Барыс Маркавіч Шпенцар

Барыс Маркавіч Шпенцар
Барыс Маркавіч Шпенцар
Дата нараджэння	3 красавіка 1890
Месца нараджэння	Херсон, Херсонскі павет[d], Херсонская губерня, Расійская імперыя;
Дата смерці	3 красавіка 1938 (48 гадоў)
Месца пахавання	Расстрэльны палігон «Камунарка»;
Грамадзянства	Расійская імперыя; СССР;
Род дзейнасці	хімік
Навуковая сфера	тэхнічная хімія[d]
Месца працы	Навукова-даследчы фізіка-хімічны інстытут імя Л.Я. Карпава[d]; Інстытут хіміі АН БССР;
Навуковая ступень	доктар хімічных навук (1934)
Навуковае званне	прафесар; член-карэспандэнт АН БССР;
Альма-матар	Імператарскі Наварасійскі ўніверсітэт[d];

Барыс Маркавіч Шпе́нцар (3 красавіка 1890, Херсон — 3 красавіка 1938) — вучоны ў галіне хімічнай тэхналогіі. Доктар хімічных навук (1934), прафесар (1932), член-карэспандэнт АН БССР (1936).

Біяграфія

Нарадзіўся 3 красавіка 1890 г. у Херсоне ў сям’і прыказчыка. Скончыў Імператарскі Новарасійскі ўніверсітэт, Маскоўскі тэхналагічны інстытут і два курсы чырвонай прафесуры. Актыўна ўдзельнічаў у рэвалюцыйным руху. У час Грамадзянскай вайны працаваў у савецкіх партыйных органах Украіны.

З 1924 па 1927 гады — ў маскоўскім Хімічным інстытуце ім. Л. Я. Карпава і адначасова быў дырэктарам хімічнай прамысловасці ВСНГ РСФСР.

У 1932—1934 гг. — член прэзідыума і вучоны сакратар Камітэта хімізацыі СССР.

З 1935 па 1937 г. жыў і працаваў у Беларусі. У гэтыя гады ён займаў пасаду старшыні Савета па вывучэнні прадукцыйных сіл БССР і паралельна кіраваў сектарам хімічнай тэхналогіі Інстытута хіміі АН БССР.

14 ліпеня 1937 г. быў арыштаваны. 3 красавіка 1938 г. па абвінавачанні ва ўдзеле ў контррэвалюцыйнай тэрарыстычнай арганізацыі асуджаны да выключнай меры пакарання. Расстраляны 3 красавіка 1938 г. Рэабілітаваны 28 лістапада 1956 г. Ваеннай калегіяй Вярхоўнага суда СССР.

Займаўся арганізацыяй новых хімічных вытворчасцей у СССР, удзельнічаў у арганізацыі вытворчасці буры, борнай кіслаты, жоўтага фосфару і шэрагу хімічна чыстых прэпаратаў, вывучаў эканоміку хімічнай прамысловасці і тэхналагічнай хімічнай вытворчасці.

Аўтар больш за 30 навуковых прац.

Асноўныя працы

Торф и его использование в народном хозяйстве: (труды апрельской сессии 1934 г. Белорусской академии наук) / Белорусская академия наук, Институт торфа. — Минск : Издательство Белорусской академии наук, 1935. — 515, [2] с.
Геоботанический анализ торфа. — Минск : Издательство Белорусской АН, 1935. — 80 с.