Будзяніцкая Рудня

Будзяніцкая Рудня
Краіна	Беларусь
Вобласць	Мінская
Раён	Барысаўскі
Сельсавет	Іканскі
Каардынаты	54°30′48″ пн. ш. 28°16′45″ у. д.HGЯO
Насельніцтва	▼17 чал. (2009);
Часавы пояс	UTC+3
Тэлефонны код	+375 177
Паштовыя індэксы	222135
Аўтамабільны код	5

Будзяні́цкая Ру́дня^[1] (трансліт.: Budzianickaja Rudnia, руск.: Буденичская Рудня) — вёска ў Барысаўскім раёне Мінскай вобласці. Уваходзіць у склад Іканскага сельсавета.

Геаграфія

Знаходзіцца за 47 км на паўночны захад ад горада Барысаў, 118 км ад Мінска. Рэльеф раўнінны. На поўдні і ўсходзе мяжуе з лесам і цячэ рака Сасна (прыток ракі Мрай). На рацэ каля вёскі сажалка^[2]. Транспартныя сувязі па мясцовай дарозе і далей па шашы Барысаў—Бягомль.

Планіроўка Т-падобная. Да галоўнай вуліцы шыротнай арыентацыі далучаюцца перпендыкулярна дзве кароткія вуліцы. Забудавана двухбакова, шчыльна, драўлянымі дамамі сядзібнага тыпу.

Гісторыя

У 1858 годзе вёска Рудня, 26 жыхароў мужчынскага полу, у Карсакавіцкай воласці Барысаўскага павета Мінскай губерні Расійскай імперыі. У 1897 годзе ў Зембінскай воласці. Напачатку ХХ ст. дзейнічалі вадзяны млын, маслабойня.

З лютага да снежня 1918 года на тэрыторыі, акупіраванай войскамі Германіі. 25 сакавіка 1918 года згодна з Трэцяй Устаўной граматай абвешчана часткай Беларускай Народнай Рэспублікі. З 1 студзеня 1919 года ў БССР, з лютага — у ЛітБел ССР. З жніўня 1919 да мая 1920 года акупіравана польскімі войскамі.

З 31.7.1920 г. ў БССР. З 20.8.1924 г. ў Карсакавіцкім сельсавеце Зембінскага раёна Барысаўскай, з 9.6.1927 г. да 26.7.1930 г. Мінскай акруг, з 20.2.1938 г. Мінскай вобласці. У 1929 г. арганізаваны калгас «Трэці рашаючы». Дзейнічала кузня.

У Вялікую Айчынную вайну ў канцы чэрвеня 1941 г. акупіравана нацыстамі. 29 мая 1943 года гітлераўцы поўнасцю спалілі вёску, загубілі 58 жыхароў, якія пахаваны ў брацкай магіле на паўночнай ускраіне вёскі.

Пасля вайны адбудавана. З 11 студзеня 1968 года ў Іканскім сельсавеце.

Насельніцтва

1897 год — 126 жыхароў, 18 двароў.
1917 год — 132 жыхары, 24 двары.
1926 год — 105 жыхароў.
1940 год — 176 жыхароў, 36 двароў.
1960 год — 94 жыхары.
1988 год — 48 жыхароў, 24 гаспадаркі.
2008 год — 20 жыхароў, 14 гаспадарак.

Зноскі

↑ Назвы населеных пунктаў Рэспублікі Беларусь: Мінская вобласць: нарматыўны даведнік / І. А. Гапоненка, І. Л. Капылоў, В. П. Лемцюгова і інш.; пад рэд. В. П. Лемцюговай. — Мн.: Тэхналогія, 2003. — 604 с. ISBN 985-458-054-7. (DJVU). Сустракаецца таксама варыянт Бу́дзеніцкая Ру́дня
↑ Республика Беларусь. Атлас охотника и рыболова: Минская область / Редактор Г. Г. Науменко. — Мн.: РУП «Белкартография», 2009. — С. 13. — 60 с. — 20 000 экз. — ISBN 978-985-508-174-7. (руск.)

Літаратура

Гарады і вёскі Беларусі: Энцыклапедыя. Т. 8: Мінская вобласць, кн. 1 / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2010. — 736 с.: іл. — 2 000 экз. — ISBN 978-985-11-0520-1.
Республика Беларусь. Атлас охотника и рыболова: Минская область / Редактор Г. Г. Науменко. — Мн.: РУП «Белкартография», 2009. — С. 13. — 60 с. — 20 000 экз. — ISBN 978-985-508-174-7. (руск.)
Ліст карты N-35-57. Выданне 1980 г. (руск.)