Свята-Васкрасенская царква (Вялікая Слабада)

Праваслаўны храм
Свята-Васкрасенская царква
53°33′05″ пн. ш. 26°14′25″ у. д.HGЯO
Краіна	Беларусь
Вёска	Вялікая Слабада
Канфесія	Праваслаўе
Епархія	Навагрудская
Благачынне	Карэліцкае
Дата пабудовы	канец XIX — пачатак XX ст., 2003 год
Стан	дзейнічае
Глобус Беларусі	globustut.by/velikaya_sl…
Медыяфайлы на Вікісховішчы

Свята-Васкрасенская царква — два праваслаўныя храмы ў вёсцы Вялікай Слабадзе Карэліцкага раёна Гродзенскай вобласці.

Першая царква ў вёсцы была ўзведзена ў 1863 годзе з дрэва на могілках. У канцы XIX стагоддзя пачалося будаўніцтва новага мураванага храма, якое не было скончана ў сувязі з пачаткам Першай сусветнай вайны.

У 1915 годзе нямецкі снарад разбурыў спічак храма і заваліў дах. Калі пры камуністах мясцовыя жыхары пачалі расцягваць царкву па камянях, то аднаму моцна пашкодзіла руку. Пасля гэтага вяскоўцы кінулі разбураць храм^[1].

Новы храм быў збудаваны талакою мясцовых жыхароў у 2003 годзе з дрэва насупраць старога^[2].

Новая царква вырашана ў традыцыях народнага храмабудаўніцтва XIX стагоддзя. Прамавугольны зруб пад двухсхільным дахам, завершаным па цэнтры цыбулепадобным купалам на гранёным барабане. Да фасада далучаны прытвор, над якім надбудавана чатырохгранная шатровая званіца з макаўкай. З тыльнага боку далучана апсіда з бакавымі рызніцамі, завершаная макаўкай. Гарызантальна ашаляваныя сцены прарэзаны прамавугольнымі са скошанымі вугламі аконнымі праёмамі. Уваход накрыты двухсхільным казырком^[3].

• Праваслаўныя храмы Беларусі: энцыклапедычны даведнік / А. М. Кулагін; [рэдакцыйны савет: Г. П. Пашкоў, Л. В. Календа]. — Мінск: Беларуская Энцыклапедыя, 2007. — 653 с. 2000 экз. ISBN 978-985-11-0389-4.

• Свята-Васкрасенская царква (Вялікая Слабада) на сайце Глобус Беларусі (руск.)