ߡߊ߲߬ߘߋ߲߫ ߘߌ߯ߣߊ

ߡߊ߲߬ߘߋ߲ ߠߎ߬ ߟߊ߫ ߘߌ߯ߣߊ ߦߋ߫ ߓߏߟߌ߫ ߓߊߕߏ (ߖߏ߬ ߓߊߕߏ) ߟߋ߬ ߘߌ߫߸ ߊ߬ ߣߌ߫ ߖߘߍ߬ ߞߎ߲߬ߝߋ߲߬ (ߓߊߛߌ) ߓߊߕߏ ߟߎ߬߸ ߊ߬ ߣߌ߫ ߘߎ߬ߘߊ (ߛߐߘߊ) ߣߌ߫ ߡߐ߲ߠߌ߲߫ ߘߊߞߎ߲ ߠߎ߬߸ ߦߙߌߖߎߓߊ (ߖߟߊ ߣߌ߫ ߟߍ߲߬ߞߍ) ߟߎ߬߸ ߊ߬ ߣߌ߫ ߘߊ߲߬ߞߎ߲߬ߛߐ ߟߎ߬. ߊ߬ ߞߎߡߊ߫ ߟߊߛߎߘߎ߲ߧߊߓߟߏߡߊ߬ ߌߞߘߐ߫߸ ߡߐ߱ ߛߋ߫ ߘߴߊ߬ ߟߊ߫ ߖߌ߰ߦߊ ߟߊ߫ ߟߊ߫ ߝߋ߲ ߛߎ߯-ߎ-ߛߎ߯ ߘߐ߫ ߞߵߌ ߖߍ߬ߘߍ߫ ߞߊ߬ߙߌ߬ߝߊ߫ ߏ߬ ߟߊ߫ (ߞߵߊ߬ ߞߴߌ ߡߊ߰ߙߌ ߘߌ߫)߸ ߕߍ߰ߡߊ߬ߛߌ߰ ߕߴߌ ߡߵߏ߬ ߝߏߛߌ߬ ߘߐ߫.

ߡߍ߲ ߟߐ߬ߕߐ߫ ߦߋ߫ ߝߘߏ߬ߓߊ߬ ߖߏ (ߓߏߟߌ) ߟߎ߬ ߡߊ߬ ߛߊ߫, ߏ߬ ߟߎ߫ ߕߘߍ߬ ߦߋ߫ ߣߊ߯ߣߌ߲߫ ߠߎ߫ ߟߋ߬ ߘߌ߫ ߡߌ߬ߙߌ߲߬ߘߌ ߓߍ߯ ߕߘߍ߬ ߦߋ߫ ߡߍ߲ ߠߎ߬ ߓߊ߬ߕߏ߬ ߟߊ߫ ߞߐߘߍ߫. ߏ߬ ߟߎ߫ ߟߋ߬ ߕߘߍ߬ ߦߋ߫ ߞߐߘߐ߲ߓߊ ߣߌ߫ ߓߙߌ߬ߛߊ߬ ߣߌ߫ ߛߐߞߍ߬ ߣߌ߫ ߘߊ߲߬ߛߐ߬ ߟߎ߬ ߘߌ߫, ߡߍ߲ ߞߋ߬ߟߋ߲߬ߞߋ߬ߟߋ߲߬ߠߊ ߕߘߍ߬ ߦߋ߫ ߓߊ߬ߕߏ߬ ߟߴߊ߬ ߢߊ߬ߞߏ ߞߏߛߐ߲߬ ߢߌߣߌ߲ߞߏ ߟߎ߬ ߛߐ߬ߘߐ߲߬ ߞߊ߲ ߡߊ߬.

ߖߏ߬ ߓߟߋߓߟߋ ߡߍ߲ ߠߎ߬ ߕߘߍ߬ ߦߋ߫ ߡߊ߲߬ߘߋ߲߫ ߦߊ߲߬߸ ߏ߬ ߟߎ߬ ߦߙߌߞߊ ߕߘߍ߬ ߣߊ߯ߣߌ߲߫ ߠߋ߬ ߘߌ߫ ߡߍ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߕߘߍ߬ ߦߴߊ߬ ߢߊ߬ߞߏ߫ ߢߊ߬ ߟߊ߫߸ ߡߌ߬ߙߌ߲߬ߘߌ ߕߘߍ߬ ߦߴߏ߬ ߟߎ߫ ߓߊ߬ߕߏ߬ ߟߊ߫ ߞߊ߬ ߡߐ߰ߓߊ߬ ߛߟߐߡߌ߲ ߠߎ߬ ߖߊ߲߬ߛߊ߫ ߊ߬ ߣߌ߫ ߞߵߊ߬ߟߎ߫ ߕߙߊ߫߸ ߛߴߊ߬ߟߎ߫ ߘߌ߫ ߝߎ߬ߕߎ߲߬ߕߌ ߟߎ߬ ߘߐߞߏߦߊߕߏ߫ ߞߊ߬ ߤߙߍ ߟߊߛߴߊ߬ߟߎ߫ ߓߐ߲ߛߐ߲ ߠߎ߬ ߡߊ߬߸ ߏ߬ ߟߎ߬ ߡߍ߲ ߠߎ߬ ߦߴߊ߬ߟߎ߫ ߞߎ߲߬ߕߋߟߋ߲ ߠߎ߬ ߟߊߓߊ߬ߕߏ߬ ߟߴߊ߬ߟߎ߬ ߞߐ߫ ߦߊ߲߬߸ ߏ߬ ߟߎ߫ ߕߘߍ߬ ߦߋ߫ ߖߊ߲߬ߛߊ߬ ߟߊ߫ ߘߍ߱ ߟߎ߬ ߣߌ߫ ߥߏ߬ߙߏ ߟߎ߬ ߟߋ߬ ߟߊ߫߸ ߊ߬ ߣߌ߫ ߓߌߦߊ߲ ߝߊ߬ߓߏ߲ ߘߏ߫ (ߥߎ߬ߟߎ߸ ߓߊ߭߸ ߛߌ߬ߛߍ߸ ߣߌ߬ߛߌ߸ ߊ߬ ߣߌ߫ ߤߊߟߌ߬ ߡߐ߰ߣߍ߲߬ߝߌ߲) ߟߎ߫ ߤߊ߲߯ ߞߊ߬ ߣߊ߬ ߛߋ߫ ߡߐ߰ߣߍ߲߬ߝߌ߲ ߡߊ߬߸ ߏ߬ ߡߍ߲ ߢߌ߬ߣߊ߬ߓߐ߬ ߘߴߊ߬ ߘߐ߫ ߞߐ ߟߊ߫ ߞߙߎ߬ߞߊ߲߬ ߝߎߥߊ߫ ߜߊ߬ߙߊ ߓߟߏ߫, ߒ߬ߓߊ߬ ߓߏߟߌ ߏ߬ ߟߎ߫ ߝߟߍ߫:

