பிரம்மா.காம்

பிரம்மா.காம் 2017 ஆம் ஆண்டு நகுல் மற்றும் ஆஷ்னா சவேரி நடிப்பில், விஜயகுமார் இயக்கத்தில், சித்தார்த் விபின் இசையில் வெளியான தமிழ் திரைப்படம்^[1].

காமேஸ்வரன் (நகுல்) திறமையான விளம்பரப் பட இயக்குநர். வணங்காமுடியின் (ராஜேந்திரன்) நிறுவனத்தில், முதன்மைப் பொறுப்பில் உள்ள ராமேஸ்வரனின் (சித்தார்த் விபின்) கீழ் வேலை பார்க்கிறான் காமேஷ். காமேஷின் உறவினர்தான் ராமேஸ்வரன். ராமுவை விட திறமையானவனாக இருந்தாலும் காமேஷ் செய்த சிறு தவறால் அவனுக்கு கிடைக்க வேண்டிய பதவி உயர்வு ராமேஸ்வரனுக்குக் கிடைத்திருக்கிறது. தன்னுடைய வாழ்க்கை தான் நினைத்தது போல இல்லையென்று இறைவன் பிரம்மனைத் திட்டிக் கொண்டே இருக்கிறான் காமேஷ். காமேஷும் விளம்பரப் பட நடிகை மனிஷாவும் (ஆஷ்னா சவேரி) காதலர்கள்.

காமேஷ் தன் பிறந்த நாளன்று கோயிலுக்கு செல்கிறான். கோயில் மூடவேண்டிய நேரமாகிவிட்டதால் அங்குள்ள பிரம்மனின் சன்னதியில் வழிபட்டுச்செல்லுமாறு கூறுகிறார் அர்ச்சகர். பிரம்மனிடம் சென்று தன்னுடைய குறைகளை எல்லாம் சொல்லி, அவற்றை நீக்கி தனக்கு ஒரு நல்ல வாழ்க்கை அமைய அருள்புரியுமாறு கேட்கிறான். அடுத்த நாள் அவனது முகநூல் கணக்கிற்கு "பிரம்மா" என்ற பெயரில் ஒரு நட்பழைப்பு வருகிறது. யாரோ தன்னிடம் கேலி செய்து விளையாடுகிறார்கள் என்றெண்ணி அந்த நட்பாலைப்பை ஏற்றுக்கொண்டு பிரம்மாவுடன் உள்பெட்டியில் உரையாடுகிறான். தான் உண்மையிலேயே கடவுள் பிரம்மா என்பதை நிரூபிக்க காமேஷ் கேட்டவாறு அவனது குழந்தைப்பருவ வாழ்க்கையில் நிகழ்ந்த நிகழ்வுகள் முதல் இப்போதுவரையிலான பல்வேறு புகைப்படங்களை அனுப்பி தன்னை கடவுள் என்று நிரூபிக்கிறார். அதிர்ச்சியடையும் காமேஷ் இதுபற்றி தன் நண்பர்கள் ஜெகன் மற்றும் மாயாவிடம் தெரிவிக்கிறான். அவர்களும் பிரம்மாவிடம் தங்கள் குழந்தைப் பருவ புகைப்படங்களைக் கேட்க அவர்களுடைய புகைப்படங்களையும் அனுப்புகிறார். அனைவரும் ஆச்சர்யமடைகின்றனர்.

மாயா எதிர்பாராவிதமாக மடிக்கணினியில் ஒரு பொத்தானை அழுத்திவிட காலம் ஓராண்டு பின்னோக்கிச் செல்கிறது. அதாவது சரியாக காமேஷ் செய்த தவறால் அவனது பதவி உயர்வு பாதிக்கப்பட்ட தினத்திற்குச் செல்கிறது. காமேஷ் இந்த வாய்ப்பை சரியாக பயன்படுத்தி அவன் நினைத்ததுபோல் நிறுவனத்தில் பதவி உயர்வு பெறுகிறான். ஆனால் அதன்பின் ஏற்படும் பிரச்சனைகளை எவ்வாறு சமாளித்தான் என்பது மீதிக்கதை.

• நகுல் - காமேஸ்வரன்
• ஆஷ்னா சவேரி - மனிஷா
• நீது சந்திரா - நீது சந்திரா
• சித்தார்த் விபின் - ராமேஸ்வரன்
• கே. பாக்யராஜ் - குருக்கள்
• ராசேந்திரன் - வணங்காமுடி
• ஜெகன் - ஜெகன்
• சோனா ஹெய்டன் - வணங்காமுடியின் மனைவி
• கௌசல்யா - காமேஸ்வரனின் தாய்
• எம். ஜே. ஸ்ரீராம் - பரமேஸ்வரன்
• கார்த்திகேயன்
• சுமிதா ஹசாரிகா
• உபசனா ஆர். சி - மாயா

விகடன்: பக்தனுக்கு முகநூல் வழியே வரம் தரும் கடவுள் என்ற கரு நன்றாகத்தான் இருக்கிறது^[2].

தினமலர்: பிரம்மா.காம் - பிரமிப்பில்லை^[3].

1. ↑ "பிரம்மா.காம்".
2. ↑ "விமர்சனம்".
3. ↑ "விமர்சனம்".

• பிரம்மா.காம்