Берлінская абсерваторыя

Берлінская абсерваторыя (ням.: Berliner Sternwarte) — абсерваторыя, якая існавала ў 1711—1913 гадах у тагачасных прыгарадах Берліна, код Цэнтра малых планет: 548. Пазней абсерваторыя перамясцілася ў Бабельсберг.

Праект стварэння дзяржаўнай абсерваторыі ў Прусіі з’явіўся ў 1700 годзе, калі была заснавана, па ініцыятыве Лейбніца, Пруская акадэмія навук. Але з-за недастатковага фінансавання акадэмія доўгі час была вымушана выкарыстоўваць невялікую прыватную абсерваторыю ў Берлінскім прыгарадзе. Толькі ў 1835 годзе пачалося будаўніцтва спецыяльнага будынка ў раёне Фрыдрыхштат, па праекце Карла Фрыдрыха Шынкеля. Першым дырэктарам новай абсерваторыі стаў Іаган Франц Энке (фармальна — з 1825 года). Ён жа кіраваў выпускам астранамічнага альманаха «Berliner astronomisches Jahrbuch».

З-за росту горада ўмовы астранамічных назіранняў пагаршаліся, і ў 1913 годзе асноўная частка абсерваторыі перамясцілася ў Бабельсберг (код Міжнароднага астранамічнага саюза: 536).

З 1992 года кіраванне абсерваторыяй ажыццяўляе Патсдамскі астрафізічны інстытут.