Выступовіцкая ступень

Выступовіцкая ступень — тэктанічная структура ў паўднёвай прыбартавой частцы Прыпяцкага прагіну. Атрымала назву ад в. Выступовічы ў Жытомірскай вобласці Украіны, распасціраецца ў Лельчыцкім і Ельскім раёнах Гомельскай вобласці Беларусі.

Выдзяляецца па паверхні фундамента, падсалявых і міжсалявых адкладах. На поўначы па Выступовіцкім субрэгіянальным разломе мяжуе з Ельскім грабенам, на поўдні па Паўднёва-Прыпяцкім краявым разломе — з Украінскім шчытом. Распасціранне шыротнае, даўжыня каля 120 км.

Будова ступені складаная і недастаткова вывучана геафізічнымі метадамі і свідраваннем. Сучасныя сумарныя вертыкальныя амплітуды зрушання паверхні крышталічнага фундамента па Паўднёва-Прыпяцкім разломе складаюць 3000-5000 м^[1]. Платформавы чахол складзены з сярэдне- і верхнедэвонскіх, каменнавугальных і меза-кайназойскіх утварэнняў. У межах ступені адбываецца замяшчэнне верхнесаляносных адкладаў тэрыгеннымі. Выступовіцкая світа трыясавай сістэмы складзена ружавата-чырвонымі розназярністымі пескавікамі, з уключэннем жвіру і галькі оўруцкіх кварцытаў, з праслоямі глін і кангламератаў.

• І. Д. Кудравец. Выступовіцкая ступень // Энцыклапедыя прыроды Беларусі. У 5-і т. Т. 1. Ааліты — Гасцінец / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1983. — 575 с., іл. — 10 000 экз.