• ߞߐߘߐ߲ߓߊ: ߏ߬ ߕߘߍ߬ ߦߋ߫ ߓߊ߬ߕߏ߬ ߟߊ߫ ߡߌ߬ߙߌ߲߬ߘߌ ߓߟߏ߫ ߟߋ߬ ߛߴߊ߬ ߘߌ߫ ߛߊ߲ߖߌ ߟߊߣߊ߬߸ ߞߊ߬ ߛߣߍ߬ ߛߎߡߊ߲ ߠߎ߬ ߟߊߛߐ߲߬߸ ߞߊ߬ ߡߊ߲߬ߛߊ߬ߟߊ ߟߊߞߊ߲ߘߊ߫ ߞߊ߬ ߓߐ߫ ߝߢߐ ߞߏߙߏ߲ ߠߎ߬ ߡߊ߬߸ ߛߊ߲ߜߊ߬ߟߌ߬ߡߊ ߟߎ߬ ߡߊ߬߸ .. ߊ߬ ߣߌ߫ ߛߎ߲ߞߎ߲ ߥߊ߬ߥߎߟߋ ߟߎ߬ ߓߍ߯ ߡߊ߬ ߞߐߘߍ߫.
• ߘߊ߲߬ߛߐ߰: ߏ߬ ߕߘߍ߬ ߦߋ߫ ߖߡߊ߬ߣߊ ߘߏ߲߬ߛߏ ߟߎ߬ ߟߊߞߊ߲ߘߊ߫ ߟߊ߫ ߞߊ߬ ߓߐ߫ ߞߏ߲ߞߏ߫ ߞߣߐߟߊ ߡߊ߲߬ߕߙߐ ߟߎ߬ ߡߊ߬߸ ߞߊ߬ ߝߟߍ߫ ߛߓߏ ߟߎ߬ ߝߣߊ߫ ߟߊߞߊ߲ߘߊ߫ ߕߌߢߍߟߌ ߟߎ߬ ߡߊ߬߸ ߞߊ߬ ߝߟߍ߫ ߞߍߟߊ ߟߎ߬ ߟߊߞߊ߲ߘߊ߫ ߛߊ߭ ߣߌ߫ ߜߎ߲߬ߜߎߘߎ߲ ߣߌ߫ ߕߙߐߦߊߞߏ ߓߍ߯ ߘߏ߫ ߡߊ߬. ߤߊ߲߯ ߓߋ߬ ߞߐߘߐ߲ߓߊ߫ ߕߐ߮ ߦߋ߫ ߡߍ߲߫ ߠߊ߫ ߛߊ߬ߡߊ ߘߐ߫ ߛߐ߲߬. ߟߊߒߡߊ߫ ߘߐ߫ ߣߌ߫ ߛߊ߲ ߞߟߎ߫ ߘߊ߫ ߛߊ߬ߡߊ ߘߐ߫ (ߞߘߌߞߘߌߞߘߌߞߘߌ߫߹߹߹), ߌ ߘߌ߫ ߞߊߡߋߙߋ߲߫ ߛߟߊ ߟߎ߬ ߞߊ߲ ߡߍ߲߫ ߞߏ߫ ߞߐߘߐ߲ߓߊ߫߸ ߞߐߘߐ߲ߓߊ߫߹ ߊ߬ ߞߊ߫ ߘߌߦߊ߫ ߘߋ߬.
• ߓߙߌ߬ߛߊ߬: ߏ߬ ߕߘߍ߬ ߦߋ߫ ߓߏ߬ߛߏ ߣߌ߫ ߛߡߐ߬ߣߐ ߣߌ߫ ߓߊߡߐ߮ ߟߎ߬ ߓߍ߯ ߟߊߞߊ߲ߘߊ߫ ߟߊ߫ ߞߊ߬ ߓߐ߫ ߖߌߞߘߐߝߋ߲ ߠߎ߬ ߡߊ߲߬ߕߙߐ ߡߊ߬ (ߓߊ߲߬ߓߊ ߣߌ߫ ߡߊ߬ߣߌ߲ ߠߎ߬)߸ ߞߵߊ߬ߟߎ߫ ߤߊ߬ߙߌ߬ߖߍ߮ ߦߙߌߥߊ߫ ߡߐ߲ߠߌ߲ ߘߐ߫߸ ߞߊ߬ ߖߊ߬ߓߊ ߟߎ߬ ߘߌߦߊ߫ ߊ߬ ߣߌ߫ ߞߐ߬ ߛߏߙߌ ߣߌ߫ ߓߊߞߘߏ߫ ߡߐ߲ ߠߎ߬ ߓߍ߯ ߘߌߦߊ߫.
• ߛߐߞߍ߬: ߏ߬ ߟߋ ߕߘߍ߬ ߦߋ߫ ߝߘߎ ߣߌ߫ ߓߎ߯ߟߌ ߣߌ߫ ߗߍ߬ߣߌ߬ߡߛߏ߬ߦߊ ߟߎ߬ ߡߊ߰ߙߌ ߘߌ߫߸ ߊ߬ ߣߌ߫ ߞߏ ߛߎ߯-ߎ-ߛߎ߯ ߟߐ߬ߣߍ߲߫ ߕߘߍ߬ ߦߋ߫ ߗ߭ߍ߭ ߟߎ߬ ߣߌ߫ ߡߏ߬ߛߏ ߟߎ߬ ߟߊ߫ ߢߐ߲߯ߠߊߛߐߘߐ߲߫ ߛߌߟߊ ߟߎ߬ ߘߌ߫.

