Честотна модулација

Честотна модулација или фреквенциска модулација^[1][2][3][4] (ЧМ или FM) — вид на аголна модулација при која носечката честота се менува пропорционално на сигналот на корисната информација. Замавот на носечката честота е константна. Со амплитудната и фазната модулација, претставува една од трите основни видови модулации.

Ако сигналот на информацијата е аналоген сигнал (глас, музика), носечката честота ќе се менува континуално во одреден честотен опсег. Ако сигналот на информација е дигитален сигнал, носечката честота може да има две или повеќе дискретни вредности. Во наједноставниот облик, бинарната дигитална честотна модулација, честотата се одржува на една вредност за дигиталната нула, а на друга за единицата.

Честотната и фазната модулација се многу слични, не е можно да се менува фазата без промена на честотата и обратно. Ги разликуваме само по тоа која особина на носителот директно се менува. Ако директно се менува честотата, а индиректно фазата, станува збор за честотна модулација. Ако директно се менува фазата, а индиректно честотата, станува збор за фазна модулација.

Комерцијалните радиостаници во опсегот на ултракратките бранови (УКБ) ја користат честотната модулација. Исто така се користи и за пренос на звук во безжичниот телевизиски систем, и многу други жични и безжични комуникациски системи.

Предност на честотната над амплитудната модулација во радиокомуникациите е поголемата отпорност на пречки, а мана ѝ е зафаќање на поголем честотен опсег.

Да го разгледаме математичкиот израз за синусоиден бран:

v = Vp sin (2πft+θ) или

v = Vp sin (ωt+θ)

каде

• v = е моментална вредност на синусоидниот напон
• Vp = е врвна вредност на синусоидниот напон
• f = е честота (Hz)
• ω = 2πf = е аголна брзина
• t = е време (s)
• ωt = 2πft = е агол во радијани
• θ = е фазен агол

Од изразот може да се види дека постојат три начини на модулација во зависност од тоа на кој начин се менува носителот. Тоа се амплитудната, честотната и фазната модулација.

• Модулација
• Амплитудна модулација
• Фазна модулација

• Tomasi, Wayne (2001). Electronic Communication Systems, Fundamentals Through Advanced (4. изд.). Prentice Hall. ISBN 978-0-13-022125-4.

• Честотна модулација на Ризницата ^?