မြန်မာခရစ်ယာန်အသင်းတော်များ

မြန်မာနိုင်ငံတွင် ခရစ်ယာန်ဘာသာသည် အဓိက ကိုးကွယ်မှု ဘာသာရပ်များထဲမှ တစ်ခု ဖြစ်သည်။ ခရစ်ယာန်ဘာသာဝင် အများစုမှာ တိုင်းရင်းသားလူမျိုးစုများဖြစ်သော ချင်း၊ ကရင်၊ ကချင်၊ လီဆူး၊ လားဟူ စသူတို့မှ ဖြစ်သည်။

CIA Factbook ၏ ဖော်ပြချက်အရ မြန်မာနိုင်ငံ၏ ခရစ်ယာန်ဘာသာဝင် ဦးရေသည် လူဦးရေ စုစုပေါင်း၏ ၄ ရာခိုင်နှုန်း (၂.၄ သန်းခန့်) ရှိသည်ဟု ဆိုသည်။ ၎င်းတို့အနက် ပရိုတက်စတင့် ၃ ရာခိုင်နှုန်းနှင့် ရိုမန်ကက်သလစ် ၁ ရာခိုင်နှုန်းခန့် ပါဝင်သည်။

အင်္ဂလီကန် အသင်းတော် (Anglican Communion) ၏ ၂၀၀၆ ခုနှစ် စာရင်းများအရ အသင်းဝင် ၆၂,၀၀၀ ခန့် ရှိသည်။ မြန်မာနှစ်ခြင်းအသင်းတော် အဖွဲ့ချုပ် (Myanmar Baptist Convention) ၏ စာရင်းများအရ ပရိုတက်စတင့် ခရစ်ယာန်များ စုစုပေါင်း၏ တစ်ဝက်ခန့်မှာ နှစ်ခြင်းခရစ်ယာန်များ ဖြစ်သည်။ မြန်မာနှစ်ခြင်းအဖွဲ့ချုပ်၏ ၂၀၀၆ ခုနှစ် မှတ်တမ်းများအရ အသင်းသားဦးရေ ၆ သိန်းကျော် (၆၆၂,၈၃၄) နှင့် အသင်းတော် ၃၉၀၅ ခု ရှိသည်။

မြန်မာနိုင်ငံတွင် လူမျိုးစုကြီး ရှစ်စုဖြစ်သော ဗမာ၊ ချင်း၊ ကချင်၊ ကယား၊ ကရင်၊ မွန်၊ ရခိုင်၊ ရှမ်းတို့အပြင် တရုတ်နှင့် အိန္ဒိယလူမျိုး အများအပြားလည်း နေထိုင်ကြသည်။ ဗမာလူမျိုးသည် လူဦးရေ၏ ၆၀ ရာခိုင်နှုန်းခန့်ရှိသော အဓိက လူမျိုးစု ဖြစ်သည်။ ကျန် ခုနစ်မျိုးသော လူနည်းစု တိုင်းရင်းသားများနှင့် တရုတ်၊ အိန္ဒိယလူမျိုးများမှာ လူဦးရေ၏ ၃၅ ရာခိုင်နှုန်းအောက်တွင် ပြန့်ကျဲ နေထိုင်ကြသည်။ လူမျိုးစု အများစုမှာ တောင်ပေါ်နေ လူမျိုးများနှင့် ကျေးလက်ဒေသများမှ ဖြစ်ကြသည်။

နိုင်ငံလူဦးရေ၏ ခန့်မှန်းခြေ ၈၇% မှာ ဗုဒ္ဓဘာသာ (ထေရဝါဒ)၊ ၆% မှာ ခရစ်ယာန်၊ ၄% မှာ မူဆလင်၊ ၁% မှာ ဟိန္ဒူနှင့် ၂% မှာ အခြား ကိုးကွယ်သူများ ဖြစ်သည်ဟု ခန့်မှန်းရသည်။ ခရစ်ယာန်ဘာသာဝင်များသည် တိုင်းရင်းသား လူမျိုးစုအားလုံးတွင် ပါဝင်ကြသော်လည်း ၉၀% ကျော်မှာ ကရင်၊ ကချင်၊ ချင်းနှင့် ကယား လူမျိုးများ ဖြစ်ကြသည်။ ဗမာ၊ ရခိုင်၊ ရှမ်းနှင့် မွန် စသည့် ဗုဒ္ဓဘာသာ အားကောင်းသည့် လူမျိုးစုများအကြားတွင်မူ ခရစ်ယာန်ဦးရေ အလွန်နည်းပါးသည်။