ߟߊߒߡߊ߫ ߘߐ߫ ߣߌ߫ ߡߐ߱ ߘߏ߫ ߞߍ߫ ߘߊ߫ ߝߘߎ߫ ߞߏ ߘߐ߫߸ ߣߴߏ߬ ߥߊ߫ ߘߴߏ߬ ߟߴߊ߬ ߞߘߐ߫߸ ߣߴߏ߬ ߛߐ߬ߘߐ߲߬ ߘߴߊ߬ ߘߌ߫ ߥߴߊ߬ ߘߊߞߊ߲ ߏ߬ ߘߐߓߐ߫ ߛߐߞߍ߬ ߓߘߊ߸ ߥߟߴߊ߬ ߞߍ߫ ߘߊ߫ ߘߋ߲ߞߏ ߣߴߊ߬ ߟߊߡߎߣߎ߲ߧߊ ߛߎ߯-ߎ-ߛߎ߯ ߘߌ߫߸ ߥߟߊ߫ ߊ߬ ߦߴߊ߬ ߞߍ߫ ߞߏߢߌߡߊߟߐ߲ ߘߌ߫ ߞߏ߫: (ߒ߬ߓߊ߬ߘߍ߯ ߛߐߞߍ߬), ߡߍ߲ ߞߘߐ ߦߋ߫ ߞߊ߬ߞߎߘߊ ߡߊ߬ߣߌ߲߬ߞߊ߬ߞߊ߲ ߘߐ߫ ߞߏ߫ (ߛߐߞߍ߬ ߓߏߙߌߞߊ߫), ߘߐ߬ߝߐ ߞߎ߲߬ߕߊ߮ ߟߊߖߊ߲߰ߧߊ ߣߴߊ߬ ߕߊ߫߸ ߞߎߡߊ ߣߌ߲߬ (ߒ߬ߓߊ߬ߘߍ߫ ߛߐߞߍ߬) ߦߋ߫ ߡߍ߲߫ ߠߊ߫ ߡߊ߲߬ߘߋ߲߫ ߡߌߙߌ߲ߘߌ ߟߎ߬ ߞߣߐ߫ ߤߊ߲߯ ߓߌ߬.

ߘߎ߬ߘߊ ߦߋ߫ ߦߙߐ߫ ߟߊߕߏߣߍ߲ ߘߏ߫ ߟߋ߬ ߘߌ߫ ߡߊ߲߬ߘߋ߲߫ (ߕߏ߲ߕߌ߮) ߛߏ ߝߊ߲߬ߓߊ ߟߎ߬ ߓߟߏ߫߸ ߡߍ߲ ߠߎ߬ ߦߋ߫ (ߕߘߍ߬ ߦߋ߫) ߖߊ߬ߕߋ߬ ߟߊ߫ ߛߏ ߟߊߞߊ߲ߘߊߓߊ߮ ߣߴߊ߬ ߤߊ߬ߙߌ߬ߖߍ߮ ߝߎߟߋ߲߫ ߝߋ߲ ߠߎ߬ ߠߎ߬ ߡߊߞߍ߫ ߦߌߟߊ ߟߎ߬ ߘߌ߫. ߊ߬ ߘߏ ߟߎ߬ ߦߋ߫ ߖߌߡߊߛߌ߯ ߦߙߐ (ߖߌߞߎߘߎ߲ ߣߌ߫ ߘߎ߲߭ ߠߎ߬ ߣߌ߫ ߝߘߊ߫ ߥߏ ߟߎ߬...) ߟߎ߬ ߟߋ߬ ߘߌ߫. ߊ߬ߟߎ߫ ߝߊ߲߬ߓߊ ߛߐ ߦߋ߫ (ߕߘߍ߬ ߦߋ߫) ߞߍ߫ ߟߊ߫ ߛߊ߲߬ߞߎ߲߬ߓߍ߲ ߠߋ߬ ߘߌ߫߸ ߞߊ߬ ߓߌߦߊ߲ ߠߎ߬ ߞߊ߲ߠߊߕߍ߰ ߞߵߊ߬ߟߎ߬ ߘߊߥߎ߲߫߸ ߊ߬ ߣߌ߫ ߞߵߊ߬ߟߎ߫ ߝߊ߲߭ ߘߏ߫ (ߖߋ߬ߟߌ߸ ߞߎ߲߭ ߣߌ߫ ߜߍ߬ߟߍ߲ ߠߎ߬ ...) ߟߎ߫ ߓߌ߬ߟߊ߬ ߖߌ ߘߐ߫߸ ߖߌߘߐߝߋ߲ ߠߎ߬ (ߖߍ߮߸ ߓߊ߲߬ߓߊ߸ ߞߊߣߊ߲..) ߓߊ߯ ߕߐ߰ߡߊ߬ߛߙߋ ߡߍ߲ (ߣߴߊ߬ߟߎ߫ ߞߵߊ߬ ߘߊߥߎ߲߫ ߥߟߴߊ߬ߟߎ߫ ߡߴߊ߬ߟߎ߫ ߛߐ߲߬ ߊ߬ ߘߐ߫) ߦߌ߬ߘߊ߬߸ ߏ߬ ߟߋ ߦߋ߫ ߛߐߟߌ ߘߌߦߊ ߣߴߊ߬ ߜߏߦߊ ߟߎ߬ ߛߙߊߕߌ ߘߌ߫.

