Свята-Троіцкая царква (Бытча)

Свята-Троіцкая царква
	Праваслаўны храм
Свята-Троіцкая царква
	54°18′40″ пн. ш. 28°24′11″ у. д.HGЯO
Краіна	Беларусь
Вёска	Бытча
Канфесія	Беларуская праваслаўная царква
Епархія	Барысаўская епархія
Архітэктурны стыль	рэтраспектыўна-рускі стыль
Дата пабудовы	1891 год
Глобус Беларусі	globustut.by/bytcha/inde…

Свята-Троіцкая царква — праваслаўны храм у в. Бытча (Барысаўскі раён). Размешчана на паўночна-заходняй ускраіне вёскі. Помнік архітэктуры рэтраспектыўна-рускага стылю.

Гісторыя

Пабудавана ў 1891 г. з цэглы на месцы старога храма^[1]. Зруйнавана ў гады Вялікай Айчыннай вайны, адноўлена ў 1990-я гг.

Архітэктура

Вертыкальнай дамінантай 4-часткавай аб'ёмна-прасторавай кампазіцыі будынка з'яўлялася 2-ярусная (васьмярык на чацверыку) званіца, спічасты шацёр якой завяршаўся макаўкай і меў слыхавыя кілепадобныя люкарны. Званіца ўрэзана ў папярочны аб'ём прытвора, які праз трапезную далучаецца да кубападобнай малітоўнай залы, накрытай пакатым 4-схільным дахам, які завяршаўся 4-гранным барабанам з цыбулепадобнай галоўкай. У дэкоры выкарыстаны кілепадобныя франтоны і аркі, здвоеныя бочкападобныя паўкалоны, цыбулепадобныя купалы (знесены ў пасляваенны час). Плоскасныя фасады дэкарыраваны філёнгавым фрызам і вуглавымі лапаткамі з шырынкамі, расчлянёны прамавугольнымі аконнымі праёмамі.

Інтэр'ер

Унутраная прастора царквы складаецца з рознавялікіх, размешчаных па падоўжнай планіровачнай восі памяшканняў прытвора, трапезнай, малітоўнай залы, апсіды. Па баках прытвора і апсіды вылучаны бакоўкі. Памяшканні перакрыты драўлянымі корабамі скляпеннямі і аб'яднаны шырокімі лучковымі аркамі.

Хрысцільная царква

З правага боку ад храма стаяла хрысцільная царква — прамавугольны ў плане драўляны будынак з апсідным 3-сценкам, накрыты 2-схільным з вальмамі дахам. Над якім узвышаліся 2 макаўкі.