சாரீன் கான்

சாரீன் கான்(Zareen Khan) [பிறப்பு: 14 மே, 1987] இந்தித் திரைப்படங்களில் நடிக்கும் இந்திய நடிகை ஆவார். இவர் தமிழ் மற்றும் பஞ்சாபி மொழித் திரைப்படங்களிலும் நடித்துள்ளார். 2010 ஆம் ஆண்டில் அனில் சர்மா இயக்கிய வீர் என்னும் திரைப்படத்தில் சல்மான்கானின் இணையாக நடித்தார். இத்திரைப்படம் ஜீ தொலைக்காட்சியின் விருதிற்குப் பரிந்துரைக்கப்பட்டது. இவர் நடிப்பில் வெளியான ஹவுஸ்புல் 2 என்னும் திரைப்படம் வணிக ரீதியில் வெற்றி பெற்ற திரைப்படமாகும். 2013 ஆம் ஆண்டில் நான் ராஜாவாகப் போகிறேன் என்னும் தமிழ்த் திரைப்படத்தில் சிறப்பு வேடத்தில் தோன்றினார்.

சாரீன் கான் 14 மே, 1987 ஆம் ஆண்டு மஹாராஷ்டிரத்தின் மும்பை நகரில் பிறந்தார். இவர் இஸ்லாமிய பஷ்தூன் இனத்தினைச் சார்ந்தவர் ஆவார்.^[1][2][3] இவர் இந்தி, உருது, ஆங்கிலம், மராத்தி மற்றும் பஷ்தூன் ஆகிய மொழிகளைப் பேசும் திறமையுடையவர் ஆவார்.^[4][5] மும்பையிலுள்ள ரிஸ்வி அறிவியல் கல்லூரியில் கல்வி பயின்றார்.

மருத்துவராக ஆசைப்பட்டு பின்னர், நடிகையானவர் சரீனா கான். சுபாஷ் கய் உருவாக்கிய யுவ்ராஜ் திரைப்பட படப்பிடிப்புத் தளத்திற்கு சாரீன் கான் சென்றபோது இவரைப் பார்த்த சல்மான் கான் அவரது நண்பரான அனில் சர்மாவிடம் பேசி இவரை நடிகையாக வீர் என்னும் திரைப்படத்தில் நடிக்க வைத்தார்.^[6] இத்திரைப்படத்தில் இளவரசி யசோதையாக நடிப்பதற்கு சல்மான் கான் பரிந்துரைத்தார். அதன் பொருட்டு அக்கதாப்பாத்திரத்திற்காக தன் உடல் எடையை எட்டு கிலோகிராம்கள் அதிகரித்தார்.^[7] ஆங்கிலேய ஆதிக்கத்தின் கீழான இந்தியாவினைச் சித்தரிக்கும் விதமாக எடுக்கப்பட்ட இத்திரைப்படம் வணிக ரீதியில் வெற்றி பெறவில்லை. ஆனால் இவரது நடிப்பு மக்களாலும் விமர்சகர்களாலும் குறிப்பிடப்பட்டது. இந்தித் திரைப்படம் தவிர்த்து பிற மொழிப்படங்களில் இவர் நடித்து முதலில் வெளியானது ஜாட் ஜேம்ஸ் பாண்ட் என்னும் பஞ்சாபி மொழித் திரைப்படமாகும். இத்திரைப்படம் 2014 ஆம் ஆண்டில் வெளியானது. இதில் லல்லி என்னும் வெகுளியான கிராமத்துப் பெண்ணாக நடித்திருந்தார். இத்திரைப்படத்தில் இவரது நடிப்பு விமர்சகர்களால் பாராட்டப்பட்டது. சாரீன் கான், விருதினைப் பெறும் அளவிற்கு சிறப்பாக நடித்துள்ளார் என திரைப்பட விமர்சகர் கோமல் நாக்தா குறிப்பிட்டார்.^[8][9] தமிழ்த் திரைப்பட இயக்குநர் வெற்றிமாறன் இயக்கத்தில் நான் ராஜாவாகப் போகிறேன் திரைப்படத்தில் ஒரு பாடலுக்கு சிறப்புத் தோற்றத்தில் தோன்றினார்.