ߘߎ߬ߘߊ ߥߟߊ߫ ߛߐߘߊ ߘߏ߫ ߟߎ߫ ߦߋ߫ ߦߙߌߖߎ ߘߏ߫ ߟߎ߫ (ߖߟߊ ߣߌ߫ ߟߍ߲߬ߞߍ) ߟߋ߬ ߘߌ߫ ߛߐ߲߬ ߡߍ߲ ߠߎ߬ ߝߣߊ߫ ߦߋ߫ ߛߐ߫ ߟߊ߫ ߟߊ߲߬ߔߊ߰ߛߌ ߟߎ߬ ߓߟߏ߫ ߛߐ߲߬. ߞߊ߬ ߓߌߦߊ߲ ߠߎ߬ ߝߊ߰ ߞߵߊ߬ߟߎ߫ ߖߋ߬ߟߌ ߟߎ߬ ߞߴߊ߬ߟߎ߫ ߖߎ߭ ߝߍ߬ ߥߟߊ߫ ߊ߬ߟߎ߬ ߦߙߌߛߎ߲ ߠߎ߬ ߜߊ߲ߞߊ ߟߎ߬ ߟߊ߫. ߞߊ߬ ߞߎߡߊ ߟߎ߬ ߡߊߘߊ߲߫ (ߘߎ߬ߥߊ߬ߥߎ) ߡߍ߲ ߠߎ߬ ߘߌ߫ ߛߐߟߌߝߋ߲ ߏ߬ ߟߎ߬ ߤߌߣߊ ߕߊ߬ ߞߵߊ߬ ߟߊߛߋ߫ ߓߋ߲ߓߊ߫ ߝߎߙߋ ߟߎ߬ ߛߟߐߡߌ߲ ߠߎ߬ ߡߊ߬.

ߝߘߏ߬ߓߊ߬ ߕߊ ߏ߬ ߟߎ߬ ߣߴߊ߬ߟߎ߫ ߟߊߛߌߦߊߦߊ ߣߴߊ߬ ߕߊ߫߸ ߓߍ߯ ߝߣߊ߫ ߘߎ߲߬ߘߎ߬ߡߊ߬ ߕߊ߬ ߦߴߊ߬ ߓߟߏ߫߸ ߡߍ߲ ߦߴߊ߬ ߣߴߊ߬ ߓߟߏߝߋ߲ ߣߴߊ߬ ߟߊ߫ ߘߋ߲ߓߦߊ ߟߎ߬ ߟߊߞߊ߲ߘߊ߫ ߟߊ߫, ߏ߬ ߓߍ߯ ߞߋ߬ߟߋ߲߬ߞߋ߬ߟߋ߲߬ߠߊ ߣߴߊ߬ ߛߙߊߕߌ߫ ߣߴߊ߬ ߞߎ߬ߙߎ߲߬ߘߎ߫߸ ߡߍ߲ ߠߎ߬ ߞߊ߫ ߛߌߦߊ߫ ߞߊ߬ ߓߊ߲߫ ߞߵߊ߬ߟߎ߫ ߝߙߋߞߋ߫. ߝߘߏ߬ߓߊ߬ ߕߊ ߟߎ߬ ߡߊߓߌ߬ߟߊ ߣߴߊ߬ ߕߊ߫ ߛߊ߲ߡߊ߫ ߘߌ߯ߣߊ (ߛߌ߬ߟߡߊ߬ߦߊ ߣߴߌߛߟߊߞߊ) ߟߎ߬ ߓߟߏ߫߸ ߘߎ߲߬ߘߎ߬ߡߊ߬ ߕߊ ߟߎ߬ ߡߊ߫ ߛߋ߫ ߡߊߓߌ߬ߟߊ߬ ߟߊ߫ ߡߎߣߎ߲߬ ߢߊ߫ ߛߌ߫ ߡߊ߬.