မြန်မာနိုင်ငံရှိ ခရစ်ယာန်ဂိုဏ်းဂဏ များစွာအနက် အဓိက အဖွဲ့အစည်းအချို့ ရှိသည်။ နိုင်ငံတော်အစိုးရက တရားဝင် အသိအမှတ်ပြုထားသည့် မြန်မာနိုင်ငံ ခရစ်ယာန် ကောင်စီ (Myanmar Council of Churches - MCC) သည် ဂိုဏ်းပေါင်းစုံ အဖွဲ့အစည်းများ၏ စုပေါင်းအဖွဲ့အစည်းတစ်ခု ဖြစ်သည်။ ၁၉၆၀ ပြည့်လွန်နှစ်များ နောက်ပိုင်းတွင် အခြားသော သီးခြား ခရစ်ယာန်အဖွဲ့အစည်းများလည်း ပေါ်ပေါက်လာသည်။

အဓိက ခရစ်ယာန်အဖွဲ့အစည်းကြီးအချို့မှာ-

• မြန်မာနိုင်ငံ ဧဝံဂေလိ မိတ်သဟာယအဖွဲ့ (Myanmar Evangelical Christian Fellowship - MECF)
• မြန်မာနိုင်ငံ ဧဝံဂေလိ ပူးပေါင်းဆောင်ရွက်ရေးအဖွဲ့ (Myanmar Christian Co-operation Mission - MCCM)

၎င်းအပြင် ဆရာ ဒေဗစ်ရိုးမို ဦးဆောင်ခဲ့သည့် Yangon Christian Youth Crusade (MYC)၊ Evangelical Baptist Church၊ ဆရာ ရော်ဗင်ခိုင်၏ အဖွဲ့အစည်း စသည်ဖြင့် များစွာ ရှိသည်။ ဤအဖွဲ့အစည်းများတွင် ပါဝင်သော ခရစ်ယာန်ဦးရေလည်း များစွာ ရှိသည်။ ပရိုတက်စတင့် ခရစ်ယာန်များတွင် MCC ကဲ့သို့သော တရားဝင် အသိအမှတ်ပြုထားသည့် အဖွဲ့အစည်းများအပြင် ထိုအဖွဲ့ဝင် မဟုတ်သော ဧဝံဂေလိ အသင်းတော်နှင့် အဖွဲ့အစည်းများလည်း များစွာ ရှိကြသည်။

၁၉၇၀ ပြည့်လွန်နှစ်များ နောက်ပိုင်းတွင် အေဂျီအသင်းတော်များ (Assemblies of God) ခေတ်စားလာသည်။ ယခုအခါ ပရိုတက်စတင့်များသာမက ရိုမန်ကက်သလစ် အသင်းတော်များစွာတွင်လည်း ကိုးကွယ်ဝတ်ပြု အစည်းအဝေး မစတင်မီ သီဆို ချီးမွမ်းခြင်းကို ဦးစွာ ပြုလုပ်လာကြသည်။

MCC ၏ အဖွဲ့ဝင် အသင်းတော်များနှင့် ခရစ်ယာန်အဖွဲ့အစည်းများကို အောက်ပါအတိုင်း ဖော်ပြထားသည်-

• မြန်မာနှစ်ခြင်းအသင်းတော် အဖွဲ့ချုပ် (Myanmar Baptist Convention)
• မြန်မာပြည်ဂိုဏ်းချုပ်နယ်မြေရှိ အသင်းတော် (Church of the Province of Myanmar)
• မက်သဒစ်အသင်းတော် (မြန်မာပြည်အထက်ပိုင်း) (Methodist Church, Upper Myanmar)
• မာရာ ဧဝံဂေလိ အသင်းတော် (Mara Evangelical Church)
• မြန်မာနိုင်ငံ ပရက်စ်ဘီတီးရီးယန်း အသင်းတော် (Presbyterian Church of Myanmar)
• မက်သဒစ်အသင်းတော် (မြန်မာပြည်အောက်ပိုင်း) (Methodist Church, Lower Myanmar)
• မြန်မာနိုင်ငံ လွတ်လပ်သော ပရက်စ်ဘီတီးရီးယန်း အသင်းတော် (Independence Presbyterian Church of Myanmar)
• လူသာရန် ဘက်သလီဟမ် အသင်းတော် (Lutheran Bethlehem Church)
• စိန့်ဂါဗြေလ အသင်းတော်များ သမဂ္ဂ (St. Gabriel’s Congregational Union Church)
• ကယ်တင်ရေးတပ်ဖွဲ့၊ မြန်မာဒေသ (Salvation Army, Myanmar Region)
• မိမိကိုယ်ကို ထောက်ပံ့သော ကရင်နှစ်ခြင်း သာသနာပြုအဖွဲ့ (Self-Supporting Kayin Baptist Mission Society - SSKBMS)
• မြန်မာနိုင်ငံ လီဆူး ခရစ်ယာန် အသင်းတော် (Lisu Christian Church of Myanmar - LCC)
• မြန်မာနိုင်ငံ ဧဝံဂေလိ လွတ်လပ်သော အသင်းတော် (Evangelical Free Church of Myanmar)
• လွတ်လပ်သော ဘုရားကျောင်း ပြည်တွင်းသာသနာပြုအဖွဲ့ (Independent Church Home Mission)

