Социалист-революционер

«Социалист-революционер» — газета Мінскага абласнога камітэта партыі сацыялістаў-рэвалюцыянераў (эсэраў). Выходзіла з 23 кастрычніка да 19 снежня 1917 г. у Мінску на рускай мове штодзённа. Прытрымлівалася правай плыні партыі эсэраў. Змяшчалы звароты ЦК, артыкулы партыйных дзеячаў, перадрукоўку з газеты «Дело народа», паведамляла пра партыйны рух сярод вайскоўцаў. Друкавала адозвы А. Ф. Керанскага, ЦК і фракцыі эсэраў, 2-га Усерасійскага з’езда Саветаў, Камітэта выратавання рэвалюцыі Заходняга фронту і інш. Выступала ў абарону дэмакратычных свабод, за наданне паўнамоцтваў Устаноўчаму сходу ў вырашэнні праблем расійскага грамадства, у падтрымку дзяржаўнасці беларускіх зямель, земскага і гарадскога самакіравання, салдацкіх, сялянскіх і рабочых арганізацый. Змяшчала матэрыялы пра дзейнасць у Мінску 2-га франтавога, 3-га сялянскага, Усебеларускага і інш. з’ездаў, справаздачы аб пасяджэннях Аблвыкамзаха, паведамленні на тэмы агульнарускага і беларускага жыцця, нарысы, вершы. Закрыта 19 снежня загадам СНК Заходняй вобласці і фронту. Выйшла 48 нумароў.

• Сяменчык, М. Я. «Социалист-революционер» // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 91–92. — 10 000 экз. — ISBN 985-11-0035-8. — ISBN 985-11-0251-2 (т. 15).