ߞߏ ߛߎ߯ߦߊ ߓߍ߯ ߣߴߊ߬ ߕߊ߫ ߓߊߛߌ߫ ߟߋ߬ ߦߋ߫߸ ߏ߬ ߝߣߊ߫ ߓߍ߯ ߞߋ߬ߟߋ߲߬ߞߋ߬ߟߋ߲߬ߠߊ ߦߴߊ߬ ߢߊ߬ߞߏ ߢߊ߬ ߟߊ߫ ߞߊ߬ ߞߐߙߍ ߣߌ߫ ߟߎ ߣߌ߫ ߛߏ ߣߌ߫ ߖߡߊ߬ߣߊ ߟߎ߬ ߟߊߞߊ߲ߘߊ߫. ߊ߬ߟߎ ߖߋ߬ߓߌ ߦߋ߫ ߕߊ߬ ߟߴߊ߬ߟߎ߫ ߛߙߊߕߌ ߣߴߊ߬ ߛߊ߬ߙߌ߬ߦߊ ߟߎ߬ ߟߊߕߊ߲߬ߞߊ ߟߋ߬ ߡߊ߬߸ ߊ߬ߟߎ߫ ߖߐ߲ߝߐ߲ ߣߴߊ߬ߟߎ߫ ߛߙߊߕߌ߫ (ߞߊ߬ ߞߏ߫ ߕߌߢߍ߫) ߡߐ߰ ߡߊ ߝߣߊ߫ ߦߋ߫ ߕߊ߬ ߟߴߊ߬ߟߎ߫ ߛߙߊߕߌ ߟߎ߬ ߘߝߊߓߊߟߌߦߊ ߣߴߊ߬ߟߎ߫ ߡߊߛߐ߬ߛߐ ߟߋ߬ ߡߊ߬. ߏ߬ ߟߋ ߦߴߊ߬ ߞߍ߫ ߟߊ߫ ߡߐ߱ ߝߌ߬ߟߊ ߘߌ߫ ߓߊߛߌ߫ ߛߎ߯ ߞߋߟߋ߲߫ ߕߊ߬ ߛߍ߲߸ ߣߌ߫ ߡߍ߲ ߠߊ߫ ߛߙߊߕߌ߫ ߝߊ ߘߝߊ߫ ߘߊ߫ ߞߵߏ߬ ߟߊ߫ ߟߊ߬ߛߐ߲ ߣߌ߫ ߕߋߟߋ߲ ߠߎ߬ ߞߊ߲߬߸ ߏ߬ ߘߴߊ߬ ߘߍ߬ߢߐ߲߮ ߘߊ߲߬ ߘߊߞߎ߲ ߓߍ߯ ߘߐ߫.

ߓߊߛߌ߫ ߥߙߍߓߊߓߊ ߟߋ߬ ߦߋ߫ ߡߊ߲߬ߘߋ߲߫߸ ߥߟߊ߫ ߞߎ߲߬ߝߋ߲ ߛߌߦߊߡߊ߲ߓߊ ߟߋ߬ ߦߋ߫ ߦߊ߲߬ ߡߐ߰ ߞߋߟߋ߲߫ ߕߴߛߋ߫ ߡߍ߲ ߡߊߘߊ߲߫ ߠߊ߫ ߢߊ߫ ߛߌ߫ ߡߊ߬߸ ߊ߲ ߞߍߕߐ߫ ߦߴߏ߬ ߟߋ ߘߊߡߊ߲ߘߊߡߊ߲߫ ߛߓߍ߫ ߟߊ߫ ߦߊ߲߬ ߣߌ߲߬ ߛߊ߫ ߡߐ߰ ߟߎ߬ ߘߌ߫ ߛߐ߬ߘߐ߲߬߸ ߡߍ߲ ߠߎ߬ ߘߴߊ߲ ߘߍ߬ߡߍ߲߫ ߊ߬ ߓߟߏߟߊߕߎ߲߰ ߠߊ߫:

ߞߐ߲ߘߐߟߐ߲߸ ߛߊߘߌߞߏ߲ߘߋ߸ ߜߊ߬ߛߊ߸ ߞߙߎ߬ߛߌ߬ߞߏ߬ߙߏ߲߬ߣߍ߲ (ߛߙߏߓߊ)߸ ߞߏ߲ߞߏ߬ߣߌߜߊ߬ߘߊ߸ ߘߎ߬ߥߊ߸ ߘߊ߲ߞߊߓߊ߬ߟߌ߸ ߞߡߏ߬ߙߏ߬߸ ߖߊ߬ߛߏ߸ ߘߓߌ߬ߛߙߏ߸ ߛߊ߬ߛߙߏ߸ ߣߍߣߍߞߘߐ߫߸ ߖߊ߲߬ߓߊ߸ ߗߍ߬ߛߓߊ߬ߕߐ߲߸ ߡߌߛߊߜߊ߲ߣߊ߲߸ ߖߘߊ߬ߓߊ߸ ߞߎ߲߬ߜߘߋ߸ ߞߏ߲ߞߏߓߊ߫ ߛߙߏ߸ ߛߊ߰ߜߍߟߍ߲߸ ߣߊ߲ߞߏߟߏ߲ߞߊ߲ߘߊ߮߸ ߖߍ߬ߝߍߙߍ߲߸

