Светиниколска Река

За други значења видете на Азмак (појаснување)

Светиниколска Река
Местоположба
Физички особености
Устие	Брегалница, Македонија
Должина	35 км
Особености на сливот

Светиниколска Река или Азмак — македонска река, десна притока на реката Брегалница^[1] и најголемиот воден тек во Овче Поле^[2].

Настанува од три помали водотеци (краци):

• Караташ (Црн Камен),
• Бериш и
• Мавровица,

кои се соединуваат кај градот Свети Николе, по што го добива името Светиниколска Река, а пред сливот во реката Брегалница е позната под името Азмак.

• Караташ се формира во близина на селото Павлешенци, на надморска височина од 389 метри.
• Бериш извира во атарите на Малино и Алакинци, на надморска височина од 380 метри.
• Мавровица извира од планината Манговица, на височина од 610 м.

Светиниколска Река во Овчеполската Котлина прима неколку притоки. Нејзини леви притоки се Буриловска Река со Немашница, додека десни притоки се Горобинска Река (Поток), Кнежевска Река и Ѓуземелска Река, сите со пороен карактер. Овие овчеполски рекички во летните месеци наполно пресушуваат.

На реката Мавровица, во местото Алин Дол, изградена е акумулација во должина? од 7 км², со зафатнина од 2.700.000 кубни метри. Оваа акумулација се користи за водоснабдување на Свети Николе^[2].

Светиниколска Река се слива во Брегалница на височина од 203 м. Долга е 35 км, има вкупен пад од 407 м и просечен пад од 11,6 ‰. Површината на сливот изнесува 658,7 км². Во најголемиот дел од сливот има пороен карактер.^[3]