Диме Толовски

Диме Толовски (Кавадарци, 17 декември 1925 – Москва, 8 февруари 1992) – дипломиран градежен инженер, лексикограф, преведувач и новинар-радиоспикер.^[1]

Толовски е роден во Кавадарци на 17 декември 1925 година. Како гимназијалец, од 1942 година се вклучува во Народноослободителното движење, првин како илегален активист, а потоа во состав на 41. дивизија на НОВМ.

По ослободувањето, од 1944 до 1946 година, предавал математика и физика во гимназијата во Кавадарци и учествувал во општествено-политичките организации во градот. На предлог на владата на ФНРЈ, во 1946 година бил испратен на студии во СССР. Дипломирал и ги завршил постдипломските студии по градежништво, но по Резолуцијата на Информбирото во 1948 година, останал во Москва и се определил за водител на дневната емисија на македонски јазик на Радио Москва.

Преведувал поезија и проза од македонски јазик на руски и обратно, а со помош на рускиот филолог Владислав Илич-Свитич, го составил првиот Македонско-руски речник (30.000 зборови со кратка граматика) под редакција на Н.И. Толстој.

Починал во Москва, а посмртните останки, по негово завештание, биле погребани во неговиот роден град на 2 октомври 1993 година.^[1]

• Д. Толовски и В.М. Иллич-Свитыч. Македонско-русский словарь. 30000 слов. Под ред. Н.И.Толстого. С приложением краткого грамматического справочника, составленного В.М.Илличем-Свитычем. Государственное издательство иностранных и национальных словарей, Москва, 1963; 576 с.