ߝߘߏ߬ߓߊ߬ ߘߌ߯ߣߊ ߏ߬ ߟߎ߫ ߞߎ߲߬ߕߌ߮ ߟߋ߬ ߕߘߍ߬ ߦߋ߫ ߡߊ߲߬ߛߊ ߣߌ߫ ߝߊ߰ߡߊ ߟߎ߬ ߘߌ߫߸ ߊ߬ ߣߌ߫ ߟߊ߲߬ߔߊ߰ߛߌ ߟߎ߬. ߡߐ߱ ߟߋ߬ ߕߘߍ߬ ߦߋ߫ ߞߍ߫ ߟߊ߫ ߓߊ߬ߕߏ߬ ߞߎ߲ߕߌ߮ ߟߎ߬ ߘߌ߫ ߡߍ߲ ߕߋߟߋ߲ߣߍ߲߫߸ ߊ߬ ߟߊߛߐ߲ߣߍ߲߫߸ ߡߍ߲ ߞߊ߬ ߕߐ߲ ߣߌ߫ ߞߎ߬ߙߎ߲߬ߘߎ ߟߎ߬ ߟߐ߲߫ ߞߵߏ߬ ߟߴߊ߬ ߘߊߘߐߥߛߊ ߞߊ߲߬߸ ߛߊ߫ ߝߎ߬ߙߋ ߟߎ߬ ߛߟߐߡߌ߲ ߠߎ߬ ߘߴߊ߬ߟߎ߫ ߓߟߏ ߛߌ߰ ߘߌߦߊ߫ ߛߐߟߌ ߣߌ߫ ߖߌߓߐ߲ ߠߎ߬ ߞߘߐ߫߸ ߞߊ߬ ߛߋ߫ ߡߐ߰ߓߊ߬ ߝߎߙߋ ߟߎ߬ ߛߟߐߡߌ߲ ߠߎ߬ ߛߟߏ߬ߣߊ߬ ߟߊ߫ ߕߐ߲ ߠߎ߬ ߕߌߢߍߣߍ߲ ߞߐ߫߸ ߞߊ߬ ߛߋ߫ ߛߐߟߌߝߋ߲ ߠߎ߬ ߤߌߣߊߛߋ߫ ߟߊ߫߸ ߛߊ߫ ߥߐ߬ߞߎߟߐ ߣߌ߫ ߘߎ߬ߘߊ ߟߎ߬ ߘߌ߫ ߘߌ߬ߢߍ߬ ߞߊ߬ ߞߎ߲߬ߠߊ߲߬ߜߏߦߊ ߡߊߕߊ߯ ߝߊ߬ߛߏ ߟߊ߫ ߞߊ߬ ߞߎ߬ߠߊ߬ߘߌߦߊ ߟߎ߬ ߟߊߘߏ߲߬.

ߞߎ߲߬ߕߌ߮ ߝߣߊ߫ ߦߋ߫ ߟߊߥߟߌ߬ ߟߊ߫ ߕߐ߲߫ ߕߌߢߍ ߟߋ߬ ߡߊ߬߸ ߥߟߊ߫ ߖߌߓߐ߲ ߠߎ߬ ߡߌ߬ߣߊ߬ߓߊߟߌߦߊ (ߜߏߦߊ)߸ ߛߌ߰ߘߊ ߜߟߍ߬ߦߊ (ߛߊ߲ߖߌ߫ ߣߓߊߟߌߦߊ ߣߌ߫ ߜߟߍ߬ߦߊ ..)߸ ߏ߬ ߟߎ߬ ߝߣߊ߫ ߟߊߥߟߌ߬ ߞߊ߲ ߕߘߍ߬ ߦߋ߫ ߞߍ߫ ߟߊ߫ ߟߋ߬ ߞߏ߫ (ߞߊ߬ߘߌ߬ߛߊ߬ ߓߘߴߊ߬ ߕߣߊ߬ߟߊߕߍ߰).

ߞߊ߬ߦߌ߯ ߡߐ߰ߓߊ ߟߎ߬ ߞߊ߬ ߕߐ߲ ߣߌ߫ ߞߎ߬ߙߎ߲߬ߘߎ ߡߍ߲ ߠߎ߬ ߛߌ߰ ߞߊ߬ߦߌ߯ ߒ߬ ߠߊ߫ ߓߏߟߌ ߣߌ߫ ߞߎ߲߬ߝߋ߲ ߠߎ߬ ߟߊߘߊ߲߫ ߕߎߡߊ ߟߎ߬ ߟߊ߫߸ ߏ߬ ߟߎ߫ ߟߋ߬ ߦߋ߫ ߒ߬ ߠߊ߫ ߓߏߟߌ ߓߍ߯ ߞߊ߲߬ ߡߎߣߎ߲߬ ߞߙߍߕߍߕߍ߫; ߊ߬ ߕߐ߲ ߝߊ߲߬ߓߊ ߓߍ߯ ߘߏ߲߬ ߦߋ߫ ߛߌߟߊ߫ ߕߋߟߋ߲ߣߍ߲ ߜߊ߲߰ߛߊ߲ ߠߎ߬ ߟߋ߬ ߘߌ߫߸ ߡߍ߲ ߠߎ߬ ߟߊߓߊ߬ߕߏ ߘߌ߫ ߘߍ߭ ߛߓߊ߬ߕߌ߫ ߞߊ߬ ߓߍ߯ ߟߐ߬ ߕߋߟߋ߲߫ ߠߊ߫ ߞߊ߬ ߕߋߟߋ߲ߓߊߟߌߦߊ ߡߊߕߊ߲߬ߞߊ߫.

• ߞߊ߬ߣߌ߲ (ߢߊ߬ߡߐ߰ߦߊ): ߡߊ߲߬ߘߋ߲߫ ߣߊߡߎ߲ ߠߎ߬ ߕߊ߬ߣߊ ߘߏ߫ ߟߋ߬ ߦߋ߫ ߢߊ߬ߡߐ߰ߦߊ ߘߌ߫, ߣߴߌ ߓߊ߲߫ ߘߴߊ߬ߟߋ ߕߊ߬ ߟߊ߫߸ ߌ ߕߴߌ ߟߊ߫ ߟߊ߫ ߡߛߏ߬ ߜߘߍ߫ ߝߍ߬ ߗߍ߬ߣߌ߬ߡߛߏ߬ߦߊ ߟߴߏ߬ ߞߐ߫ ߝߴߌ ߝߘߎ߫ ߡߛߏ, ߒ߬ߓߊ߬ ߣߴߌ ߞߵߏ߬ ߟߋ ߝߘߏ߬ ߛߊ߫߸ ߌ ߘߴߏ߬ ߟߐ߲߫ ߌ ߝߍ߬ߞߏ ߟߎ߬ ߡߊ߬߸ ߊ߬ ߘߏ߫ ߟߎ߫ ߝߊ߲߭ ߦߋ߫ ߡߐ߱ ߝߊ߰ ߟߊ߫ ߟߋ߬.

