Муляраўская аперацыя

Муляраўская аперацыя
Асноўны канфлікт: Вялікая Айчынная вайна
Муляраўская аперацыя
Дата	22 лютага 1942
Месца	Петрыкаўскі раён
Вынік	перамога партызан
Праціўнікі
«гарнізон Ф. І. Паўлоўскага» Нямецкія акупацыйныя войскі і іх саюзнікі
Камандуючыя
Ф. І. Паўлоўскі, С. В. Маханько

Муляраўская аперацыя — бой партызанскіх атрадаў «гарнізона Паўлоўскага» супраць нямецка-фашысцкіх захопнікаў на чыгуначнай станцыі Муляраўка на лініі Жыткавічы — Калінкавічы 22 лютага 1942 года.

У выніку баявой разведкі і агентурных даных камандаванню «гарнізона Паўлоўскага» стала вядома, што на станцыі Муляраўка знаходзіцца 40 гітлераўцаў з будаўнічага батальёна, які прыбыў у Петрыкаў для аднаўлення чыгункі. З мэтай зрыву аднаўленчых работ камандзір гарнізона Паўлоўскі загадаў атрадам «Чырвоны Кастрычнік» (камандзір Э. Я. Чырлін), А. Ф. Каваленкі, І. Р. Жулегі і Капаткевіцкаму (А. Ц. Міхайлоўскі) разграміць гарнізон ворага на станцыі Муляраўка.

Аперацыяй кіравалі Паўлоўскі і камісар брыгады С. В. Маханько. Да раніцы 21 лютага 1942 года партызанскія атрады сканцэнтраваліся ў вёсцы Залессе Петрыкаўскага раёна. Атрад Міхайлоўскага правёў разведку і ўдакладніў сілы, узбраенне, агнявыя сродкі і ўмацаванні праціўніка. 22 лютага 1942 да 7 гадзін раніцы партызаны акружылі станцыю, падышлі да казармы, у якой размяшчаліся гітлераўцы, і адкрылі агонь. Праціўнік супраціўляўся больш за гадзіну, 29 гітлераўцаў было забіта, 8 узята ў палон. У выніку аперацыі аднаўленчыя работы на гэтым участку былі сарваны. Разгром гарнізона на станцыі Муляраўка — адна з першых баявых аперацый партызан на чыгуначных камунікацыях праціўніка.

• М. У. Філімоненкаў. Муляраўская аперацыя // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 372. — 680 с. — 20 000 экз. — ISBN 5-85700-012-2.