Галоўны архітэктар праекта

Галоўны архітэктар праекта (ГАП) — кіраўнік праектавання аб’ектаў цывільнага будаўніцтва, гарадскога планавання і забудовы населеных пунктаў. Забяспечвае стварэнне аптымальных умоў для працы і адпачынку насельніцтва, гарманічнае спалучэнне будынкаў і збудаванняў у архітэктурных ансамблях гарадоў і прамысловых комплексаў^[1].

У адрозненне ад галоўнага архітэктара праекта, галоўны інжынер праекта (ГІП) кіруе праектаваннем аб’ектаў вытворчага прызначэння, забяспечвае іх высокі тэхнічны ўзровень і эканамічную эфектыўнасць. ГІП і ГАП могуць працаваць у рамках аднаго праекта, падзяляючы адказнасць за розныя напрамкі праектавання^[1].

Абавязкі

Галоўны архітэктар праекта ажыццяўляе тэхнічнае кіраўніцтва праектна-пошукавымі работамі, аўтарскі нагляд за будаўніцтвам, увядзеннем у эксплуатацыю і асваеннем праектных магутнасцей. Удзельнічае ў выбары пляцовак для будаўніцтва, падрыхтоўцы заданняў на праектаванне, арганізацыі інжынерных даследаванняў і распрацоўцы праектна-каштарыснай дакументацыі^[1].

Функцыі^[1]

Выкарыстанне перадавых дасягненняў навукі і тэхнікі, эканамічна апраўданых праектных рашэнняў.
Кантроль за якасцю праектна-каштарыснай дакументацыі, зніжэннем выдаткаў на будаўніцтва і эксплуатацыю.
Фарміраванне заданняў для субпадрадных арганізацый, забеспячэнне іх неабходнымі зыходнымі даннымі.
Узгадненне адхіленняў ад дзеючых нормаў і правіл з дзяржаўнымі кантрольнымі органамі.
Аналіз і абагульненне вопыту праектавання, будаўніцтва і эксплуатацыі аб’ектаў.
Удзел у экспертызе праектаў, падрыхтоўцы публікацый і заяўках на патэнты.

Веды і навыкі

Галоўны архітэктар праекта павінен валодаць ведамі ў галіне нарматыўных прававых актаў, будаўнічых нормаў і правілаў, метадаў праектавання, арганізацыі і эканомікі праектна-пошукавых работ, стандартызацыі і патэнтазнаўства, эканамічных і экалагічных патрабаванняў да праектаў, аўтарскага права, заканадаўства аб ахове працы і пажарнай бяспекі^[1].

Кваліфікацыйныя патрабаванні

У Беларусі для атрымання пасады ГАПа патрабуецца вышэйшая адукацыя па профілі праектавання і стаж працы ў галіне не менш за 8 гадоў, а пры праектаванні асабліва буйных і складаных аб’ектаў — не менш за 10 гадоў^[1].