• ߖߊ߲߬ߝߊ߬: ߡߊ߲߬ߘߋ߲߫ ߓߊߛߌ ߝߊ߲߬ߓߊ ߕߊ߬ߣߊ ߟߋ߬ ߦߋ߫ ߖߊ߲߬ߝߊ ߘߌ߫, ߣߴߌ ߞߵߊ߬ ߞߍ߫߸ ߌ ߕߴߊ߬ ߡߍ߲߫ ߠߊ߫ ߘߋ߬߸ ߌ ߦߴߊ߬ ߦߋ߫ ߟߊ߫ ߟߋ߬.

• ߥߎߦߊ: ߡߊ߲߬ߘߋ߲߬ ߓߏߟߌ ߟߎ߬ ߕߊ߬ߣߊ ߟߋ߬ ߦߋ߫ ߥߎߦߊ߫ ߝߐ ߘߌ߫, ߣߴߌ ߞߵߏ߬ ߞߍ߫ ߓߊ߬߸ ߊ߬ ߘߌ߫ ߘߏ߲߬ ߌ ߝߍ߬ ߌ ߟߊ߫ ߞߏ ߓߍ߯ ߘߐ߫.

ߞߵߊ߬ ߕߘߍ߬ ߡߊ߲߬ߘߋ߲ ߠߎ߬ ߟߊ߫ ߛߟߐߡߌ߲ߞߏ ߦߴߊ߬ ߕߊߥߛߎߕߊ ߘߐ߫، ߊ߬ ߕߘߍ߬ ߦߋ߫ ߒ߬ ߓߋ߲ߓߊ ߟߎ߬ ߞߎ߲߭ ߘߐ߫ ߟߋ߬ ߞߏ߫ ߡߐ߰ߓߊ߬ ߝߎߙߋ ߟߎ߬ ߛߟߐߡߌ߲ ߠߋ߬ ߦߴߊ߬ߟߎ߫ ߟߊߞߊ߲ߘߊ߫ ߟߊ߫ ߞߵߊ߬ߟߎ߫ ߛߐ߫ ߤߙߊ߫ ߟߴߊ߬ ߣߌ߫ ߞߵߊ߬ߟߎ߫ ߓߐ߫ ߞߏ߫ ߓߟߏ߫. ߏ߬ ߟߋ ߦߴߊ߬ ߞߍ߫ ߟߴߊ߬ ߝߐ߫ ߟߊ߫ ߛߊ߲߬ߘߊ ߘߐ߫ ߞߏ߫: (ߒ ߝߊ߬ ߝߎ߬ߙߋ ߛߐ߫߸ ߒ ߓߋ߲ߓߊ߫ ߝߎ߬ߙߋ ߦߴߊ߬ ߝߐ߫ ߞߴߊ߬ ߦߴߏ߬ ߡߌ߬ߘߊ߬ ߟߊ߫ ߒ ߠߊ߫). ߊ߬ ߣߴߊ߬ߟߎ߫ ߞߵߊ߬ ߖߌ߰ ߟߋ߫ ߞߏ߫ ߛߟߐߡߌ߲ ߠߎ߬ ߦߴߊ߬ߟߎ߫ ߡߊߛߌ߬ ߟߊ߫ ߛߎ߲ߞߎ߲ ߘߌ߲߬ߞߌ߬ߙߊ ߟߎ߬ ߟߋ߬ ߘߐ߫، ߏ߬ ߟߋ ߞߵߊ߬ߟߎ߫ ߟߐ߬ ߏ߬ ߟߎ߫ ߖߊ߲߬ߛߊ߬ ߟߊ߫ ߛߐ߲ߞߎ߲ ߘߌ߲߬ߞߌߙߊ (ߖߌ߫ ߞߎߘߎ߲߫߸ ߦߙߌߖߎ߫ ߓߊ ߟߎ߬߸ ߞߙߎ߬ߞߎ߲ ߠߎ߬߸ ߊ߬ ߣߴߏ߬ ߟߎ߫ ߕߊ߬ߣߊ߫) ߟߎ߬ ߘߐ߫. ߏ߬ ߛߐߟߌ ߟߎ߬ ߘߏ߲߬ ߓߊ߯ ߞߴߌ ߘߐ߫ ߛߐ߲߬߸ ߛߟߐߡߌ߲ ߠߎ߬ ߕߐ߰ߡߊ߬ߛߙߋ ߦߋ߫ ߟߊߞߏߟߐ߲ ߠߴߏ߬ ߛߌߦߊߡߊ߲߫ ߘߐ߫. ߣߛߌ߬ ߞߎ߲ ߘߴߛߋ߫ ߞߢߊ߬ ߟߊ߫ ߖߌ߰ ߟߊ߫ ߖߌ ߞߘߐ߫ ߓߴߊ߬ ߡߊߕߍ߰ߣߍ߲߫ ߞߊ߲ ߡߍ߲ ߠߊ߫ ߏ߬ ߕߍ߫ ߕߎ߬ߢߊ߬ ߘߌ߫ ߥߟߊ߫ ߣߊߡߙߊ ߣߌ߫ ߞߘߊ ߣߌ߫ ߖߊ߲߬ߝߊ ߟߎ߬ ߦߴߊ߬ ߘߐ߫߸ ߊ߬ ߣߵߏ߬ ߟߎ߫ ߕߣߊ߬.

