கீரவாணி

கீரவாணி (Keeravani) என்பது கருநாடக இசையில் 21வது மேளகர்த்தா இராகம். அசம்பூர்ண மேள பத்ததியில் இந்த இராகத்தின் பெயர் கிரணாவளி. விரிவான ஆலாபனைக்கு இடம் கொடுப்பதுடன், பக்தி சுவையையும் வெளிப்படுத்தும். எப்போதும் பாடலாம்.^[1]^[2]

இலக்கணம்

ஆரோகணம்:	ஸ ரி₂ க₂ ம₁ ப த₁ நி₃ ஸ்
அவரோகணம்:	ஸ் நி₃ த₁ ப ம₁ க₂ ரி₂ ஸ

வேத என்றழைக்கப்படும் 4வது சக்கரத்தில் 3வது மேளம்.
இந்த இராகத்தில் ஷட்ஜம், சதுஸ்ருதி ரிஷபம்(ரி₂), சாதாரண காந்தாரம்(க₂), சுத்த மத்திமம்(ம₁), பஞ்சமம், சுத்த தைவதம் (த₁) , காகலி நிஷாதம் (நி₃) ஆகிய சுரங்கள் வருகின்றன.

சிறப்பு அம்சங்கள்

பிரதியாகத கமகம் இந்த இராகத்தின் சாயலை நன்கு வெளிப்படுத்தும்.
இதன் மத்திமத்தை பிரதி மத்திமாக மாற்றினால் இராகம் சிம்மேந்திரமத்திமம் ஆகும்.
இது ஒரு மூர்ச்சனாகாரக மேளம். இதன் மத்திமம், பஞ்சமம், தைவதம் முறையே கிரக பேதத்தின் வழியாக ஹேமவதி (58), வகுளாபரணம் (14), கோசலம் (71) இராகங்கள் கொடுக்கும்.
மேல்நாட்டு இசையில் ஹார்மோனிக் மைனர் (Harmonic Minor Scale) என்பது கீரவாணி இராகமே.