தமிழர் வாழ்வோட்ட சடங்குகள்

ஒரு மனிதனின் வாழ்வில் நிகழும் முக்கிய நிகழ்வுகளைக் குறித்து ஒவ்வொரு சமூகமும் அது தொடர்பான சடங்குகளைக் கொண்டிருக்கிறது. இத்தகைய சடங்குகள் சமய சார்புடையதாகவே உள்ளது. இருப்பினும் ஒரு சில நிகழ்வுகள் இனங்களை பொறுத்தும் அமைகின்றன. எடுத்துக்காட்டாக உணர்ச்சி வெளிப்படுத்தப்படும் முறை, பாடப்படும் பாடல்கள், கொண்டாட்ட முறைகள் ஆகியன. பிறப்பு, பூப்பு, திருமணம், இறப்பு ஆகிய நிகழ்வுகளில் தமிழர் மத்தியில் பொதுவாகவும், சமயம் சார்ந்தும் காணப்படும் சில சடங்குகளை தமிழர் வாழ்வோட்ட சடங்குகள் எனலாம்.

வாழ்க்கை வட்டச் சடங்குகள்

வாழ்க்கை வட்டச் சடங்கள் என்பது பிறப்பு, பூப்பு, திருமணம், இறப்பு என்ற அடிப்படை வாழ்வியல் நிகழ்வுகளை கொண்டு அமைக்கப்பட்டவை ஆகும். நாட்டார் சடங்குகளை ஆய்வு செய்த முத்தையா சடங்குகள் என்பது வாழ்வில் அடுத்தடுத்து நிகழும் ஒவ்வொரு நிலை மாற்றமும் ஒரு சடங்கு நிகழ்வோடு பண்பாட்டு வயப்படுத்துவது என்று குறிப்பிடுகிறார்.