ߏ߬ ߟߋ ߦߴߊ߬ ߞߍ߫ ߟߊ߫ ߘߏߕߌ߰ ߓߴߊ߬ ߟߌ߬ߤߟߊ ߣߴߊ߬ ߝߍ߬ߞߏ ߟߎ߬ ߞߙߐ߬ߛߌ߫ ߞߵߊ߬ ߦߴߊ߬ ߕߴߊ߬ ߥߊߢߊ߫ ߞߘߐ ߡߊ߬، ߣߴߏ߬ ߛߋ߫ ߘߊ߫ ߞߏ߫ ߦߋߟߊ ߟߎ߬ ߝߍ߬߸ ߏ߬ ߟߎ߬ ߘߴߊ߬ ߝߛߍ߬ߝߛߍ߬ ߟߊ߫ ߝߎߚߎ߫ ߞߵߊ߬ ߦߴߏ߬ ߕߌ߰ ߓߘߊ߫ ߡߐ߰ߓߊ (ߝߎߙߋ) ߟߎ߬ ߟߊ߫ ߛߙߊ߬ߒ߬ߞߊ߲߬ߠߊ ߘߏ߫ ߕߴߦߋ߲߬߸ ߟߊ߬ߤߘߌ ߘߏ߫ ߕߌߢߍ߫߸ ߤߊߡߊ߲ߕߍ߫ ߞߏ ߘߏ߫ ߘߏ߲߬ߣߍ߲߫ ߊ߬ ߣߌ߫ ߝߎ߬ߙߋ ߘߏ߫ ߕߍ߫ ߡߍ߲ ߓߘߴߊ߬ ߞߐߝߍߣߍ߲߫ ߏ߬ ߕߌ߬ߟߊ߬ߡߐ߮ ߡߊ߬، ߊ߬ ߦߋ߫ ߝߐ߫ ߟߴߏ߬ ߛߎ߮ ߡߊ߬ ߟߋ߬ ߞߏ߫ "ߝߎ߬ߙߋߞߏ" ߦߴߊ߬ ߘߐ߫. ߏ߬ ߛߟߏ߬ߣߊ߬ߟߌ ߘߌ߫ ߞߴߊ߬ߟߎ߫ ߓߟߏ߫ ߞߵߏ߬ ߖߌ ߓߐ߲߬ ߓߐ߲߬ ߘߎ߱ ߡߊ߬، ߞߏ߬ߣߌ߲߬ ߦߋ߫ ߞߍ߫ ߟߊ߫ ߖߐ߲߬ߞߊ߬ߣߌ߲߬ߞߊ߲ ߣߌ߫ ߖߘߍ߬ ߟߛߊ߬ߦߌߞߊ ߣߌ߫ ߡߐ߰ߓߊ߬ ߝߎߙߋ ߟߎ߬ ߛߟߏ߬ߣߊ߬ߞߊ߲ ߜߊ߲߰ߛߊ߲ ߠߋ߬ ߘߌ߫. ߊ߬ ߘߏ߲߬ ߖߌ ߟߊߓߐ߲߬ ߞߎ߲ ߕߍ߫ ߘߏ߫ ߜߘߍ߫ ߘߌ߫ ߘߎ߱ ߡߊ߬ ߝߏ߫ ߞߵߊ߬ ߟߊߥߟߌ߬ ߛߴߊ߬ ߤߌߣߊ ߘߌ߫ ߛߋ߫ ߝߎ߬ߙߋ ߟߎ߬ ߡߊ߬ ߛߎ߬ߟߊ߫.

ߊ߬ ߕߘߍ߬ ߊ߬ߟߎ߫ ߞߎ߲߭ ߘߐ߫ ߝߣߊ߫ ߞߏ߫ ߡߐ߱ ߓߊ߯ ߛߊ߬ ߛߏ ߥߟߊ߫ ߖߡߊ߬ߣߊ ߘߏ߫ ߘߐ߫، ߊ߬ ߘߌ߫ ߥߛߎ߬ ߞߍ߫ ߞߊ߬ ߣߊ߬ ߕߏ߫ ߥߟߌ߬ ߟߊ߫ ߘߎ߰ ߜߘߍ߫ ߟߊ߫. ߛߌ߬ߟߡߊ߬ߦߊ ߣߴߌߛߟߊߞߦߊ ߟߎ߬ ߝߏ߲߬ߝߏ߲߬ߠߊ ߟߊߥߊ߬ߙߊ ߣߴߊ߬ ߕߊ߫، ߏ߬ ߦߋ߫ ߡߐ߱ ߘߏ߫ ߟߎ߫ ߞߎ߲߭ ߘߐ߫ ߡߊ߲߬ߘߋ߲߫ ߞߊ߬ߝߏ߬ߓߏߟߏ߲ ߘߏ߫ ߟߎ߫ ߞߏ߲ߞߏ߫ ߞߣߐߟߊ ߟߎ߬ ߘߐ߫ ߤߊ߲߯ ߓߌ߬. ߒ߬ ߘߴߏ߬ ߞߊ߬ߝߏ߬ߓߏߟߏ߲ ߘߏ߫ ߟߎ߫ ߘߊ߲߬ߕߍ߱ ߦߊ߲߬، ߏ߬ ߟߎ߫ ߟߋ߬ ߦߋ߫ ߞߙߊ߬ߜߊ߬ ߖߡߊߣߊ ߣߌ߫ ߡߊ߰ߣߊ߫ ߖߡߊߣߊ ߟߎ߬ ߘߌ߫. ߏ߬ ߟߎ߬ ߦߋ߫ ߒߞߏ߫ ߝߐߟߊ ߘߏ߫ ߟߎ߫ ߟߋ߬ ߘߌ߫ ߟߐ߰ߟߊ߫ ߡߙߊ߬ߓߊ߰ߘߊ ߞߣߐ߫.

This article is a stub. You can help Wikipedia by expanding it.