• မြန်မာနိုင်ငံ အမျိုးသား YMCAs ကောင်စီ (Nation Council of YMCAs of Myanmar)
• အမျိုးသား YWCA (National YWCA)
• မြန်မာနိုင်ငံ ကျမ်းစာအသင်း (Bible Society of Myanmar)
• မြန်မာနိုင်ငံ ခရစ်ယာန် စာပေအသင်း (Christian Literature Society of Myanmar)
• မြန်မာနိုင်ငံ ဓမ္မပညာ သင်ကြားရေးအဖွဲ့ (Association for Theological Education in Myanmar - ATEM)
• မြန်မာနိုင်ငံ ခရစ်ယာန် ကျန်းမာရေး လုပ်သားများ ဝန်ဆောင်မှုအသင်း (Myanmar Christian Health Workers’ Service Association - MCHWSA)
• မြန်မာနိုင်ငံ ခရစ်ယာန် နူနာရောဂါ သာသနာပြုအဖွဲ့ (Myanmar Christian Leprosy Mission)
• ခရစ်တော်အတွက် မြန်မာလူငယ်များ (Myanmar Youth for Christ - MYFC)
• မြန်မာနိုင်ငံ အမျိုးသား အသင်းတော်ပေါင်းစုံ ချေးငွေရန်ပုံငွေအဖွဲ့ (National Ecumenical Church Loan Fund - ECLOF of Myanmar)
• မြန်မာနိုင်ငံ ဂိဒေါင် အပြည်ပြည်ဆိုင်ရာအဖွဲ့ (The Gideons International Myanmar)
• မြန်မာနိုင်ငံ ခရစ်ယာန် အမျိုးသမီး အကြံဉာဏ်ပေးရေး သမဂ္ဂ (The Myanmar Christian Women Temperance Union)

၁၉၆၆ ခုနှစ်တွင် တော်လှန်ရေးအစိုးရမှ ခရစ်ယာန် မစ်ရှင်ကျောင်းများအားလုံးကို ပြည်သူပိုင် သိမ်းယူခဲ့သည်။ ထို့အပြင် နိုင်ငံခြားသား သာသနာပြုဆရာများအား မြန်မာနိုင်ငံတွင် နေထိုင်ခွင့် မပြုတော့ပေ။ ဤအခြေအနေကြောင့် မြန်မာအသင်းတော်များသည် နိုင်ငံခြားအဆက်အသွယ် အများအပြား မရှိဘဲ ပြည်တွင်းတွင် ရပ်တည် လုပ်ဆောင်ခဲ့ရသည်။ နှစ်ခြင်း (Baptists)၊ အေဂျီ (Assemblies of God)၊ မက်သဒစ် (Methodists) နှင့် အင်္ဂလီကန် (Anglicans) အသင်းတော်များသည် မြန်မာနိုင်ငံတွင် အင်အားကြီး အသင်းတော်များအဖြစ် ဆက်လက် တည်ရှိနေခဲ့သည်။

• http://www.mcc-mm.org/member-churches 27 July 2011 ၌ မော်ကွန်းပြန်ကြည့်စက်တွင် မော်ကွန်းတင်ပြီး .
• http://burmesebible.com/b/adoniram_judson_by_fred_barlow.htm
• MBC Baptist မန်းအောင်ကျော်ဇံ
• http://www.ethnologue.com
• ဘားမိစ်ဘိုင်ဘယ်, ဆရာကြီးဦးတင်မောင်ထွန်း
• [၁]^{[လင့်ခ်သေ]}, မုရန်အင်တာနက်မဂ္ဂဇင်း