߟߊ߫ ߟߊ߲߬ߘߊ߬ ߞߘߐ ߟߎ߫ ߟߋ߬ ߡߊ߬߸ ߒ߬ߓߊ߬ ߒߠߋ ߝߣߊ߫ ߓߘߊ߫ ߒ߬ ߠߊ߫ ߕߊ߲߬ߓߊ ߟߊߕߊ߬ߡߌ߲߫ ߌߟߋ ߡߊ߬ ߞߵߊ߬ ߦߌ߬ߘߊ߬ ߌ ߟߊ߫ ߞߏ߫ ߞߊ߲߫ ߜߘߍ߫ ߛߌ߫ ߕߍ߫ ߒ߬ ߓߘߊ ߦߋ߲߬ ߝߏ߫ ߌ ߟߊ߫ ߞߊ߲߸ ߌ ߞߊ߬ ߘߊߟߌߞߌ߲ߓߏ߲ ߠߎ߬ ߞߊ߬ߙߌ߬ߝߊ߫ ߡߐ߰ ߛߌ߫ ߟߊ߫߸ ߒ߬ ߘߌ߬ߢߍ߬ߣߍ߲߫ ߦߴߏ߬ ߡߊ߬…». ߞߎ߲߬ߕߌ߮ ߟߎ߬ ߓߍ߯ ߝߣߊ߫ ߞߵߏ߬ ߢߐ߲߱ ߠߋ߬ ߝߣߊ߫ ߞߍ߫߸ ߛߌ߲߬ߓߏ߲ ߝߣߊ߫ ߞߊ߬ ߓߍ߯ ߟߊ߫ ߕߊ߲߬ߓߊ߬ ߟߊߛߊ߬ߦߴߌ ߡߊ߬^[߁].

1. ↑ ^{߁.߀ ߁.߁ ߁.߂} ߞߎߡߘߊ ߣߌ߲߬ ߡߎ߰ߡߍ ߛߓߍߣߍ߲߫ ߦߋ߫ ߛߟߏ߬ߡߣߊ߬ ߞߊ߲ߕߍ߫ ߟߊ߫ ߞߊ߬ߝߊ ߘߏ߫ ߟߋ߬ ߡߊ߬ ߸ ߡߍ߲ ߕߐ߯ ߞߏ߫ ߡߊ߲߬ߘߋ߲߫ ߘߐ߬ߝߐ