Таня Вуйсыч-Тадароўская

Таня Вуйсыч-Тадароўская (макед.: Тања Вујисиќ-Тодоровска, англ.: Tanja Vujisić-Todorovska, нар. 28 жніўня 1961) — македонская балерына, балетная прыма тэатра македонскай оперы і балета, лаўрэат прэміі імя А. Ф. Шэкеры ў галіне харэаграфічнага мастацтва (2006).

Таня Вуйсыч-Тадароўская нарадзілася 28 жніўня 1961 года.

У 1979 годзе скончыла сярэднюю школу, пасля чаго вучылася ў вучылішчы музыкі і балета «Ілля Нікалоўскі-Луй» у Скоп’е (педагог Лізавета Кушоўская).

Таксама скончыла Кіеўскае дзяржаўнае харэаграфічнае вучылішча (клас Галіны Кірылавай), прайшла стажыроўку як балетмайстар ва Украінскай акадэміі танца  (укр.) (бел. (клас вядомага педагога Элеаноры Сцябляк) і ў 2006 годзе атрымала дыплом педагога-рэпетытара класічнага балета. Стажыравалася ў Нацыянальнай оперы Украіны, а таксама прайшла спецыялізацыю ў Парыжы.

Пасля завяршэння балетнай кар’еры Таня пачала плённую выкладчыцкую і навуковую працу.

У 2010 годзе абараніла магістарскую дысертацыю ва ўніверсітэце св. Кірыла і Мяфодзія.

У 2016 годзе выйшла манаграфія «Мадэляванне педагагічнай працы балетных рэпетытараў», якая з’яўляецца першай навуковай працай, прысвечанай комплекснай праблеме мадэлявання педагагічнай працы балетных рэпетытараў у Македоніі.^[1][2]

У цяперашні час працуе галоўным педагогам-рэпетытарам тэатра македонскай оперы і балета,^[3] а таксама загадчыкам кафедры балетнай педагогікі, прафесарам методыкі класічнага балета ў музычнай школе ўніверсітэта Св. Кірыла і Мяфодзія^[4] у Скоп’е.

Вуйсыч-Тадароўскую называюць вучаніцай Анатоля Фёдаравіча Шэкеры. Яна танцавала ў яго балетах, пастаўленых у Скоп’е — «Распуцін», «Спартак»,^[5] «Легенда пра каханне».

Яе творчая кар’ера балерыны праходзіла ў родным Скоп’е, дзе ў якасці прыма-балерыны тэатра македонскай оперы і балета яна танцавала больш чым у 300 балетах, выканаўшы больш за 40 галоўных роляў у такіх пастаноўках, як «Рамэа і Джульета» С. Пракоф’ева, «Жызель» А. Адана, «Лебядзінае возера» П. Чайкоўскага, «Карсар», «Македонская гісторыя», «Дуброўніцкая легенда», «Мірта».

Выступала на сцэнах Скоп’е, Кіева, Лондана, Парыжа, Пекіна, Таронта, Любляны, Падгорыцы і інш.

Таня з’яўляецца лаўрэатам шматлікіх нацыянальных македонскіх і міжнародных прэмій, яе імя ўнесена ў Брытанскую энцыклапедыю ў раздзел «Асобы з Македоніі».

У 2002 годзе рэжысёр Саша Паўлоўскі зняў для македонскага тэлебачання дакументальны фільм «Партрэт балерыны Тані Вуйсыч-Тадароўскай».

У 2006 годзе стала лаўрэатам прэстыжнай украінскай прэміі імя А. Ф. Шэкеры ў галіне харэаграфічнага мастацтва.

У 2011 годзе атрымала высокую дзяржаўную ўзнагароду Македоніі «11 кастрычніка».^[6]