Брэслаў (карная аперацыя)

Аперацыя «Брэслаў»
Асноўны канфлікт: Другая сусветная вайна, Вялікая Айчынная вайна
Дата	5—19.9.1942
Месца	Быхаўскі раён
Прычына	Прысутнасць узброеных савецкіх партызанскіх падраздзяленняў у тыле групы армій «Цэнтр»
Статус	аперацыя завершана
Праціўнікі
Трэці рэйх:  СССР:

Аперацыя «Брэслаў» (ням.: Unternehmen Breslau) (у некаторых крыніцах №36) — кодавая назва карнай аперацыі нямецкіх войск у Быхаўскім раёне 5—19 верасня 1942 года. Мэта — акружэнне і знішчэнне партызан і «ўціхамірванне» раёна абапал шашы і чыгункі Магілёў — Рагачоў.

Аперацыя праводзілася сіламі 5 батальёнаў вермахта, магчыма, падраздзяленнямі 2-га палявога вучэбнага палка ВПС, які знаходзіўся ў Быхаве, дапаможнымі паліцэйскімі падраздзяленнямі. Яшчэ 28 жніўня 1942 года кіраўніцтва паліцыі бяспекі і СД на Беларусі з непакоем паведамляла аб дзёрзкіх і выніковых ударах добра ўзброеных і абучаных партызан па нямецкіх гарнізонах у вёсках Прыбар і Ніканавічы. У ходзе аперацыі каля вёскі Ухлясць карнікі зноў атрымалі адпор, адзначыўшы ў сваіх данясеннях працяглы бой з буйным падраздзяленнем «у вайсковай экіпіроўцы». Назва партызанскага фарміравання, якое дзейнічала ў гэтым раёне ў жніўні — верасні 1942 года не ўстаноўлена, магчыма гэта былі спецыяльныя дэсантныя групы. Акружыць і знішчыць партызан у ходзе аперацыі «Брэслаў» карнікам не ўдалося.

У раёне аперацыі карнікі знішчылі больш за 1000 цывільных грамадзян. У справаздачы аб дзейнасці каманд у раёне аперацыі гаварылася, што «было асоба апрацавана» з 1 па 15 верасня 1942 каля 400 камуністаў і партызан, больш за 300 цыган, каля 50 душэўнахворых.

• Пасэ, У. С. Брэслаў // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 92. — 680 с. — 20 000 экз. — ISBN 5-85700-012-2.