வேணுகோபால சுவாமி கோயில், கணபதி

அருள்மிகு வேணுகோபால சுவாமி திருக்கோயில், கணபதி அல்லது வேணுகோபால சுவாமி திருக்கோயில், கணபதி^[1] இந்தியா தீபகற்பத்தின் தமிழ்நாடு மாநிலத்தில் கோயம்புத்தூர் மாவட்டத்தில் கணபதி ஊரில் அமைந்துள்ளது. சுமார் 1000 ஆண்டுகளுக்கு முன் இக்கோயிலின் முன் பகுதியில் அமைந்துள்ள கோட்டை கணபதி (விநாயகர்) சன்னதியை வைத்தே இவ்வூர் 'கணபதி' என்று அழைக்கப்பட்டு வருவதாக வரலாறு.^{[சான்று தேவை]}

சுமார் ஆயிரம் ஆண்டுகளுக்கு முன், மைசூரை ஆண்ட யாதவ வம்சத்தைச் சேர்ந்த மகாராஜா, இவ்வூர் மக்களுக்கு சாசனம் செய்து கொடுத்து, இக்கோயிலையும் உருவாக்கியதாகக் கூறப்படுகிறது.^{[சான்று தேவை]} மாதையா உடையார் வம்சத்தைச் சேர்ந்த அரசர் இக்கோயிலை புனருத்தாரணம் செய்ததாகக் கல்வெட்டுகளில் காணப்படுவதாக வரலாறு.^{[சான்று தேவை]}

இக்கோயிலில், பிரதி மாதம் பவுர்ணமி சத்யநாராயண பூஜை, பிரதி மாதம் திருவோணம் நட்சத்திரத்தில் சிறப்புப் பூஜைகள், மார்கழி உற்சவம், வைகுண்ட ஏகாதசி, ஸ்ரீராம நவமி, நவராத்திரி திருவிழா, புரட்டாசி மாத சனிக்கிழமைகள் சிறப்புப் பூஜைகள், ஆடி வெள்ளி வரலட்சுமி நோன்பு (மகாலட்சுமி தாயாருக்கு பூஜை), ஆடிப் பூரம், உரியடி விழா, மூல நட்சத்திரம் அன்று ஆஞ்சநேயருக்கு அபிஷேகம், சித்திரை நட்சத்திரத்தில் சக்கரத்தாழ்வார் சிறப்புப் பூஜைகள் ஆகியவை முக்கியத் திருவிழாக்களாகக் கொண்டாடப்படுகின்றன.

செங்கமலவள்ளி (மகாலட்சுமி) தாயார் சன்னதி, ஆண்டாள் சன்னதி, அனுமன் சன்னதி, மூல கருடன் சன்னதி, ஆழ்வார்கள் சன்னதி, நவக்கிரக சன்னதி, விநாயகர் சன்னதி ஆகிய முக்கிய சன்னதிகள் உள்ளன.

இக்கோயில், தமிழ்நாட்டின் கோயம்புத்தூர் மாவட்டத்தில் 'கணபதி' என்ற பெயர் கொண்ட ஊரின், பேருந்து நிறுத்தத்திலிருந்து சங்கனூர் நகருக்குச் செல்லும் வழியில், சில மீட்டர்கள் தூரத்தில அமைந்துள்ளது. இதன் புவியியல் ஆள்கூறுகள்: 11°02'10.2"N 76°58'34.4"E (11.036159°N 76.976232°E). கடல் மட்டத்திலிருந்து சுமார் 444 மீட்டர்கள் உயரத்தில் அமைந்துள்ளது, இக்கோயில்.

கோயம்புத்தூர், கணபதி, சங்கனூர், மணியகாரம்பாளையம், நல்லாம்பாளையம், கவுண்டம்பாளையம், சரவணம்பட்டி, துடியலூர், இரத்தினபுரி, ஆவாரம்பாளையம் ஆகிய ஊர்களிலுள்ள மக்கள் இக்கோயிலுக்கு வந்து தரிசனம் செய்து செல்கின்றனர்.

சத்தி சாலை, சங்கனூர் சாலை முதலிய சாலைகள் இக்கோயிலை கோயம்புத்தூர் நகருடன் இணைக்கின்றன.

கோயம்புத்தூர் சந்திப்பு தொடருந்து நிலையம் சுமார் 4 கி.மீ. தொலைவில் உள்ளது.

அருகிலுள்ள விமான நிலையம் கோயம்புத்தூர் பன்னாட்டு வானூர்தி நிலையம் சுமார் 12 கி.மீ. தொலைவில் உள்ளது.